ISAYA 51 - Biblia Ilagho Jiboie Kwa Wandu Wose

Malagho gha wuhoreshi kwa Jerusalemu

¹ BWANA waghamba, “Nisikirenyi inyo mlolagha kukia, ee, inyo mmbose mumlolagha BWANA; zighanenyi ijo igho, andu morekoteroghe mkafunywa, na icho kina cha magho andu morefunyiroghe.

² Mzighanenyi ndeyo onyu Abrahamu, na Sara uo oremvaeghe. Kwa kukaia neremmbangieghe ngelo usene mwana ungi, ngamrasimia na kum'bonya uve kwa wungi.

³ Angu ini BWANA nichaghuwonia wughoma na kughuhoresha muzi ghwa Jerusalemu, nichareda wuhoreshi andenyi ya muzi ghuwunjiro kukaia ighacho, na ikara jawo jichawuya sa Edeni, sa iyo mbuwa ya BWANA. Muzi ugho ghuchachulwa ni iseko na kuboilwa, na chwaka ra kubora na kufunya chawucha richasikirika.

⁴ “Nisikirenyi inyo wandu wapo, nideghienyi madu inyo mbari yapo; kwa kukaia sharia ichafuma kwapo, na hachi yapo ichakaia sa mwengere kwa wandu.

⁵ Hachi yapo eko kaavui kucha, kukia kwapo kwalighisa kumchea; nichawibonyera wandu nguma kwa mkonu ghwapo, na wandu wa masanga gha pwani wichanisuwiria.

⁶ Wusirenyi meso mzighane cha mlungunyi, zighanenyi cha ndoenyi nakosi; kwa kukaia kuchainjika sa mosi, na ndoenyi kuchaghosia sa nguwo. Wandu wikaiagha andenyi yaro wichafwa sa shimandu, ela kukia kwapo kuchadua kwa kala na kala, na hachi yapo ndeichaasia anduangi.

⁷ “Nisikirenyi inyo muimanyagha hachi, inyo wandu mmbwadie sharia yapo ngolonyi; msakeobua masholio gha wandu, hata msakefwa waya kwa kudukana kwawo.

⁸ Angu awo wichajighwa seji soya ijagha nguwo, na seji vivunyu vijagha sufu; ela hachi yapo ichadua kwa kala, na kukia kwapo kuchakaia kwa vivalwa vose.”

⁹ Wuka! Wuka na ndighi rako kudikire ee BWANA, wuka karakara na matuku gha kala, karakara na vivalwa va kokala uko. Welee, si oho kumoni koremdumbueghe Rahabu viluponge viluponge, kukaidunga na lufu ija choka mbaa eobosha ya baharinyi?

¹⁰ Welee, si oho kumoni koreomerieghe bahari, ee, agho machi ghimilie, hata kukabonya chia aghadi ya bahari kwa wundu ghwa wandu wako wikombolo anguwada?

¹¹ Niko aho wandu wa BWANA wikombolo wichawuya, wichacha Jerusalemu wikibora, nawo wichakaia na maboilo gha kala na kala; wichakaia na iseko na kuboilwa, wasi na kulila ndeghuchaakaia kwawo anduangi.

¹² BWANA waghamba, “Ni Ini, ee, ni inimoni nikuhoreshagha, waghamba BWANA; kwaki oho kumuobuagha mdamu ufwagha, uo mwana wa mdamu uko sa nyasi riomagha shwa,

¹³ hata kumliwe BWANA Muumbi wako uo ubonyere mlungunyi, na kuwika msingi ghwa ndoenyi, na oho kodemuobuagha mkorongi wako matuku ghose ngelo kwammbona wakuwika tayari kukutotesha? Agho machu gha mkorongi wako ghekutotesha ghiao?

¹⁴ Uo orefungiloghe kifungonyi, uchafungulwa shwa wori ndechaafwa na kuserwa Kinenyi hata ndechaasowa vindo anduangi.

¹⁵ “Ini ne BWANA Mlungu wako, uo uinyavuragha bahari hata mivo-mivo yaro irurume; irina japo ni BWANA wa majeshi.

¹⁶ Nakunekie malagho ghapo gheghora, nani ngakulindia kwa ndighi rapo; ni ini nibonyere mlungunyi, na kuwika misingi ya ndoenyi; nani nadawizera wandu wa Jerusalemu, ‘Inyo mo wandu wapo.’”

Kusia kwa matiriro gha Jerusalemu

¹⁷ Wuka! Wuka kukaie kimusi ee Jerusalemu, oho korenyueghe kikombe cha machu gha Mlungu kufuma mkonunyi kwake; kwachinyue hata kukachiangamira na kutatarika.

¹⁸ Aghadi ya wana wako wose kuwivae, ndekuwadie ungi wa kukulongoza, ndekuwadie hata mwana ungi wa awo kuwilelie uchaakuwadia mkonu.

¹⁹ Kwapatiro ni malagho awi, wasi na kunoneka, njala na wuda; ndekuwadie mndungi okuhoresha.

²⁰ Wana wako wasilwa na kudumbuka chienyi, kwa kula mbembe ya chia, wakaia kara kara na ighalu jawadwa nyavunyi; wachulwa ni makabo ga BWANA uko kukania kwa Mlungu wako.

²¹ Kwa huwo sikirenyi agha inyo wandu wa Jerusalemu mkorongelo, inyo mmbongerie msenyue divei:

²² BWANA, uo BWANA Mlungu wako ukudederiagha waghamba huwu, “Ola icho kikombe chawuyakutatarisha nameria kuchiinja mkonunyi kwako, ndekuchaanywa icho kikombe cha machu ghapo sena anduangi.

²³ Nichawineka awo werekutiriragha icho kikombe, awo wikuzerie, ‘Ghomeka diwoneida naighu yako;’ mghongo ghwako ghukawuya sa ndoe, kara kara na chia yawo eidiria!”