ISAYA 50 - Biblia Ilagho Jiboie Kwa Wandu Wose

¹ BWANA waghamba, “Barua ewilegha wandu wapo sa etana na muka eko hao? Na ikakaia nimuuzire wuzumbenyi, namuuzire kwani? Olenyi ni kwa wundu ghwa kaung'a renyu niko moreuziroghe wuzumbenyi; ni kwa wundu ghwa makosa ghenyu niko morelegheloghe.

² Kwaki mndungi userekoghe iji nerechieghe? Na kwaki mndungi useredikieghe iji nerewangieghe? Welee, ndighi rapo reepungua nisedimagha kukombua? Angu welee, siwadie ndighi rekira? Olenyi ngaikemia bahari yadaoma; nani nadaomera meda hata andu kwaro kuwuye ikara. Samaki raro rasowa machi naro rafwa kwa kau na kuwoa.

³ Nadaredia mawingunyi wuchilu, hata kukaie sa mundu urwae nguwo ra magunia.”

Kusikira kwa mdumiki wa Mlungu

⁴ Bwana MLUNGU waninekie kudeda malagho gha awo wifundishiro, nipate agho malagho ghemtesia mundu usirilo. Wadaniwusira kula nakesho na kunibonya nisikire malagho gha awo wandu wifundishiro.

⁵ Bwana MLUNGU wanifungue madu ghapo, ngasikira; nani sereleghieghe, hata serewurieghe nyuma anduangi.

⁶ Nerefunyireghe mghongo ghwapo kwa awo wibulagha, na madumbu ghapo kwa awo wererikueghe sombe rapo hata serefueghe waya na kughuvisa wushu ghwapo kwa awo werenichueghe mada.

⁷ Kwa kukaia Bwana MLUNGU wadanitesia, niko niserefueghe waya anduangi ngawuya turugha na kukaia sa igho jikurie nani namanya angu sichaafushwa waya anduangi;

⁸ angu uo unidederiagha oko kaavui. Nani unishitakiagha? Ndewuke kimusi didede. Nani m'maiza wapo aha? Ndesoghode dikwane.

⁹ Olenyi Bwana MLUNGU nuo unitesiagha nani uchaanitala kukaia mkosi? Olenyi wamaiza wapo wose wichasia sa nguwo ijilo ni soya.

¹⁰ Nani aghadi konyu umuobuagha BWANA na kulusikira lwaka lwa mdumiki wake? Uo ughendagha kirenyi andu kuseko na mwengere, nderumirie irina ja BWANA na kukusaghika kwa Mlungu wake.

¹¹ Inyo mmbose m'bonyagha njama retotesha wazima, mchatoteshwa ni njama renyu reni. BWANA moni uchabonya maza iri rikaie nenyo mchapata wasi m'baa.