ISAYA 5 - Biblia Ilagho Jiboie Kwa Wandu Wose

Lumbo lwa mbuwa ya mizabibu

¹ Sikirienyi nim'borie mkundwa wapo lumbo lwa lukundo, aighu ya mbuwa yake ya mizabibu: Mkundwa wapo orekoghe na mbuwa ya mizabibu, aho mghondinyi kuko na ndoe iwurue.

² Oreilimieghe, ukafunya magho gherekoghe, ukawa mzabibu ghuboie; ukaagha mnara ghadi na ghadi ya ndoe, ukakota kina chekamia zabibu, ukaweseria upate zabibu riboie, ela ghukava zabibu ra isakenyi.

³ “Idana tanyenyi ee wandu mkaiagha Jerusalemu na Juda; namlomba mtanye aghadi ya ini na mbuwa yapo ya mizabibu.

⁴ Welee, niki chisigharikie niserechibonyereghe kwa mbuwa yapo ya mizabibu? Iji neresuwirieghe ive zabibu, yakaia wada ikava zabibu ra isakenyi?

⁵ “Idana nichamghoria ijo nichaajibonya kwa mbuwa yapo ya mizabibu. Nichainja isanju japo na wurigha ghwaro, nayo ichajighwa ni nyamandu, na kuiwadia-wadia.

⁶ Nichaisigha inoneke putu, mizabibu ndeichaaboiswa hata kulimilwa; nayo ichabukwa ni isaka na minjwa. Nichalaghira mawingu ghisenyeshe vua ingi aighu yake sena.”

⁷ Wandu wa Israeli niwo iyo mbuwa ya BWANA wa majeshi, na wandu wa Juda niwo ugho mzabibu ghuboie oreghuwaeghe; ukalola kuwona loli ikibonywa, ela wulalo ghwaro ukawona kifwa, ukalola kuwona mabonyo gha hachi, ela wulalo ghwaro ukasikira kililo.

Agho mawiwi wandu wighibonyagha.

⁸ Ni bugha kwa awo wighuagha na kuchuria nyumba aighu ya nyumba, na mbuwa aighu ya mbuwa; hata wandu wazima wisowe andu kokaia, nenyo mchakaia muekeri aghadi ya ijo isanga.

⁹ Bwana waghemie huwu ngisikira, “Loli nyumba nyingi mbaa sena righokie, richasighwa nduu risena wandu wekaia.

¹⁰ Kwa kukaia hekta ikumi ra mbuwa ya mizabibu, ichava lita wunyanya ra divei; na lita ighana na mirongo wunyanya ra mbeu, richava lita ikumi na wunyanya ra viro.”

¹¹ Ni bugha kwa awo wiwukagha kokesho kio wiendewongia; nawo wakaia aho hata kio ghadi, na divei iake modo kifunyi kwawo!

¹² Andenyi ya karamu rawo wawika vinubi, zeze, kayamba, pung'a, na chofi; nawo ndewitalagha mabonyo gha BWANA, hata kazi ra mikonu yake.

¹³ Kwa wundu ugho, wandu wapo wichabarishwa kwa kusowa kumanya kwawo; wandu wawo wa ishima wiafwa kwa njala na wengi wawo wiafwa kwa kau.

¹⁴ Kwa huwo Andu kwa Wafu kwakaia na bea mbaa, kwatambarua momu ghwake kuwimila; wabaa wa Jerusalemu na wandu wawo wengi wasea aho, chiaimweri na wandu wake wengi wizumagha andenyi yaro.

¹⁵ Mdamu uchaserwa, na wandu wichaserwa, na awo wikukasire wichaserwa.

¹⁶ Ela BWANA wa majeshi uchajoswa kwa hachi, na Mlungu uo Mweli wakuwonyera moni kukaia mweli kwa loli.

¹⁷ Niko wana wa ng'ondi wichaja nyasi sa mlambenyi ghwawo, ngache na ndaghina richaja maghachonyi.

¹⁸ Ni bugha kwa awo wirudagha kaung'a na kamba ra mikalo, na wuwiwi sa kuruda na kamba ra magare.

¹⁹ Awo wighambagha, “Ndeshashire kubonya agho ughorie, dipate kuriwona kazi rake; kidali cha Mweli wa Israeli ndechikatie, eri dipate kuchimanya.”

²⁰ Ni bugha kwa awo wighuwangagha wuwiwi wucha, na wucha wuwiwi; awo wiredagha kira wulalo ghwa mwengere, na mwengere wulalo ghwa kira; awo wikuwangagha kuwawa kusinga, na kusinga kuwawa.

²¹ Ni bugha kwa awo wikuwonagha weni kukaia na hikima, wikikuririkanya weni kukaia na suku.

²² Ni bugha kwa awo wiko na wuwana ghonywa divei, sena mang'oni gheranganya chofi;

²³ awo wimlekeriagha mmbiwi angu wawituwa, na kumuima mloli hachi yake.

²⁴ Kwa huwo, sa iji lumu lwa modo lukoragha matasa, na sa iji koni nyasi rimerelwagha ni lumu, ni huwo koni miri yaro ichawoa, na kuboa kwaro kuchadukwa ni mbeo sa teri; kwa kukaia waileghie sharia ya BWANA wa majeshi, na kujimenya ilagho ja Mlungu, Mweli wa Israeli.

²⁵ Kwa wundu ugho, BWANA orejokeloghe ni machu aighu ya wandu wake; ukaghorua mkonu upate kuwikaba, na mighondi ikasughusika; gharia ra awo wifue rikakaia sa wuchafu chienyi. Hata huwo saki machu gha BWANA ndeghisirie, ela mkonu ghwake ghokaba ghoko ghughorokie hata idana.

²⁶ BWANA uchaikunyiria mbari ya wandu iko kula, uchawifughia mori kufuma kutua kwa ndoenyi, na wandu waro wichacha na iseghe shwa-shwa.

²⁷ Ndewisilwagha hata ndewikuwagha, ndewidungumiagha hata ndewilalagha; mkowa ghwa kiwonunyi ndeghufungukagha, hata kamba ya chadu ndeidumbukagha anduangi.

²⁸ Mawanu ghawo ghakalie, na ndana rawo rafungilo; kochokocho ra farasi rawo rakurie sa magho, na magurudumu gha magare ghawo ghiamara sa kikulughulu.

²⁹ Masikari ghawo ghiaruma sa shimba, wiaruma sa shimba ngoo; waruma na kuwada madiwo ghawo, waghiduka, na mndungi ndeuko otesia.

³⁰ Wicharuma ituku jija sa kuruma kwa bahari, na uo uchaazighana uchawona kira na wasi; mwengere ghwaro ghwafinikirwa ni mawingu gharo.