ISAYA 44 - Biblia Ilagho Jiboie Kwa Wandu Wose

BWANA nuo Mlungu uekeri

¹ BWANA waghamba, “Idana sikirenyi ee wana wa Jakobo mdumiki wapo, sikira oho Israeli nerekusaghueghe.

² Ini ne BWANA uo orekuumbieghe, nakuteserie kufuma kuvalwa kwako. Kusakeobua Israeli oho ko mdumiki wapo, wandu wapo niwisaghue, awo niwikundagha.

³ “Nichafunya machi kwa isanga jiomie, na meda ya machi kwa ndoe iomie. Nichadia Roho wapo aighu ya kivalwa chako, na wana wako nichawidiria marasimio ghapo.

⁴ Wichawoneka kara kara na nyasi rizoghuagha andu kwa machi, sa midi izoghuagha mbai mbai ya meda.

⁵ “Na mndumu uchaghora, ‘Ini ne wa BWANA,’ mzima uchakuwanga kwa irina ja Jakobo, umu uchakuandika mkonunyi kwake, ‘Wa BWANA;’ na kukuwanga moni kwa irina ja Israeli.”

⁶ BWANA, Uo Mzuri na Mkomboli wa Israeli, uo BWANA wa majeshi, waghamba, “Ini ne wa imbiri, na wa kutua, ndekuwadie mlungu ungi mzima kuchumba ini anduangi.

⁷ Nani ufwanane nani? Ndewuke ughore; ndeghore worinyi imbiri kwapo. Nani utangazire konkala uko maza richaacha? Ndedighorie iro maza richaakaia.

⁸ Msakeobua, hata msebonye kiture; Welee, simghorieghe kufuma imbiri hata ngamtangazira? Na inyo moko washahidi wapo. Welee, oko Mlungu ungi kunichumba ini? Siichi ungi uko Igho kunichumba Ini.”

Kusekwa kwa wutasi ghwa milimu

⁹ Wandu wose wibonyagha milimu ni wandu wa duu, hata ivo vilambo wikusaghikagha navo ndevina fwaida ingi. Awo washahidi wawo ndewiwonagha hata ndewitambukilwagha; nawo wichafushwa waya.

¹⁰ Nani uo ubonyagha mlungu na kuwacha mlimu ghusewadie fwaida ingi?

¹¹ Olenyi wambao wose wichafushwa waya, mafundi ghawo ni wandu tu. Ndewiche dikwane kwa malagho ghawo, nawo wichaobua na kufwa waya wose.

¹² Mchani chuma wadashoa chuma na kuchikumba andenyi ya maka gha modo, nao wadachichana na nyondo kwa mkonu ghwake ghwa ndighi, hata usilo na kusirilwa ni ndighi, sena waoma, nao ukasowa machi uchadumbuka.

¹³ Na fundi wa mbau wokoni, wadatarua msitari kwa kalamu aighu ya m'bau, nao waghuwacha kwa randa na kughufwananisha na mdamu. Waboisa iyo fwana ighokie ya mdamu, na ugho mlimu waghuwika nyumbenyi.

¹⁴ Mundu uo wadema mudi ghwa sida, angu kusaghua m'beroshi, angu mwaloni na kuisigha izoghuo aghadi ya midi ya msidunyi; na kuwa mudi ghwa sida ukiweseria ghupate vua.

¹⁵ Iyo midi yawuya mbande rekora, na mundu washoa rimu na kukora modo ghooda, na rimu wakora modo ghoocha mikate; washoa kilingo chimu cha mudi na kuwacha mlungu ghwake na kughutasa; wabonya fwana na kuighoghomia.

¹⁶ Nusu ya mudi ghumu wakora modo, na nusu imu wakora modo na kuocha nyama, nao waija na kughuda; wokoni waoda modo ukighamba, “Haa! Naoda modo ngafunya mbeo!”

¹⁷ Kilingo chasigharika wachibonya mlungu, ugho mlimu ghwake: waghughoghomia ukitasa na kulomba ukighamba, “Kunikire, angu oho ko mlungu wapo.”

¹⁸ Wandu awo ndewiichi ilagho jingi, hata ndewimanyagha; kwa kukaia meso ghabwaghilo wisewone, na akili rawo rafue ndewitambukilwagha.

¹⁹ Ndekuwadie mndungi umanyagha, hata ungi utambuagha ughambe, “Nusu ya ughu mudi naghukorieghe, na maka gharo ngaocha nagho mkate, hata nyama wori naocha ngaja; yakaia wada sena nibonye iji ilagho ja wuchafu? Welee, nighoghomie kilingo cha mudi?”

²⁰ Kubonya huwo ni sa kuja ivu tu, walaghashwa ni maghesho gha wukelu; hata ndedimagha kukukira moni, angu kughamba, “Ado ughu mlimu nawuyawadia na mkonu ghwapo ghwa kiwomi wei ni mlungu si tee.”

BWANA, Uo Muumbi na Mkiri

²¹ BWANA waghamba, “Kukumbuke maza iri ee Israeli, kukaia ko mdumiki wapo; nerekuumbieghe kukaie mdumiki wapo, hata sichaakuliwa anduangi.

²² Namerie kuinja makosa ghako sa iwingu, na kaung'a rako sa ikungughu; wuya kwapo, kwa kukaia namerie kukukombua.”

²³ Borenyi ee mlungunyi, kwa kukaia BWANA wameria kujibonya ilagho ijo; wusirenyi chwaka renyu inyo andu kumilie kwa ndoenyi; na inyo mighondi borenyi kwa kuboilwa, ee, na kula mudi ghwa msidunyi ndeghubore, kwa kukaia BWANA wameria kumkombua Jakobo nao uchakaswa andenyi ya Israeli.

²⁴ BWANA, uo Mkomboli wako, uo orekuumbieghe kufuma kifunyi waghamba huwu: “Ini ne BWANA, uo oreumbieghe vilambo vose, uo oreumbieghe na kuwika mlungunyi na ndoenyi. Nani derekwanyeghe ngibonya agho malagho?

²⁵ Ni ini nifunukuagha tee ra walaghui, na kuwimenya awo walodi wa tee; ni ini niwighaluagha awo wiwadie hikima, na kubonya kumanya kwawo kuwue duu.

²⁶ Nadakatisha ilagho ja mdumiki wapo, na kukatisha njama ra wadumwa wapo. Nadazera Jerusalemu, ‘Kuchakailwa ni wandu,’ na mizi ya Juda, ‘Kuchaaghwa na maghacho ghako ghichawusirwa.’

²⁷ Ni ini nizeragha bahari ‘Oma; nichaiomera meda yako.’

²⁸ Ni ini nimzeragha Koreshi, ‘Oho kuchabonya nguma kwa wundu ghwapo, na oho kuchakatisha makusudi ghapo;’ ngighuzera muzi ghwa Jerusalemu, ‘Kuchaaghwa; na misingi ya Hekalu ichaaghwa.’”