ISAYA 38 - Biblia Ilagho Jiboie Kwa Wandu Wose

Wukongo ghwa Mzuri Hezekia na kuboa kwake

¹ Matuku agho, Mzuri Hezekia ukawuya mkongo kaavui na kufwa. Mlodi Isaya mwana wa Amozi ukacha na kumzera, “BWANA waghamba, kuboise maza ra nyumbenyi kwako, kwa kukaia ndekuchaaboa kungi, ela kuchafwa.”

² Hezekia ukaghaluka cha wurighenyi, ukamlomba BWANA

³ ukighamba, “Nakulomba idana ee BWANA, kunikumbuke seji nighendie nicha imbiri kwako, kwa wuloli ghose, na kwa ngolo yose, ngibonya agho ghikuboiagha oho.” Hezekia ukalila nandighi.

⁴ Niko BWANA ukaghora na Isaya

⁵ ughende umzere Hezekia kukaia, BWANA, uo Mlungu wa ndee Daudi waghamba, “Nasikira malombi ghako, na kuwona mbori rako; nao ola nichaghichuria matuku ghako miaka ikumi na misanu.

⁶ Nichakukira na kughulindia muzi ughu ghusekabo ni mzuri wa Waashuru.

⁷ “Na alama ewonyera kukaia nichakatisha ilagho ijo ni ihi:

⁸ Nichawunja kirerendi cha ngazi ereaghiloghe ni Ahazi milambo ikumi.” Niko iruwa jikawuya nyuma milambo ikumi.

Lumbo lofunya chawucha

⁹ Nao nyuma ya Hezekia kuboa, ukaandika malagho gha lumbo ulu lofunya chawucha:

¹⁰ Nereghambieghe wei niafwa mkoo, nani nichaghenda Andu kwa Wafu, na kukaia aho matuku ghapo ghisigharikie.

¹¹ Neregheshereghe sichaammbona BWANA kwa ijo isanga ja awo wiko moyo; neregheshereghe sichaawiwona wandu sena, hata sichaakaia aghadi ya wandu wiko wurumwengunyi.

¹² Wulalo ghwapo ghwainjwa kufuma kwapo karakara na hema ya mlisha, nadumbulwa karakara na nguwo idumbulwagha ni uo uilukagha, kula dime na kio kwanisoghora kaavui na kutua kwapo.

¹³ Nakema ngilola wutesia hata nakesho; wachikanya maindi ghapo karakara na shimba, kula dime na kio kwanisoghora kaavui na kutua kwapo.

¹⁴ Nakema karakara na mbeumbeu angu ichachula; nashononia karakara na mbughi. Meso ghapo ghasilwa kwa kuzighana nokoighu. Ee BWANA, nakorongeka, kaia mlindiri wapo.

¹⁵ Ela nighora wada? Uo wameria kunighoria, na nuo moni wabonya ilagho iji. Nichaghenda mboa-mboa irangi japo jose kwa wundu ghwa luwawo lwa roho yapo.

¹⁶ Maza iri radawipata wandu wose, na huwu niko nikaiagha moyo andenyi yaro; kuniboise na kunikaisha moyo ee Bwana.

¹⁷ Ola wasi ghwapo ghwaniredia mecha; kwa kunikunda, kwanilindirie nisechunuke andenyi ya kina cha kunoneka, kwa kukaia kwainjire kaung'a rapo rose kuseriwoneghe.

¹⁸ Andu kwa Wafu ndekudimagha kukufunyira chawucha, hata kifwa ndechidimagha kukukasa oho; na awo wiseagha kinenyi ndewidimagha kughurumiria wuloli ghwako anduangi.

¹⁹ Uo uko moyo nuo uchaakukasa oho, ee, uo uko moyo nuo uchaakukasa kara kara na ini idime. Wana wadaghorelwa wuloli ghwako ni weke ndee.

²⁰ BWANA uchanikira, nesi dicham'boria makaso kwa zeze andenyi ya Hekalu yake; dicham'boria matuku ghose gha marangi ghedu.

²¹ Isaya orekoghe waghamba huwu, “Boisenyi mkate ghwa tini, mughukande aho mzuri ubukilo ni kindo, nao uchaboa.”

²² Oremzerieghe huwo, kwa kukaia Hezekia orelombieghe alama emmbonyera kukaia uchajoka Hekalunyi kwa BWANA.