ISAYA 37 - Biblia Ilagho Jiboie Kwa Wandu Wose

Mzuri kumlomba Isaya njama

¹ Nyuma ya Mzuri Hezekia kusikira malagho ghawo, ukarashua nguwo rake kwa wasi, ukakurusha nguwo ra magunia, na kughenda Hekalunyi kwa BWANA.

² Ukawiduma Eliakimu uo orekoghe m'baa wa nyumba ya mzuri, na Shebna uo orekoghe muandiki na wakohani wabaa wirwae nguwo ra magunia, wighende kwa Isaya mwana wa Amozi.

³ Wikaghenda na kumzera, “Hezekia waghamba, ‘Idime ni ituku ja wasi, na kurashwa, na kusowelwa ishima; wana wakaia tayari kuvalwa ela ndighi rekumba lufu nderiko.

⁴ Kewada BWANA Mlungu wako wameria kusikira malagho ghaghorwa ni Rabshake agho wadumwa ni bwana wake mzuri wa Waashuru, ghemsholia Mlungu uko moyo; nao ughikemie agho malagho ghake. Kwa huwo, kumlombe Mlungu kwa wundu ghwa masighariko gha wandu wisigharikie.’”

⁵ Nao iji awo wabaa wa kazi wa Mzuri Hezekia wacha kwa Isaya,

⁶ Isaya ukaghamba, “Mzerenyi bwana onyu huwu, BWANA waghamba, ‘Kusakeobua kwa wundu ghwa agho malagho kwaghisikira seji nasholelwa ni wadumiki wa mzuri wa Waashuru.

⁷ Ola nichamngiria roho esikiria na kurumiria malagho gha tee, nao uchawuya isangenyi kwake, na aho uchabwaghwa kwa lufu.’”

Waashuru kukumba wandu wa Jerusalemu wowa sena

⁸ M'baa wa Waashuru ukasikira kukaia mzuri wafuma Lakishi kwendalwa na muzi ghuko kaavui ghwa Libna; ukaghenda kumlomba njama.

⁹ Malagho ghikawivikia Waashuru kukaia majeshi gha Misri ghawuyalongozwa ni Mzuri Tirhaka wa Ethiopia, ghawuyacha kulwa nawo. Mzuri uendasikira huwo, ukaduma barua kwa Mzuri Hezekia

¹⁰ wa Juda kumzera, “Uo Mlungu kwawuyamrumiria wei wakuzerie kedi ndekuchaangia mikonunyi kwapo kungi usekukalie.

¹¹ Kwamerie, kusikira seji mzuri wa Waashuru ubonyagha kwa kula isanga ukundagha kujitotesha. Welee, oho kufufunuka?

¹² Kokala wandu wapo weretoteshereghe mizi ya Gozani, Harani, na Rezefu; ukabwagha wandu wa Beth-edeni werekoghe Telasa, na milungu yawo ingi ndeerewikirieghe anduangi.

¹³ Weko hao wazuri wa mizi ya Hamathi, Arpadi, Sefavaimu, Hena na Iva?”

Ilombi ja Hezekia

¹⁴ Hata iji Mzuri Hezekia waiwada iyo barua kufuma kwa wadumiki wa mzuri wa Waashuru, ukaishoma. Niko Hezekia ukaghenda Hekalunyi kwa BWANA na kuiwika iyo barua imbiri ya BWANA;

¹⁵ ukamlomba BWANA ukighamba,

¹⁶ “Ee BWANA wa majeshi, Mlungu wa Israeli, kukaiagha aighu ya kifumbi cha nguma naighu ya makerubi; ni oho kuekeri Mlungu kuko aighu ya mawuzuri ghose gha ndoenyi, na ni oho kuumbie mlungunyi na ndoenyi.

¹⁷ Degha madu ghako ee BWANA, kusikire madedo ghose gha Senakeribu ghekusholia oho Mlungu kuko moyo; zighana kuwone ee BWANA seji wawuyabonya.

¹⁸ Kwa loli mzuri wa Waashuru wakabie mbari rose ra wandu na masanga ghawo;

¹⁹ nao wakorie milungu yawo nayo ni kazi ya mikonu ya wadamu, ya midi na magho; niko oredimieghe kuinona.

²⁰ Kwa huwo idana ee BWANA Mlungu odu, kudikire usedikabe, eri mawuzuri ghose gha ndoenyi ghipate kumanya kukaia ni oho kuekeri kuko BWANA.”

Wudumwa ghwa Isaya kwa Mzuri

²¹ Nao Isaya mwana wa Amozi ukaduma malagho kwa Mzuri Hezekia kunughana na malombi ghake ukighamba, “BWANA uo Mlungu wa Israeli waghamba huwu: Kwa kukaia kwanilomba ini aighu ya madedo gha Senakeribu mzuri wa Waashuru,

²² ilagho japo jetumbulia aighu yake ni iji: ‘Muzi ghwa Jerusalemu ghwakuseka na kukumenya; ghwaawuyakunugha ghukikusughusira chongo.

²³ Nani kusindemmenya na kumsholia? Nani kusindemdokia-dokia huwu? Nani kusindemzighana kwa lumenyo? Kodeeka kukinibonyera huwo ini Mlungu, Mweli wa Israeli!

²⁴ Kwadumie wadumiki wako winiseke ini BWANA, kukaghora wei kwajokie mighondinyi na magare ghako; kukajoka hata koigu Lebanoni, kukaghusha iyo misida yake milacha na iyo misumbesu yake iboie; kukajoka hata andu kwaro kwa ighu hata kondenyi msidunyi ghwake ghukambie.

²⁵ Kwaghambie wei kwakotere visima kukanywa machi, na kedi kwawadirie isanga ja Misri hata kukaomera meda yose kwa maghu ghako.

²⁶ “‘Wele ndekusikire kukaia iri maza nederipanga kokala? Maza rawuyabonyeka idana nederipanga matuku gha kala, kukaia kucharichikanya ngome ra mizi na kuribonya riwuye vitungu va kunoneka kwaro;

²⁷ ingelo wandu waro wichaasirilwa ni ndighi rawo na kuobua, wikikaia tu sa nyasi na miwalwa ya mbuwenyi, kara kara na nyasi ribukie aighu ya nyumba, riomagha shwa nyuma ya kubuka.

²⁸ “‘Ini naichi kuwuka kwako na kusea kidombo kwako, naichi kufuma kwako sena naichi kungia kwako na seji kukaiagha na makai nani.

²⁹ Oho kwawuyakaia na makai nani, na kukukasa kwako nakusikire, nichangira koleo mbuonyi kwako, na lijamu momunyi kwako, nani nichakughalua kuwurie ija chia cheni korechieghe.’”

³⁰ Isaya ukamzera Hezekia, “Ihi niyo ichaakaia alama yako: Mwaka ughu na ghuja ghuchagha mchaja ivo vindo vichaabuka veni; niko mwaka ghwa kadadu mchaawa mizabibu na kuikuwida.

³¹ Na agho masighariko gha wandu wa Juda ghichachurikia seji mudi ghuseragha miri na kuva matunda naighu.

³² Huwo kuchakaia na masighariko gha wandu kufuma Jerusalemu, ee, kufuma Mghondi ghwa Sioni, kuchakaia na masighariko gha wandu. BWANA wa majeshi uchabonya huwo, kwa wundu ghwa iriso uko najo.

³³ “Kwa huwo, BWANA waghora huwu aighu ya mzuri wa Waashuru: ‘Ndechaacha andenyi ya muzi ughu, hata ndechaakumba iwanu aho, angu kucha na ngao, hata ndechaaghurughaia.

³⁴ Ela uchawuya kwa ija chia cheni orechieghe nayo, hata ndechaangia andenyi ya muzi ughu, waghamba BWANA.

³⁵ Kwa kukaia nichaghulindia muzi ughu na kughukira kwa wundu ghwapo na kwa wundu ghwa mdumiki wapo Daudi.’”

³⁶ Nao malaika wa BWANA ukaghenda kambinyi ya Waashuru, na kuwibwagha wandu elfu ighana na mirongo wunyanya na wasanu. Hata iji wandu werewukieghe nakesho, wikakua awo wandu wose wifue.

³⁷ Niko Senakeribu mzuri wa Waashuru, ukafuma na kughala; ukakaia Nineve.

³⁸ Nao iji orekoghe ukitasa andenyi ya nyumba ya mlungu ghwake Nisroki, wana wake wa womi Adrameleki na Shareza, wikam'bwagha kwa lufu, na kukimbia cha isanga ja Ararati. Mwana wake Esarhadoni ukabonya nguma wulalo ghwake.