ISAYA 32 - Biblia Ilagho Jiboie Kwa Wandu Wose

Wuzuri ghwa hachi

¹ Ngelo ichacha, mzuri uchaabonya nguma kwa hachi, na wabaa wibonye nguma kwa hachi.

² Kula umu wawo uchawuya andu kokimbiria ngelo ya kiremba, kituwirio ngelo ya kikulughulu; wichakaia sa ndoria ra machi ikarenyi na kiju cha igho ibaa andenyi ya isanga jiomie.

³ Niko meso gha awo wiwonagha ghisechaatungurishwa sena, na madu gha awo wisikiragha wichaasikira.

⁴ Awo widumbuagha malagho shwa-shwa wichanekwa hikima etanya; na awo wighughumiagha, wichadeda malagho nicha.

⁵ Mkelu ndechaawangwa mundu wa akili, na wandu wa kisha-kisha ndewichaawangwa wandu wa ishima.

⁶ Mkelu wadadeda wukelu ghwake, na maghesho ghake ghadakaia aighu ya wuwiwi. Wadamsholia Mlungu na kuwisigha awo wisewadie vindo wikaie njala na awo wisewadie machi wikaie kau.

⁷ Mundu wa mikalo ni mmbiwi, wadaghesha malagho gha wuwiwi, upate kumkita mkiwa kwa mikalo yake, hata ngera malombi gha uo mkiwa ni gha hachi.

⁸ Ela mundu mucha wadafunya maghesho mecha, nao wadakaia kwa agho ghiko mecha.

Waka wa Jerusalemu

⁹ Wukenyi inyo waka mwawuyasea kidombo kiduu munisikire; inyo wai mwawuyakuhoresha nideghienyi madu ghenyu.

¹⁰ Kwa ngelo vui isevikagha mwaka mlazi, mchasughusika kwa wowa inyo waka mkunde kukuhoresha, kwa kukaia mizabibu yenyu ndeichaafunya mavalo hata ndemchaapata matunda ghangi gha zabibu.

¹¹ Kwa huwo, sughusikenyi inyo waka mwawuyasea kidombo kiduu mkikuhoresha; obuonyi inyo waka mkunde kukuhoresha; ruonyi nguwo renyu msigho duu, na kukufunga nguwo ra magunia viwonunyi konyu kwa wasi.

¹² Mkukabe-kabe laghenyi konyu kwa wundu ghwa mbuwa renyu rinorie na mbuwa renyu ra mizabibu ivae rimerie kunoneka.

¹³ Mbuwa ra wandu wapo rabukilo ni minjwa na mndandangoma, ee, mrililie na nyumba renyu rerechuloghe ni kuboilwa andenyi ya muzi ghwa maseko.

¹⁴ Kwa kukaia ngome ya mzuri ichasighwa, na wandu werechueghe ugho muzi kukimbia. Mghondi na minara ya walindiri ichakailwa ni nyamandu kwa kala na kala, kuchawuya andu kuboie kolishira weke punda na mfugho.

¹⁵ Maza richakaia huwo hata Mlungu udie Roho wake aighu kodu, na kireti chiwuye mbuwa inorie na kubusa vindo vingi sa msidu.

¹⁶ Aho niko hachi ichakaia kireti, andenyi ya iyo mbuwa ivagha matunda.

¹⁷ Kazi ya hachi ichakaia kureda sere, nayo ichareda wumboa na kurumirikia kwa kala na kala.

¹⁸ Wandu wapo wichakaia nicha isangenyi, na nyumba rawo richakaia na sere, andu kuhorie kwa kima.

¹⁹ Ela vua ya magho ichanona ugho msidu na muzi ghuchanoneka.

²⁰ Mwarasimilwa inyo mchaawa vindo mbai na mbai ya meda ya machi, na kulisha mfugho na weke punda kwa wuhuru.