ISAYA 31 - Biblia Ilagho Jiboie Kwa Wandu Wose

BWANA kuilindia Jerusalemu

¹ Ni bugha kwa awo wiseagha cha Misri kulola wutesia, na kukusaghika na farasi na magare ghawo gha wuda wei angu ghiko mengi, na wajoki farasi wei angu wiko na ndighi; nawo ndewikusaghikagha na Mlungu, Mweli wa Israeli, hata kulola wutesia kwa BWANA anduangi.

² Na uo nuo uwadie hikima, nuo utoteshagha. Uo ndeghalusagha malagho ghake, ela uchawikaba awo wibonyagha wuwiwi, na awo wiwitesiagha wabonyi kiwiwi.

³ Wamisri ni wadamu tu si Mlungu kungi; farasi rawo ni nyamandu riko na mimbi, si roho ringi. BWANA ukaghorua mkonu ghwake, mbari ya wandu iwadie ndighi ichakuwa, na iyo mbari yaawuyateselwa ichaghwa; na huwo wose wichatota.

⁴ BWANA wanizerie huwu, “Sa iji koni shimba angu mwana wa shimba wirurumagha wikilindia madiwo ghawo, wiseturuswagha ni chwaka ra walisha wengi, angu kuoboshwa ni ndoghoi rawo, niko koni na BWANA wa majeshi uchaasea kubonya wuda kulindia Mghondi ghwa Sioni.

⁵ Seji nyonyi ichimariagha kijungu chiko na wana wake, ni huwo koni BWANA wa majeshi uchaaghulindia muzi ghwa Jerusalemu. Uchaghulindia, ughukire na kughuvuvua.”

⁶ Mmburienyi Mlungu uo mumleghie nandighi ee wandu wa Israeli.

⁷ Kwa kukaia ngelo ichavika, na kula umu onyu uchaida milimu yake ya feza na ya dhahabu moreibonyereghe kwa wundu ghwa kaung'a renyu.

⁸ Ashuru ichanonwa kwa lufu luseko lwa kidamu, ee, uchamerelwa ni lufu luseko lwa kidamu; Waashuru wichakimbia kufuma wudenyi, na wana wawo wichadumikishwa kwa ndighi.

⁹ M'baa wake uchakimbia kwa wowa, na wabaa wawo wa kazi wichakimbia kwa wowa na kuisigha bendera yawo. Agho ghaaghorwa ni BWANA uo modo ghwake ghuakagha Sioni na iwiwi jake jikaiagha Jerusalemu.