ISAYA 3 - Biblia Ilagho Jiboie Kwa Wandu Wose

Ndasanya Jerusalemu

¹ Olenyi Bwana, uo BWANA wa majeshi, uchainja kula kilambo chisuwirilwagha ni wadamu, kufuma Jerusalemu na kufuma Juda; ikaiagha ni vindo, ikaiagha ni machi.

² Uchainja wandu wabaa, na masikari; watanyi, na walodi; walaghui, na waghosi.

³ M'baa wa masikari mirongo misanu, na mundu uko na daraja mbaa; mnjama na msawi uwadie wuya, na mundu uichi kubonya mbingu.

⁴ BWANA uchawibonya wadawana wikaie vilongozi vawo; na wanake watini wichawibonyera nguma.

⁵ Wandu wichakorongana weni na weni, kula mundu na mmbao, na kula mundu na mmbenyu; wandu wa irika ndewichaawitala waghosi, na awo wa ndonyi ndewichaawitala wabaa.

⁶ Ngelo iyo, mundu uchammbwada mruna nyumbenyi kwawo umzere, “Kwa kukaia oho koko na marwao, kuchadilongoza; na andu aha kunonekie kuchakaia aisi ya wulongozi ghwako.”

⁷ Nao uchatumbulia, “Sidimagha kukaia mtesia onyu, kwa kukaia siwadie vindo hata nguwo nyumbenyi kwapo, kwa huwo msenibonye kilongozi chenyu.”

⁸ Jerusalemu yamerie kukuwa, Juda yamerie kughwa; kwa kukaia madedo ghawo na mabonyo ghawo ni ghelwa na BWANA, nagho ghanona wubaa ghwake.

⁹ Kuzighana kwawo kwawishuhudia, wafunukua kaung'a rawo worinyi sa wandu wa Sodoma. Ni bugha kwawo, kwa kukaia wakuredia weni wuwiwi aighu yawo.

¹⁰ Wizerenyi wahachi kukaia maza rawo richakaia nicha, angu wichaja matunda gha mabonyo ghawo.

¹¹ Ni bugha kwa mmbiwi angu uchapatwa ni mawiwi, nao uchalipwa kara kara na kazi rake.

¹² Wandu wapo wadakorongwa ni wana, na waka wadawibonyera nguma. Ee wandu wapo, mwaawuyalaghashwa ni vilongozi venyu, na kuvurugha chia ra mighendo enyu.

BWANA kutanya wandu wake

¹³ BWANA wakaia tayari kureda mashitakio ghake, wakaia tayari kuwitanya wandu wake.

¹⁴ BWANA wawitanya waghosi, na wabaa wa wandu wake wawizera, “Ni inyo mjie mbuwenyi ra mizabibu, vindo muwisokie wakiwa veko nyumbenyi konyu.

¹⁵ Yakaia wada inyo kuwiwonia wandu wapo na kuwikita wakiwa? Ini BWANA Mlungu wa majeshi naghamba.”

Maonyo kwa waka wa Jerusalemu

¹⁶ BWANA ukaghamba, “Waka wa Jerusalemu wakukasa, wikighenda na singo righorokie, wikizighana na meso ghiko na bea, wikighenda wikukasire, na njugha rikideda maghunyi kwawo,

¹⁷ ini BWANA nichawikaba wai wa Jerusalemu na fwali ra chongo, na kughufunukua wuduu ghwawo.”

¹⁸ Matuku agho, Bwana uchawiinjira waka wa Jerusalemu vilambo vose wikukasagha navo: njugha riko masafionyi ghawo, mizaza ya maridia, mikufu yawo ya singonyi,

¹⁹ vipuli vawo, bangili rawo, vitambaa va chongo,

²⁰ kofia rawo, vikuku, mishipi, visanduku va marumba, mbingu,

²¹ pete ra vala, na pete ra mbua,

²² nguwo ra ndima, nguwo rekumba, majoho, na mifuko ya vala,

²³ marinda gha mala-mala, marwao gha kitani, viremba, na vitambaa vekufinikira wushu.

²⁴ Wulalo ghwa marumba mecha, kuchakaia kunuka kiwiwi; wulalo ghwa mshipi, kuchakaia kamba; wulalo ghwa iridia jilukilo nicha, kuchakaia kukangaluka; wulalo ghwa nguwo iboie, kuchakaia nguwo ra magunia; wulalo ghwa kughoka, kuchakaia kuzama.

²⁵ Wandu wenyu wa womi wichabwaghwa kwa lufu; na wandu wenyu mang'oni wichabwaghwa wudenyi.

²⁶ Mbenge ra muzi ghwa Jerusalemu richalila na kukema mchungu; na muzi ghuchakaia sa muka wasea kidombo wasighwa duu.