ISAYA 28 - Biblia Ilagho Jiboie Kwa Wandu Wose

Maonyo kwa wuzuri ghwa Israeli ghwa kaskazinyi

¹ Ni bugha kwa wuzuri ghukukasire ghwa Israeli! Wubaa ghwaro ghwaawuyaida sa kirumbu cha mboi chiko vongonyi kwa vilongozi viwongiagha. Wakukasa kwa kukushinga marumba vongonyi kwawo, ela waawuyabwaghwa ni chofi.

² Olenyi BWANA oko na mundu umu wake uko ing'oni jiwadie ndighi; uchagha kuwikaba sa kiremba cha vua ya magho inonagha, karakara na kiremba kibaa chiwadie ndighi na machi mengi ghidikagha kwa wungi na kuidwa ndoe.

³ Nao uchawadia na maghu ghake ugho wuzuri ghukukasire ghwa wawongeri wa Israeli;

⁴ na ugho wubaa ghwa vilongozi wikukasire, ghuchaida sa itunda ja imbiri ja mtini jawurwa imbiri ya sumesu, na mundu ukajiwona wadajija shwa wori nyuma ya kujiwaya.

⁵ Ngelo iyo, BWANA wa majeshi uchawuya nuo kirumbu cha wubaa, na kiremba chiboie kwa masighariko gha wandu wake;

⁶ na roho ya hachi kwake uo utanyagha, na ndighi kwa walindiri wilindiagha mbenge ya muzi isewado ni wandu wa wuda.

Isaya na walodi wa Juda wiwongiagha

⁷ Mkohani na mlodi nawo wori wakaia wawongeri wetatarika kwa divei na chofi ibirie, walaghashwa ni ugho wuwongeri ghwa divei na kutatarishwa ni chofi ibirie, na kusowa mafunuo, nawo walaghalwa ni kutanya hachi.

⁸ Meza rose rachulwa ni madaika, hata ndekuwadie andu kungi kuseko na wuchafu.

⁹ Wanideda wikighamba, “Uhu ufundisha ani? Ughoria ani malagho ghake? Ni wana wisighishiro mariwa kafwani?

¹⁰ Waawuyadifundisha sharia aighu ya Sharia na msitari aighu ya msitari; katini aha na katini aja.”

¹¹ Mkalegha kunisikira, Mlungu uchatumia waghenyi kudedanya nenyo wipate kumfundisha.

¹² Nao wamnekie inyo mmbose kuhora na raha, ela mkalegha kumsikira.

¹³ Kwa wundu ugho ilagho ja BWANA jichakaia konyu. Sharia aighu ya sharia, na msitari aighu ya msitari; katini aha na katini aja; mpate kughenda na kughwa, mchike, mmbwado ni mdegho na kudwalwa wunyika.

Igho ja mbembenyi kwa wundu ghwa Sioni

¹⁴ Sikirenyi ilagho ja BWANA inyo wandu mmenyagha; inyo muwibonyeragha nguma wandu wiko Jerusalemu!

¹⁵ Kwa kukaia mwaghambie, “Isi dabonyere malaghano na kifwa, dabonyere mapatano na Andu kwa Wafu, hata ikabo jibirie jikadichea, ndejidipatagha. Kwa kukaia dakusaghikie na tee, na kukuvisa na wuwiwi.”

¹⁶ Kwa huwo Bwana MLUNGU waghora huwu, “Olenyi nawika igho Sioni, kwa wundu ghwa msingi, ni igho ja mbembenyi jitimilo jiko ja zoghori mbaa kwa wundu ghwa msingi ghumange, jiandikilo, ‘Uo urumiriagha, ndechaafushwa waya anduangi.’

¹⁷ Nichaibonya loli kukaia kamba epimia na hachi ikaie timazi. Vua ya magho ichainja iyo tee mwawuyaisuwiria, na machi ghichadwa agho mwawuyaghisuwiria.”

¹⁸ Niko malaghano moreghibonyereghe na kifwa ghichainjwa, na mapatano moreghibonyereghe na Andu kwa Wafu ndeghichaadua. Ngelo ijo ikabo jibirie jichaakaia jikiida noko, jichamkaba.

¹⁹ Kula ngelo jichaakaia jikiida, jichamsima; angu jichaida kula nakesho, nadime hata nakio; nenyo mchalemwa ni kumanya shekeria yaro ijo ikabo jeobosha kumchea.

²⁰ Mchakaia sa mundu ulaliagha wuli mvui nandighi usekatagha, na karakara na mundu ukufinikiragha kipako cha shuka suse nandighi isemkatagha.

²¹ Angu Mlungu uchawuka kulwa, seji orelueghe Mghondi ghwa Perazimu; uchajokwa ni machu seji gheremjokieghe aja vololonyi ya Gibeoni; upate kubonya kazi rake ra mashiniko! Uchabonya kazi rake naro ni kazi ra kighenyi.

²² Kwa huwo msakesekaseka, vifungo venyu vichezutirilwa; kwa kukaia nasikire matangazo gha kunoneka ghifumagha kwa BWANA MLUNGU wa majeshi, kuchaawivikia wandu wa isanga jose.

Hikima ya Mlungu

²³ Deghenyi madu msikire lwaka lwapo; sikirienyi agho nighoragha.

²⁴ Welee, uo ulimagha eri upate kuwa mbeu wadalima ngelo rose? Welee, uchakaia ukiibubula ndoe ngelo rose?

²⁵ Nechi wei ukameria kuibubula ndoe wadaawa mbeu ra soko, na jira, na kuwa ngano kwa msitari, na shairi kwa wulalo ghwawo, na mbeu ra kula mbari.

²⁶ Kwa kukaia mundu uo wafundishiro nicha; Mlungu wake nuo umfundishagha.

²⁷ Soko nderichanwagha na mtalimbo hata bizari kuifasha na igare ja ng'ombe, ela soko radakabwa na kamudi, na bizari yadakabwa na zobo.

²⁸ Huwo koni mundu ndekabagha ngano yake ngelo rose sa kuinona, ela uo waichi kuikaba hata kwa igare ja farasi kuseko na kuinona ndembe raro.

²⁹ Na hikima ihi yose yadafuma kwa BWANA wa majeshi. Njama rake ni ra mashiniko richuagha hikima ndicha.