ISAYA 26 - Biblia Ilagho Jiboie Kwa Wandu Wose

Lumbo lwa kuzuma

¹ Ngelo iyo, wandu wa isanga ja Juda wichabora lumbo ulu: Deko na muzi ghumange, Mlungu waghuwikia kukia kwake sa ngome imange.

² Rughuonyi mbenge raro, eri iyo mbari ya hachi, iyo ijiwadiagha ijo irumirio, ipate kungia.

³ Uo mundu nia yake uimangishire kwako ee Mlungu, kwadammbika andenyi ya sere ikatie; angu wakurumiria oho.

⁴ Kumrumirie BWANA matuku ghose, angu BWANA MLUNGU ni mbanga ya kala na kala.

⁵ Kwa kukaia wamerie kuwisera awo wandu werekukasireghe; ugho muzi ghorekujosereghe waghuserie hata andoenyi, ukaghusera hata terinyi.

⁶ Maghu ghawadia ugho muzi, agho maghu gha wakiwa, milambo ya wandu wisewadie kindo chingi.

⁷ Chia ya mundu wa hachi yaghokie, Oho Mlungu kwadaidenderesha chia ya mhachi.

⁸ Dakuweseria oho ee BWANA andenyi ya chia ya kutanya kwako; bea ya ngolo redu ni kujikumbuka irina jako.

⁹ Ngolo yapo yakaia na bea na oho ngelo ya nakio, roho yapo kondenyi kwapo yakulola kwa kufunga ndighi. Angu iji kutanya kwako kuko ndoenyi, wandu wiko wurumwengunyi wakufundisha kubonya hachi.

¹⁰ Mmbiwi ukadawirilwa ndechaakufundisha hachi; uchabonya mawiwi andenyi ya isanga jiko icha, hata ndewonagha ugho wubaa ghwa BWANA.

¹¹ Mkonu ghwako ghwawusirwa ighu ghukabe ee BWANA, ela ndewighuwonagha. Ndewiwone kufunga ndighi kwako kwa wundu ghwa wandu wako, wipate kufwa waya. Modo ghuwikilo kwa wundu ghwa wamaiza wako, ndeghuwimerie.

¹² Kuchaiwika sere ndoenyi kwa wundu ghodu ee BWANA, oho kwamerie kudiboisira kazi redu.

¹³ Hata ngera dabonyero nguma ni weke bwana wazima ee BWANA Mlungu odu, ela isi daawuyarumiria andenyi ya irina jako jiekeri.

¹⁴ Awo wamerie kufwa, ndewichaakaia moyo; wamerie kuwuya visuka ndewichaawuka, Oho kwamerie kuwikaba na kuwinona, ndewichaakumbukwa sena anduangi.

¹⁵ Ela oho kwamerie kuchuria iyo mbari ya wandu ee BWANA, kwamerie kuchuria iyo mbari yedu; kwamerie kuichura mano yedu na idana kwaawuyakaswa.

¹⁶ Werekulolieghe ngelo ya wasi ghwawo; iji korewikabieghe, wikareda malombi kwako, ee BWANA.

¹⁷ Derekoghe karakara na muka uko na kifu, ukumbagha lufu ngelo yake yavika; huwo niko derekoghe kwa wundu ghwako ee BWANA.

¹⁸ Derekoghe karakara na muka uko na kifu, na ngelo ya kukufungua ivika, ndederevaeghe kindo chingi. Ndediredie kukia kungi ndoenyi, hata ndediwisimie awo wandu wiko ndoenyi anduangi.

¹⁹ Wafu wako wichakaia moyo, mimbi yawo icharuka. Inyo wandu mkaiagha makaburinyi; wukenyi mmbore kwa kuboilwa! Kwa kukaia mami ghako BWANA ni gha mwengere; nagho kuchawinyeshera awo wafu wifue kokala.

Kutanywa na kuwunjwa

²⁰ Choonyi wandu wapo, mngie vumbenyi konyu; mrughe minyango na kukuvisa kwa kapindi; hata agho machu ghameria kusia.

²¹ Olenyi BWANA uacha shwa-shwa kufuma andu kwake; upate kuwikaba wandu wiko ndoenyi, kwa wundu ghwa kaung'a rawo; ndoe ichaifunukua iyo bagha erediriloghe aighu yaro, hata ndeichaawivisa awo werebwaghiloghe anduangi.