ISAYA 25 - Biblia Ilagho Jiboie Kwa Wandu Wose

Lumbo lwa makaso

¹ Ee BWANA, oho ko Mlungu wapo; nichakukuma na kujikasa irina jako, angu oho kwabonya maza ra mashiniko, na mipango ya hachi na loli koreibonyereghe kokala.

² Kwaghubonyere muzi kuwuya kitungasi, na kurinona iro ngome; ngome ya waghenyi ndeiduagha sena, ndeichaaghwa sena anduangi.

³ Kwa wundu ugho, wandu wiwadie ndighi wichakukasa oho; mizi ya wandu wa mbari ring'etere ichakuobua.

⁴ Oho korekoghe ngome imange kwa mkiwa, ngome imange kwa uo orekoghe wasinyi kwa kusowa; kituwiro kwa wundu ghwa kiremba, na kiju kwa wundu ghwa mruke; angu kukaba kwa mng'eti ni karakara na kiremba chikabagha wurigha,

⁵ karakara na mruke ghwa andu kuomie. Oho BWANA kwawinyamirisha awo wamaiza; seji mruke ghuhoreshwagha ni kiju cha marundu, huwo koni iro ndoghoi ra wang'eti kwarinyamirisha.

Mlungu kubonya karamu

⁶ BWANA wa majeshi uchawibonyera karamu wandu wose aighu ya ughu mghondi; karamu ya manori, karamu ya divei ieresero irudie nicha, na vindo vicha vichulo ni manori.

⁷ Uchainja wasi ghorewipatireghe wandu wose aighu ya mghondi ughu, agho matiriro gherekoghe na wandu wa mbari rose.

⁸ Bwana MLUNGU uchachiinja kifwa kwa kala na kala, nao uchariaghia mbori rose mesonyi kwawo, na kughiinja masholio gha wandu wake ndoenyi kose; kwa kukaia BWANA wajighora ilagho iji.

⁹ Ngelo iyo, wandu wichaghora, “Olenyi uhu nuo Mlungu odu derekoghe dikimmbeseria upate kudikira. Uhu nuo BWANA derekoghe dikimmbeseria; nesi ndediboilo na kuzuma andenyi ya kukia kwake.”

Mlungu kukaba Moabu

¹⁰ BWANA uchaghulindia ughu mghondi, na wandu wa Moabu wichawadilwa sa nyasi andenyi ya kina cha mboleo.

¹¹ Nawo wichakaia wikighorua mikonu yawo andenyi ya icho kina sa mundu ubung'agha machinyi, ela BWANA uchasera uko kukujosa kwawo hata ngera weko na akili;

¹² na BWANA uchaghusha mawurigha gha ngome rawo ghiko ighu, na kughighusha andoenyi hata terinyi.