ISAYA 24 - Biblia Ilagho Jiboie Kwa Wandu Wose

BWANA kukaba ndoenyi

¹ Olenyi BWANA uchaikaba ndoe, na kuiboya isigho nduu; uchaivurugha na kuwisaghisa wandu wikaiagha andenyi yaro.

² Kula mundu uchakabwa. Mkohani uchapatwa ni malagho karakara na wandu; bwana uchapatwa ni malagho karakara na mzumba wake; bibi uchapatwa ni malagho karakara na mwai wake wa kazi. Muuzi uchapatwa ni malagho karakara na mghui; na uo ukopeshagha kara kara na mkopi.

³ Ndoenyi kuchanoneka putu na kumerelwa, kwa kukaia BWANA wajighora ilagho iji.

⁴ Ndoenyi kwanyaya na kuoma, wurumwengu ghwaawuyasia na kuoma, na mlungunyi kwaawuyasianya na ndoenyi.

⁵ Ndoenyi kwanoneka kwa wundu ghwa wandu wake, kwa kukaia warinona sharia na kulegha memu yake; nawo wajichikanya ijo ilaghano ja kala na kala.

⁶ Kwa huwo ndoe yamerelwa ni njowe, na wandu waro wapatwa ni wasi kwa wundu ghwa mawiwi ghawo, wandu wa ndoenyi wakorwa hata awo wisigharikagha ni watini.

⁷ Mizabibu iaoma, na divei yapungua. Wandu werechuloghe ni kuboilwa idana wiasoria ngolo kwa wasi.

⁸ Chwaka ra mayanga ranyamirishiro, na kuboilwa kwa wandu kwasirie; vinubi vawo na misherembe yawo vanyamirishiro.

⁹ Ndekuwadie mndungi wawuyanywa divei na kubora; iyo divei ibirie yawawa kwa awo werekoghe wikiinywa.

¹⁰ Muzi ghwamerie kuchulwa ni kunoneka, na kula nyumba eemeria kurughwa mndungi usengie.

¹¹ Kililo chasikirika chienyi mbaa kwa wundu ghwa kusowa divei, kuboilwa kwawo kwavikia kutua kwaro, kuboilwa kose kwa ndoenyi kwasirie.

¹² Muzi ghoononwa, na mbenge raro rachikanyiro na kunonwa.

¹³ Huwu niko kutua kwa mbari rose ra ndoenyi kuchaakaia, ni seji zeituni rikuwidwagha na kumerelwa kufuma midinyi, na seji zabibu risholwagha nyuma ya makuwido gharo.

¹⁴ Wandu wawusira chwaka rawo na kubora kwa kuboilwa; kwa wundu ghwa wubaa ghwa BWANA, wakema kufuma magharibi.

¹⁵ Kwa huwo, mnekenyi BWANA wubaa kufuma mashariki, na wandu wikaiagha masanga gha pwani ndewijikase irina ja BWANA, uo Mlungu wa Israeli.

¹⁶ Kufuma kutua kwa ndoenyi, dasikira chumbo ra makaso; ni chumbo remkasa Uo Mhachi. Ela ini nawuyaghamba, “Naawuyasia, ni bugha kwapo naawuyasia! Kwa kukaia Mkalii waawuyanifunya kwa mikalo, waawuyanifunya kwa mikalo.”

¹⁷ Kiture na vina na midegho vaawuyammbesera inyo wandu wa ndoenyi.

¹⁸ Uo uchaakimbia kwa wundu ghwa icho kiture, uchachunukia andenyi ya kina, na uo uchajoka kufuma kwa icho kina, uchawadwa ni mdegho. Kwa kukaia vua mbaa yanya kufuma mlungunyi, na misingi ya ndoenyi yasughusika.

¹⁹ Ndoe yabarika putu, yawaghanyika, nayo yasughusika na ndighi.

²⁰ Ndoe yazingizika sa mmbongeri, yakumbwakumbwa sa nyumba idukwagha ni kiremba. Ndoe yalemerelwa ni kaung'a rake, nayo ichatota putu hata ndeichaawuka sena anduangi.

²¹ Ngelo iyo, BWANA uchakaba majeshi gha roho mbiwi ghiko mbeonyi, na wazuri wa ndoenyi.

²² Wichakwanywa chiaimweri kara kara na wafungwa andenyi ya kira, nawo wicharughilwa ahoeni kinenyi, na nyuma ya matuku mengi wichafunywa wipate kukabwa.

²³ Na aho mori ghuchawuya kira, na iruwa ndejichaafunya miengere yaro anduangi; kwa kukaia BWANA wa majeshi uchabonya nguma aighu ya Mghondi ghwa Sioni na andenyi ya Jerusalemu; nao uchafunukua wubaa ghwake imbiri ya wabaa waro.