ISAYA 23 - Biblia Ilagho Jiboie Kwa Wandu Wose

Wulodi aighu ya Tiro

¹ Agha ni malagho aighu ya Tiro. Lilenyi inyo mabaharia wa Tarshishi, kwa kukaia muzi ghonyu ghwa Tiro ghwanonwa, hata ndekuwadie nyumba ingi angu bandari, rose ranonwa putu. Mchasikira maza iri kufuma Kupro.

² Nyamenyi kima inyo mkaiagha pwani, inyo washami wa Sidoni; moredumieghe wandu wenyu,

³ wikadamba kula baharinyi. Mapato ghenyu gherekoghe viro kufuma Shihori, agho makuwido gha Misri; morekoghe wabonyi biashara na iro mbari rose ra wandu.

⁴ Ni waya aighu yako ee Sidoni, kwa kukaia hata bahari cheni na andu kumilie kwa bahari kwaghamba, “Jingi serekumbieghe lufu kwa wundu ghwako na kukuva; jingi selela wana wa womi hata wa waka.”

⁵ Wamisri wichawawa nandighi ngelo wichaasikira kukaia Tiro yameria kutoteshwa.

⁶ Lilenyi, inyo wandu wa masanga gha pwani! Kimbienyi cha Tarshishi.

⁷ Welee, ughu nigho ghoni muzi ghwa Tiro ghorechuloghe ni maboilo, muzi ghoreaghiloghe kokala uko? Loli nigho ghoni wandu waro werekoghe wikighendia masanga gha kula na kughikaia?

⁸ Nani ushekerie muzi ghwa Tiro kuserwa huwu; muzi ghorekoghe na wandu wa biashara wiko wazuri, na washami waro werenekeloghe ishima ndoenyi?

⁹ BWANA wa majeshi nuo orepangieghe maza iri; eri upate kunona uko kukujosa kwake; na kuwifusha waya awo wandu wake werenekeloghe ishima ndoenyi.

¹⁰ Limenyi isanga jenyu inyo wandu wa Tarshishi seji wandu wa Naili wilimagha; kwa kukaia ndekuwadie mndungi omlindia sena anduangi.

¹¹ Mlungu wamerie kughorua mkonu ghwake aighu ya bahari, na kughusha agho mawuzuri; wamerie kughora kukaia ngome ra biashara ra Kanaani richukanyo.

¹² Nao waghambie, “Ndekuwuyaboilwa sena ee muzi ghwa Sidoni kuko sa mwai uelie, ukorongelo; hata kukakimbiria Kupro saki, ndekuchaapata kuhora kungi anduangi.”

¹³ (Wakaldayo niwo wishekerie muzi ghwa Tiro ghukangilwa ni nyamandu, si Waashuru wangi; Wakaldayo niwo wiaghie minara yawo kughumara ugho muzi, na kughusha ngome rawo hata rikawuya maghacho.)

¹⁴ Lilenyi, inyo mabaharia wa Tarshishi; kwa kukaia ugho muzi moreghusuwirieghe ghwamerie kunonwa.

¹⁵ Ngelo iyo, Tiro ichaliwika kwa miaka mirongo mfungade, sa matuku gha mzuri ghebonya nguma. Kutua kwa iyo miaka mirongo mfungade, Tiro ichafwananishwa na luja lumbo lwa malaya loreboreloghe:

¹⁶ “Wada kinubi chako, kumare-mare mzinyi ee malaya kuliwikie; bora chumbo nyingi risingie, kupate kukumbukwa sena.”

¹⁷ Nyuma ya miaka mirongo mfungade, BWANA uchaghuchea muzi ghwa Tiro, nagho ghuchawuria kazi yake, na kubonya wumalaya na mawuzuri ghose gha wurumwengu ndoenyi kose.

¹⁸ Biashara rake na mafungu ghake ghupatagha ghichawikwa wakfu kwa BWANA. Ndeghichaawikwa akiba angu kungirwa malinyi, ela mali yaro ichatumilwa kureda vindo kwa wungi, na nguwo riboie kwa awo wimuobuagha BWANA.