ISAYA 19 - Biblia Ilagho Jiboie Kwa Wandu Wose

Mlungu kuikaba Misri

¹ Agha nigho malagho aighu ya Misri, ola BWANA uacha Misri naiseghe wajoka aighu iwingunyi. Milimu ya Misri ichasughusika imbiri kwake, na wandu wa Misri wichafwa ngolo.

² BWANA waghamba, “Nichawinyavurisha Wamisri, nawo wichalwa weni na weni, wichalwa mundu na mruna, na mundu na mmbao. Muzi kwa muzi na wuzuri kwa wuzuri.

³ Nichawibwagha ngolo putu, na kuinona mipango yawo, nawo wichalola njama kwa milimu na kwa walaghui, waghanga na wasawi;

⁴ nani nichawingira Wamisri mikonunyi kwa bwana mkorongi, nawo wichabonyerwa nguma ni mzuri ubirie, ini Bwana, Uo BWANA wa majeshi naghamba.”

⁵ Moda ghwa Naili ghuchapungua mboa-mboa, na machi gharo ghichaoma.

⁶ Mikua ya ugho moda ichanuka na meda yaro mitini-mitini ichapungua na kuoma; maria na nyasi richawoa,

⁷ na miwalwa yose iwalo mbai na mbai ya Moda ghwa Naili ichaoma putu na kudukwa noko; na andu kwaro kuchasighwa kuduu.

⁸ Wawadi samaki wichalila kwa kuwawa, awo wose witumiagha kiloo na nyavu wichasirimika na kudaruma.

⁹ Awo wilukagha nguwo ra kitani na ra pamba wichafwa ngolo.

¹⁰ Waluki na wandu wa mafungu wichakaia na wasi.

¹¹ Vilongozi va muzi ghwa Soani wakaia wakelu nandighi, na wanjama wa mzuri wafunya mawoni gha wukelu. Kudima wada kumzera mzuri, “Ini ne mwana wa mundu uwadie hikima, mwana wa wazuri wa kala?”

¹² Wanjama wako wiko na hikima weko hao ee mzuri wa Misri? Ndewikughorie agho BWANA wa majeshi ughipangie kwa wundu ghwa Misri.

¹³ Wabaa wa muzi ghwa Soani wawuya wakelu, na wabaa wa Memfisi weekalikia; awandu weni wiko sa magho gha mbembenyi kwa mbari yawo, walaghasha Misri chia.

¹⁴ BWANA wawingiria roho ya kulaghalwa ni akili, nawo waishekeria Misri kubonya malagho ghake kisha-kisha sa mmbongeri uwalaliagha ukidaika.

¹⁵ Misri ndeichaadima kubonya ilagho jingi, ikaiagha ni kilongozi angu muisanga; mundu m'baa angu mundu mtini.

Misri kumtasa BWANA

¹⁶ Ngelo iyo, Wamisri wichakaia sa waka, wichachulwa ni wowa na kusughusika imbiri ya mkonu ghwa BWANA wa majeshi ghwaghorolwa kuwikaba.

¹⁷ Isanga ja Juda jichareda kiture kwa Wamisri; wikakumbuswa malagho gha Juda tu, kula Mmisri uchangilwa ni wowa, kwa wundu ghwa mipango BWANA wa majeshi uibonyere aighu yawo.

¹⁸ Ngelo iyo ikavika, kuchakaia na mizi misanu andenyi ya isanga ja Misri idedagha Kikanaani. Wichabonya ighemi kukaia waloli kwa BWANA wa majeshi. Muzi ghumu ghwa iyo ghuchawangwa Muzi ghwa Iruwa.

¹⁹ Ngelo iyo ikavika, kuchakaia na madhabahu ya BWANA andenyi ya isanga ja Misri, na mnara ghwa BWANA ghuchakaia mpakenyi ghwa isanga ijo.

²⁰ Ichakaia alama na wushahidi kwa BWANA wa majeshi andenyi ya isanga ja Misri; nawo wikamkemia BWANA kwa wundu ghwa wakorongi, uchawidumia mkiri, nao uchawilindia na kuwikira.

²¹ BWANA uchakumanyisha moni kwa Wamisri, nawo wichammanya na kumtasa BWANA wikifunya vizongona vekora, nawo wichabonya maghemi kwa BWANA na kughikatisha.

²² Na BWANA uchaikaba Misri, ukikaba na kuboisa; nawo wichamghalukia BWANA, nao uchasikira kuvoya kwawo na kuwikira.

²³ Ngelo iyo, kuchakaia na chia mbaa kufuma Misri hata Ashuru. Waashuru wichacha kwa Wamisri, na Wamisri kwa Waashuru; na Wamisri wichatasa chiaimweri na Waashuru.

²⁴ Ngelo iyo, Israeli ichawadana na Misri na Ashuru, na awo wadadu wichakaia marasimio kwa wurumwengu,

²⁵ kwa kukaia BWANA wa majeshi wawirasimie ukighamba, “Wandu wapo wa Misri, ndewirasimilo, na Ashuru, kazi ya mikonu yapo, na Israeli ifwa japo.”