ISAYA 16 - Biblia Ilagho Jiboie Kwa Wandu Wose

Kufwa ngolo kwa wandu wa Moabu

¹ Wandu wa Moabu, dumenyi wana wa ng'ondi wikaie kodi kufuma Sela, kwa uo ubonyagha nguma Jerusalemu mkiidia kireti.

² Wandu wa Moabu wasasarika ii chia na ii chia sa nyonyi, na vana vawo vafunywa kijungunyi a viruwukonyi va Moda ghwa Arnoni.

³ “Dineke njama, diwonyere chia ya hachi, dilindie sa kudifinikira kiju ngelo ya iruwa, divise isi wakimbii, kusakedifunya.

⁴ Sigha wakimbii wa Moabu wikaie kwako, kupate kuwilindia wisetotesho.” (Ngelo uo mkorongi na mtoteshi wainjika, na uko kutoteshwa kwasia, hata uo uwadiagha wandu na maghu ghake kuinjika isangenyi.

⁵ Niko icho kifumbi cha nguma chichamangishwa kwa lukundo lukatie, na umu wa kivalwa cha Daudi uko mloli uchachiseria, uo utanyagha ukilola hachi, nao ndemukagha kubonya hachi.)

⁶ Wandu wa Juda wikatumbulia, “Dasikire seji wandu wa Moabu wikukasire; daichi seji wikudukie na kukuwona, ela kukuduka kwawo ni kwa duu.”

⁷ Wandu wa Moabu wichalila, kula umu wawo uchalilia isanga jake, kwa wundu ghwa wasi mungi ghosowa mikate ya reizini ya Kir-haresethi.

⁸ Mbuwa ra Heshboni na mizabibu ya Sibma yanonwa; vilongozi va iro mbari ra wandu wadema mbashu raro iro rerevikieghe Jazeri hata noko cha kireti. Mbashu raro rachurikie hata kuida kimonu cha bahari.

⁹ Kwa huwo nichalila seji Jazeri ulilagha, kwa wundu ghwa zabibu ra Sibma; nichamdiria mbori rapo ee Heshboni na Eleale, kwa kukaia makuwido gha matunda ghenyu, na kuboilwa konyu kwainjwa ni wuda.

¹⁰ Ndekuwadie mndungi uko na kuja kuboilwa andenyi ya mbuwa redu rinorie, hata mndungi ndewuebora andenyi ya mbuwa ra mizabibu kwa kukaba lukilighili. Mndungi ndewuekama zabibu, kuboilwa kose koomerelwa.

¹¹ Kwa huwo niaililia Moabu na muzi ghwa Kir-heresi.

¹² Wandu wa Moabu wiakusirisha ndighi weni wikijoka mghondinyi kulomba, aja andu kwawo kotasira; nawo ndewichaatesekia anduangi.

¹³ Agho nigho malagho BWANA oreghighorieghe aighu ya Moabu kiimbiri.

¹⁴ Ela idana BWANA waghamba, “Andenyi ya miaka idadu kukatia gi, wubaa ghwa Moabu ghuchasia; hata ngera weko wengi saki, ela awo wichaakia ni watini, sena wichakaia wanyonge.”