ISAYA 15 - Biblia Ilagho Jiboie Kwa Wandu Wose

Wulodi aighu ya Moabu

¹ Ughu ni wulodi aighu ya Moabu. Kwa kukaia mizi ya Ari na Kiri yamerelo kwa kio chimweri, kwa huwo isanga ja Moabu jeesia.

² Wandu wa muzi ghwa Diboni, wajoka cha mghondinyi andu witasiragha, wipate kulila; wandu wa Moabu wialilia Nebo na Medeba. Wamerie kuara vongo vawo na sombe rawo kwa wasi.

³ Warwa nguwo ra magunia na kuida achienyi wikilila kula umu wawo, na nyumbenyi na viwachenyi, wikidikwa ni mbori.

⁴ Wandu wa Heshboni na Eleale, wialila, chwaka rawo rasikirika hata Jahazi. Kwa huwo masikari gha Moabu wiakema wikilila, wandu wose wa isanga wiasughusika.

⁵ Ngolo yapo ialilia isanga ja Moabu, wandu wake wiakimbiria isanga ja Soari na Eglathi-shelishia, wamu wiajokeria na mshoromoto ghwa Luhithi wikilila, na wamu wiaghenda wikilila kwa wasi cha Horonaimu.

⁶ Machi gha Nimrimu ghaomie, nyasi reeoma na zima nderiwuebuka, hata mghina ghungi ndeghuko.

⁷ Kwa huwo wandu waawuyaduka vilambo wivipatire, na ivo werewikieghe na kuruwuka navo Vololo ya midi ya mierezi.

⁸ Kililo chaawuyasikirika kula andu isangenyi ja Moabu, na wandu wa Eglaimu na Beer-elimu wiadikwa ni mbori.

⁹ Hata ngera machi gha Diboni ghachulwa ni bagha, ela sena Mlungu uchawiredia wandu wa Diboni wasi m'baa kuchumba; awo wichaasigharika na kukimbia, Mlungu uchawiredia shimba ipate kuwibwagha.