ISAYA 13 - Biblia Ilagho Jiboie Kwa Wandu Wose

Mlungu kureda adhabu kwa Babuloni

¹ Ughu ni wufunuo ugho Isaya mwana wa Amozi oreghupatireghe kufuma kwa Mlungu aighu ya Babuloni.

² Wusirenyi bendera ya wuda aighu ya mghondi ghwa ikara, muwikemie masikari, na kuwikunyiria kwa mikonu wingie na kughukaba ugho muzi ghukukasire.

³ BWANA moni wawilaghira masikari ghake uwiwikie na kuwirumiria, awo wandu wake wiko na ndighi, wipate kuwikaba awo wandu uko na machu nawo.

⁴ Sikirenyi ndoghoi ra izungu ibaa aighu mighondinyi, na chwaka ra wazuri na mbari ra wandu rakwanyika chiaimweri! BWANA wa majeshi waawuyakwanya ijeshi kwa wundu ghwa wuda.

⁵ Wafuma isanga ja kula, noko cha kutua kwa ndoenyi; BWANA waawuyacha na maswagha ghake, na kwa machu ghake uchatotesha ndoenyi kose.

⁶ Lilenyi, angu ituku ja BWANA jeko kaavui, ijo ituku BWANA Uwadie Ndighi Rose uchaatotesha.

⁷ Mikonu ya kula mundu ichateweleka, na ngolo ya kula mundu ichasagha machi;

⁸ nawo wichafwa ngolo. Wandu wose wichangilwa ni wowa na kuwawa karakara na muka wawuyakufungua. Wichazighanana weni na weni kwa wowa, wilushire mawushu.

⁹ Ola ituku ja BWANA jaawuyacha, ijo ituku jizamie ja machu ghake ghibirie, upate kuibonya ndoe isigho nduu, na kuwitotesha awo wakaung'a wiko andenyi yaro.

¹⁰ Nyerinyeri rose ra mlungunyi nderichaafunya miengere, na iruwa jichasera kira jikibuka, hata mori ndeghuchaafunya miengere yaro anduangi.

¹¹ BWANA waghora huwu, “Nichaghukaba wurumwengu kwa wundu ghwa wuwiwi ghwake, na wawiwi, kwa wundu ghwa wulaghe-laghe ghwawo; kukukasa kose kwa wandu nichakumeria, na kuwisera awo wikudukie.

¹² Nichawibonya wadamu wisigho watini kuchumba dhahabu ieleshero, na watinieri kuchumba dhahabu ya Ofiri.

¹³ Kwa huwo nichasughusa mlungunyi, na ndoenyi kuchasughusika hata kufume andu kwaro, ngelo Ini BWANA wa majeshi nichaawonyera machu ghapo ghibirie.

¹⁴ “Waghenyi wikaiagha Babuloni wichakimbiria mizi yawo, wikisaghisika karakara na shaa ikimbiagha wadiwi; karakara na ng'ondi risewadie mlisha.

¹⁵ Mundu uo ose uchaawonwa na kuwadwa uchadungwa na lufu hata ufo.

¹⁶ Wana wawo wichabarilwa ndonyi na kuwaghanyika wikiwona. Wichasokwa vilambo vawo, na waka wawo wichadidikwa.”

¹⁷ BWANA waghora huwu, “Nichawinyavura Wamedi, wandu wisena bea na feza hata dhahabu, wipate kuikaba Babuloni.

¹⁸ Wichabwagha wandu wa irika kwa ndana na mawanu ghawo. Ndewichaakaia na wughoma gungi kwa wana wiongagha, hata kuwiwonia wughoma wana watini.

¹⁹ Babuloni nigho wuzuri ghughokie kuchumba mawuzuri ghose; nigho kuboa na kukukasa kwa Wakalidayo, ela ngelo Mlungu uchaaghukumba noko, ghuchakaia sa Sodoma na Gomora.

²⁰ Jingi ndeghuchaakailwa ni wandu kwa vivalwa vose. Muarabu ungi ndechaadunga hema yake aho, hata mlisha ungi ndechaalisha mfugho rake aho.

²¹ Ela nyamandu ra isakenyi richakaia aho, na nyumba raro richangilwa ni nyamandu rirumagha. Nyagha richakaia aho, na weke mwakuli wichasarigha aho.

²² Mbisi richaruma aighu ya minara yawo, na mizozo ichakema andenyi ya ngome rawo righokie, kwa kukaia ngelo ya Babuloni yameria kuvika isedimagha kusoghorwa.”