ISAYA 11 - Biblia Ilagho Jiboie Kwa Wandu Wose

Wuzuri ghwa sere

¹ Mndumu uchacha wa kivalwa cha Jese sa longe lujokagha akirimbenyi cha mudi luzoghorwagha ni miri yaro.

² Roho wa BWANA uchakaia aighu kwake, roho wa hikima na kumanya, roho wa njama na kudima; roho wa wuya, umuobuagha BWANA.

³ Uchakaia ukiboilwa andenyi ya kumuobua BWANA. Ndechaatanya kwa kuwona kwake, angu kudumbua malagho kwa kunugha agho waghisikira;

⁴ ela uchawitanya wakiwa kwa hachi, na kudumbua malagho gha wanyonge wa ndoenyi kara kara; uchaikaba ndoe kwa miruke ya momu ghwake, na kuwibwagha wawiwi kwa miruke ya memu yake.

⁵ Hachi ichakaia sa mkowa ghofunga kiwonu chake, na wuloli sa mkowa kiwonunyi kwake.

⁶ Kikwau chichakaianya na mwana wa ng'ondi, na inge ichalalanya na ndaghina; ngache na shimba richakaia rikija chiaimweri; naro richalishwa ni mwana mtini.

⁷ Ng'ombe na kibarabara richajanya, na wana wawo wichadima chiaimweri; shimba ichaja nyasi sa ng'ombe.

⁸ Mwana uongagha uchasarigha a mrumenyi ghwa choka, na mwana usighie kuonga uchangira mkonu ghwake a mrumenyi ghwa mwaropo.

⁹ Ndewichaashoghonuana angu kunona andenyi ya mghondi ghwapo ghose ghwa wueli, kwa kukaia ndoenyi kuchachulwa ni wandu wimmanyagha seji machi ghichuagha baharinyi.

Wandu wibarishiro wichawuya

¹⁰ Ituku ijo, uo mundu wa kivalwa cha Jese uchawuka kukaia alama kwa wandu. Wandu wa iro mbari wichamlola, na andu kwake kokaia kuchakaia kwa wubaa.

¹¹ Ngelo iyo, BWANA uchaghorua mkonu ghwake indo ja kawi kuwunja masighariko gha wandu wake kufuma Ashuru na kufuma Misri, na kufuma Pathrosi, na kufuma Ethiopia na kufuma Elamu, na kufuma Shinari, na kufuma Hamathi, na masanga gha pwani baharinyi.

¹² BWANA uchawusira bendera ikaie alama kwa iro mbari ra wandu, ewonyera kukaia uchatumbanya wandu wa Israeli na wandu wa Juda wisaghisikie, wifume iro mbembe inya ra ndoenyi.

¹³ Iriso ja Israeli jichasia, na wamaiza wa Juda wichainjwa; Israeli ndechaammbonia Juda iriso, na Juda ndechaamsumbua Israeli.

¹⁴ Ela wichawadana na kuwingiria Wafilisti wiko cha magharibi; wichawikaba na kuwidwa wunyika wandu wa mashariki. Wichawikaba na kuwisima wandu wa Edomu na Moabu, na Waamoni wichakuwika aisi yawo.

¹⁵ Na BWANA uchaghuomera putu mwanya ghwa bahari ya Misri, sena uchawetesha mbeo mbaa eomera, nayo ichaomera Moda ghwa Eufrate na kusighara meda mitini mfungade, idimagha kuruwukwa kwa maghu.

¹⁶ Kuchakaia na chia mbaa kufuma Ashuru, kwa wundu ghwa masighariko gha wandu wake Israeli, sa iji koni werekoghe nayo ngelo werefumagha isanga ja Misri.