HOSEA 6 - Biblia Ilagho Jiboie Kwa Wandu Wose

Israeli kusowa kuhea kwa loli

¹ Wandu waghamba, “Nndokonyi dimmburie BWANA! Wadivavirie, ela uchadiboisa. Wadishoghonue, ela uchadifunga kushoghonoka kodu.

² Nyuma ya matuku awi uchadirukisha, na ituku ja kadadu uchadimangisha, dipate kukaia kimusi imbiri kwake.

³ Ndedilole kummanya BWANA. Kwa loli uchadichea sa kuela kwa ndoe, na seji vua ya kimu inyagha ndoenyi.”

⁴ Ela BWANA waghamba, “Nikubonya wada ee Israeli? Nikubonya wada ee Juda? Lukundo lwako kwapo lwadasia shwa-shwa sa ikungughu ja luma lwa nakesho; loofwanana na mami ghiomagha kokio.

⁵ Iyo niyo sababu nidumie walodi konyu na ilagho jetanya na kutotesha. Agho nighikundagha gheko worinyi konyu.

⁶ Nadaboilwa ni lukundo lukatie kuchumba vizongona; nadaboilwa iji wandu wanimanya kuchumba kunifunyira vizongona vekora.

⁷ “Ela werejinonieghe ilaghano japo sa Adamu, ndewerekoghe waloli kwapo anduangi.

⁸ Gileadi ni muzi ghuchue wandu wawiwi na wabwaghi wandu.

⁹ Wakohani weeka sa vitoi vilaliriagha mundu. Wadabwagha hata achienyi ya wueli eghenda Shekemu. Wadabonya maza iri rose mbiwi kwa kidali tu.

¹⁰ Nawonie ilagho jizamie nandighi andenyi ya Israeli: Wandu wapo waawuyakulusha weni kwa kutasa milimu.

¹¹ “Na inyo wori ee wandu wa Juda, nakuwikia ngelo ekuneka adhabu kwa wundu ghwa agho kwawuyabonya.