HOSEA 14 - Biblia Ilagho Jiboie Kwa Wandu Wose

Kuvoya kwa Hosea kwa wundu ghwa Israeli

¹ Ee wandu wa Israeli, wuyenyi kwa BWANA Mlungu onyu, kwa kukaia mookuwishwa ni makosa ghenyu gheni.

² Wuyenyi kwa BWANA na ilombi iji, “Kudifuye wughoma kaung'a redu, kudirumirie ilombi jedu nesi dichakukasa seji derelaghirieghe.

³ Ashuru ndechaadikira, hata farasi ra wuda nderichaaditesia. Ndediwuyaaghora sena kwa milimu, iyo kazi ya mikonu yedu, wei ni milungu yedu. Ee BWANA, kuwiwonie wughoma awo wisewadie weke ndee.”

BWANA kulaghira irangi iwishi kwa Israeli

⁴ BWANA waghamba, “Nichawiwunja wandu wapo cha kwapo. Nichawikunda kwa ngolo yapo yose; hata sichaakaia na machu nawo sena anduangi.

⁵ Nichakaia kwa wandu wa Israeli, sa vua kwa ndoe iomie wichaghoka sa maua; wichadunga miri sa midi ya Lebanoni.

⁶ Mbashu rawo richazoghua riboie sa mzeituni marumba gharo ghichanuka nicha sa gha misida ya Lebanoni.

⁷ Wichacha na kukaia aisi ya wulindiri ghwapo, wichalima na kupata viro, wichakaia nicha sa mzabibu. Wichaboa sa ija divei ya Lebanoni.

⁸ Wandu wa Israeli ndewichaaidumikia milimu sena, nichatumbulia malombi ghawo na kuwilindia; nichawifinikira sa mudi ghupambie, na kuwirasimia kwa kula kindo kicha.”

Malagho ghemeria

⁹ Awo wiko na hikima ndewitambukilo ni agho ghiandikilo na aha, wighingire ngolonyi. Chia ra BWANA ni ra loli, na wandu wa hachi wichadua kwa kurinugha iro; wakaung'a wichakuwa na kughwa kwa kulegharinugha.