HOSEA 10 - Biblia Ilagho Jiboie Kwa Wandu Wose

¹ Wandu wa Israeli weeka sa mzabibu ghuvagha matunda kwa wungi. Ngelo wawuyachurikia kukaia nicha, niko wawuyachuria kuagha madhabahu mengi. Seji isanga jake jichuriagha kuva mavalo mengi, ni huwo wichurie kuagha nguro rake ra magho riboie retasa.

² Wandu wiko na ngolo ra mikalo suti wipato ni wasi kwa wundu ghwa wuwiwi ghwawo. BWANA ucharichikanya madhabahu rawo, na kurinona nguro rawo retasa.

³ Kafwani koni awandu wichakaia wikighamba, “Ndediwadie mzuri, kwa kukaia ndederemuobueghe BWANA; ela kukakoni uo mzuri wadibonyeragha kii?”

⁴ Wadaaja malagho gha duu na kubonya maghemi gha tee na malaghiro ghisefwane. Hachi kwawo yawurie kusowa hachi, ikizoghua sa isaka ja sumu jibukie andenyi ya mbuwa.

⁵ Wandu wikaiagha muzi ghwa Samaria wichaobua na kulila kwa wundu ghwa mlimu ghwa ngache ya dhahabu ghwa Beth-aveni. Wandu awo chiaimweri na wakohani wighudumikiagha wichalila kwa kuwona wubaa ghwaro seji ghwainjwa.

⁶ Ugho mlimu ghuchadukwa cha Ashuru ghukaie inosi kwa mzuri. Israeli uchafushwa waya nandighi kwa wundu ghotasa milimu.

⁷ Mzuri wa Samaria uchatota, sa kipande cha mudi chadwalwa ni machi.

⁸ Andu kwa ighu kwa wulaghe-laghe, korebonyeroghe kwa wundu ghwa Israeli kutasa milimu kuchanonwa. Kuchabukwa ni minjwa na mtaranganga, nayo ichazoghua na kufinikira madhabahu rawo. Wandu wichaizera mighondi mibaa na mitini, “Dighuenyi mudifinikire.”

BWANA kutangaza kutanywa kwa Israeli

⁹ BWANA waghamba, “Wandu wa Israeli ndewisighie kunibonyera kaung'a kufuma ngelo ija werebonyereghe kaung'a aja Gibea. Kwa huwo wuda ghuchawibukia aeni aho Gibea.

¹⁰ Nichawichea awandu wa kaung'a chienyi na kuwikaba, na iro mbari ra wandu richakwanyika aighu yawo, nawo wichakabwa kwa wundu ghwa kaung'a rawo nyingi.

¹¹ “Israeli orekoghe sa ng'ombe ya irika ifundishiro kufasha ngano. Ela nawonie nimngirie ghongolo ya singo yake ighokie, nipate kumfundisha kazi rikurie. Juda uchachimba na ighembe, na Israeli uchabara malowa.

¹² Ngaghamba, ‘Limenyi mbuwa mbishi kwa wundu ghonyu mmbeni, muwe hachi, mkuwide lukundo lukatie kufuma kwapo. Ni ngelo ya kunighalukia ini, BWANA onyu, nani nichacha na kumdiria marasimio.’

¹³ Ela wulalo ghwaro moowa wuwiwi mkaaghukuwida; mooja matunda gha tee renyu. “Moowika irumirio jenyu kwa magare ghenyu na masikari ghenyu.

¹⁴ Kwa huwo izungu ja wandu wa wuda jichacha aighu ya wandu wenyu, na ngome renyu rose richanonwa. Ichakaia seji Mzuri Shelmani orenonieghe muzi ghwa Beth-abeli ngelo ra wuda; weke mao na wana wawo wikabwaghwa.

¹⁵ Huwo niko mchaabonyerwa inyo, wandu wa Betheli, kwa wundu ghwa ugho wuwiwi ghonyu m'baa moreghubonyereghe. Wuda ghukazoya woruwu, mzuri wa Israeli uchabwaghwa.”