HAGAI 2 - Biblia Ilagho Jiboie Kwa Wandu Wose

Wubaa ghwa Hekalu mbishi

¹ Mwaka ugho ghoni, ituku ja mirongo iwi na imweri, mori ghwa mfungade, BWANA oreghorieghe sena na mlodi Hagai.

² Ukamzera Hagai ughore na Zerubabeli m'baa wa isanga ja Juda, na Mkohani M'baa Joshua, na masighariko gha wandu wose wiwurie kufuma wubarishonyi huwu:

³ “Oko mndungi aha aghadi konyu udimagha kukumbuka seji wubaa ghwa Hekalu ghorekoghe? Ghwawuyawoneka wada konyu idime? Yaawuyawoneka seji si kindo chingi.

⁴ Ela idana mndungi onyu usefo ngolo. Bonyenyi kazi, angu ini nekwanye chiaimweri nenyo.

⁵ Sa iji koni neremlaghirieghe mkifuma Misri kukaia nichakaia andwamweri nenyo, ni huwo koni neko chiaimweri nenyo; msakeobua.

⁶ “Ini BWANA Uwadie-Ndighi-Rose naghamba kukaia kafwani koni nichasughusa mlungunyi, na ndoenyi, na ndoe iomie, na bahari.

⁷ Mbari rose ra wandu nicharikumba noko, na mali rawo wicharireda aha, na Hekalu ichachulwa ni mali.

⁸ Feza yose ni yapo, na dhahabu riko ndoenyi ni rapo.

⁹ Wubaa ghwa Hekalu mbishi ghuchakaia mungi kuchumba ghuja ghwa kala, na aho nichawineka wandu wapo mecha na sere.” BWANA Uwadie-Ndighi-Rose waghamba.

Mlodi kulola njama kwa wakohani

¹⁰ Ituku ja mirongo iwi na inya ja mori ghwa ikenda, mwaka ghwa kawi ghwa kubonya nguma kwa Dario, BWANA Uwadie-Ndighi-Rose oreghorieghe sena na mlodi Hagai.

¹¹ BWANA ukaghamba, “Kotia wakohani witanye aighu ya sharia ihi:

¹² Mundu ukadwa kipande cha nyama ieleshero ya kizongona, nao uifunge na kidambi cha nguwo yake, ukaadada nacho mkate angu nyungu angu divei, angu mavuda, angu vindo ivo vose, huwo vikaia vieleshero?” Wakohani wikatumbulia, “Hata.”

¹³ Niko Hagai ukaghamba, “Mndungi ukakaia useelie kwa kuadada gharia, nao uadade chimu cha ivi vindo, welee vikaia viseelie?” Wakohani wikatumbulia, “Ee vikaia viseelie.”

¹⁴ Niko Hagai ukaghamba, “BWANA waghamba huwu: Ola huwo niko wandu wa mbari ihi wiko imbiri kwake. Kula kazi wibonyagha, na icho chose wichifunyagha kizongona madhabahunyi, ndechielie.”

BWANA kulaghira marasimio ghake

¹⁵ BWANA waghamba, “Wonenyi agho ghimpatire imbiri msezoe kuagha Hekalu.

¹⁶ Mundu ukaghenda zighana msigo ghwa viro vake ukisuwiria kupata vipimo mirongo misanu, uapata mirongo iwi.

¹⁷ Neremkabieghe kwa kiremba, na vua ya magho ngano na vindo vose morewaeghe, ela ndemoreherieghe.

¹⁸ Idime ni ituku ja mirongo iwi na inya ja mori ghwa ikenda; ituku msingi ghwa Hekalu ghumerelo. Modezighaniragha agho ghichaakaia kufuma idime.

¹⁹ Nichamrasimia hata ngera ndemuwuewona mbeu ingi nganyenyi konyu; hata mzabibu, angu mtini, angu mkomamanga, angu mzeituni ghuvae.”

Ilaghiro ja BWANA kwa Zerubabeli

²⁰ BWANA ukaghora na Hagai indo ja kawi ijo ituku jeni ja mirongo iwi na inya ja ugho mori ghoni ukighamba,

²¹ “Mzere Zerubabeli, m'baa wa Juda kukaia nalighisa kusughusa mlungunyi na ndoenyi.

²² Nichabingilisha mawuzuri na kurimeria ndighi ra mawuzuri gha iro mbari. Nichaghibingilisha magare gha wuda na awo wighijokagha; farasi richafwa na wajoki farasi waro wichabwaghana weni na weni.

²³ Ituku ijo ee Zerubabeli mwana wa Shealtieli, mdumiki wapo, nichakubonya oho kukaie mzuri kwa nguma yapo, kwa kukaia ni oho nikusaghue.” BWANA wa majeshi waghamba.