HAGAI 1 - Biblia Ilagho Jiboie Kwa Wandu Wose

Bwana kufunya momu Hekalu iagho sena

¹ Mwaka ghwa kawi ghwa kubonya nguma kwa Mzuri Dario wa Pashia, ituku ja imbiri ja mori ghwa karandadu, BWANA oreghorieghe ukimtumia mlodi Hagai. Malagho ghedeeka aighu ya Zerubabeli mwana wa Shealtieli, m'baa wa Juda, na Mkohani m'baa Joshua mwana wa Jehosadaki.

² BWANA Uwadie-Ndighi-Rose ukamzera Hagai, “Awandu waawuyaghamba wei ngelo ndeivikie eiagha Hekalu ya BWANA sena.”

³ Niko BWANA ukaghora na wandu kwa kumtumia mlodi Hagai ukighamba;

⁴ “Wele wandu wapo, kwaki mlalagha andenyi ya nyumba riboie ingelo Hekalu yapo iduagha inonekie?

⁵ Ndemmbonagha seji mwawuyapatwa ni malagho?

⁶ Mwawae viro vingi, mkaakuwida vitini. Mwawuyaja, ela ndemuwuyeghuda; mwawuyanywa, ela ndemuwuekatwa; mwawuyarwa, ela ndemuwuepatwa ni mruke; na m'bonyi kazi ndewuekatwa ni pesa.

⁷ Huwo ndemuwuewona shekeria yaro seji ifwanagha?

⁸ Jokenyi mighondinyi mrede mbau, muiaghe Hekalu; nani nichaboilwa na kutaswa andenyi yaro.

⁹ “Morekoghe mkisuwiria kupata vindo vingi, ela mkaapata vitinieri; hata iji mwavireda mzinyi, ngaviduka na mbeo noko. Mwamanyire ni kwaki nibonyere huwo? Ni angu Hekalu yapo iduagha ighacho, ingelo kula umu onyu waawuyabonya malagho gha nyumbenyi kwake.

¹⁰ Iyo niyo sababu vua ndeiwuyenya, hata ndoe ndeiwuefunya mavalo ghangi.

¹¹ Naomera isanga aighu mighondinyi, na mbuwenyi rewa viro, na mbuwa ra mizabibu na matunda gha mizeituni, na kula andu kobusa viro. Ngareda wasi kwa wandu na nyamandu, na kula kilambo mdimagha kuzoghora.”

Wandu kughusikira momu ghwa BWANA

¹² Niko Zerubabeli na Joshua na wandu wose wiwurie kufuma wubarishonyi Babuloni, wikabonya seji BWANA Mlungu wawo oreghorieghe. Wereobueghe BWANA Mlungu na kumsikira mlodi Hagai mdumwa wa BWANA.

¹³ Niko Hagai ukawighoria wandu malagho gha BWANA: “Nalaghira kukaia nichakanya andwamweri nenyo.”

¹⁴ Nao BWANA ukawinyavura ngolo wandu wose wipate kubonya kazi ya Hekalu: Zerubabeli na Joshua na masighariko gha wandu wose wiwurie kufuma wubarishonyi. Wikawoka kazi eagha Hekalu ya BWANA Uwadie-Ndighi-Rose uo Mlungu wawo,

¹⁵ ituku ja mirongo iwi na inya mori ghwa karandadu, mwaka ghwa kawi ghwa kubonya nguma kwa Mzuri Dario.