EZRA 9 - Biblia Ilagho Jiboie Kwa Wandu Wose

Ezra kutanya maza relowua mbari zima

¹ Nyuma ya maza iri rose kubonywa, vilongozi vimu va wandu wa Israeli wikacha na kunighoria kukaia wandu wa Israeli, wakohani, na Walawi ndewitanyikie na waisanga wiko kaavui na isi awo Waamoni, chiaimweri na maza rawo na Wamoabu, Misri na Wakanaani, Wahiti, Waperizi, Wajebusi na Waamoni. Waawuyabonya maza ireni rizamie rawuyabonywa ni awo wandu.

² Wayahudi walowue wai wamu wawo; mbari ya wueli ikakuranganya na waisanga wa aha. Vilongozi na wabaa niwo wa imbiri kubonya maza iri.

³ Niendasikira maza iro, ngarashua nguwo rapo, na kukua iridia japo na sombe rapo; ngasea kidombo kwa wasi.

⁴ Niko awo wandu wose werekoghe wikiobua malagho gha Mlungu wa Israeli kwa wundu ghwa kusowa wuloli kwa awo wandu werewurieghe kufuma wubarishonyi wikakwanyika mbai-mbai yapo niko kidombo kwa wasi hata ngelo efunya kizongona cha luma lwa kenyi.

⁵ Ngelo efunya kizongona cha luma lwa kenyi, nerewukieghe andu nerekoghe ngifunga tumu, na nguwo rapo rirashukie, ngaghwa ngokoronyi, na kuighorua mikonu yapo cha kwa BWANA Mlungu wapo,

⁶ ngighamba: “Ee Mlungu wapo, nafwa waya nandighi, hata sifwane kuwusira wushu ghwapo cha kwako. Kaung'a redu rajoka ighu kuchumba vongo vedu, na mawiwi ghedu ghajoka hata mlungunyi.

⁷ Kufuma matuku gha weke aba, hata idana isi wandu wako dabonyere kaung'a na ndighi. Kwa wundu ghwa kaung'a redu, isi chiaimweri na wazuri wedu, na wakohani wedu, dangirie mikonunyi kwa wazuri wa kighenyi, dikabwaghwa, dikadwalwa wunyika, dikasokwa, na kusowelwa ishima, seji diko idime.

⁸ Ela idana kwa ngelo vui ee BWANA Mlungu odu, kwadiwonyere mvono mungi kodu; kukadisigha wamu wedu difufunuke kufuma wuzumbenyi, na kukaia kwa sere andenyi ya iji isanga ja wueli. Kwadibonyere difume wuzumbenyi, kukadineka irangi iwishi.

⁹ Isi derekoghe wazumba, ela ndekudisighie wuzumbenyi anduangi. Kwam'bonyere Mzuri wa Pashia udipendelie, na kudirumiria dikaie moyo eri diiaghe Hekalu yako erenoneloghe, sena dikaie banana andenyi ya Juda na Jerusalemu.

¹⁰ “Na idana ee Mlungu odu, dighora wada kunughana na agha dibonyere?

¹¹ Dalemelo ni kuwadia malaghiro kudilaghirie kwa chia ya wadumiki wako walodi. Weredighorieghe kukaia isanga dawuyajiwusa ni isanga jiseelie, kwa kukaia wandu wawuyajikaia kufuma kutua uku hata kutua kuja wadabonya maza rizamie ra wuchafu.

¹² Weredighorieghe diseloworane nawo, hata diselole kupatana nawo angu kuwilolia mecha ghangi ghawo; dipate kukaia na ndighi, na kuja manori gha isanga na kujisighia wana wedu; jikaie ifwa jawo ja kala na kala.

¹³ Hata ngera dapatiro ni agho ghose ghikikaia ikabo kwa wundu ghwa kaung'a redu nyingi, ndekudikabie seji idifwane dikabo, kukadisighia wulalo ghokaia moyo.

¹⁴ Idana ikaia wada isi dimenye memu yako kwa kuloworana na awa wandu wawiwi? Dikabonya huwo kuchawawa nandighi hata kuditoteshe na mndungi usedime kukaia moyo.

¹⁵ Ee BWANA Mlungu wa Israeli, oho koko mloli, ela kwadisighie dikaie moyo. Dahea mawiwi ghedu kwako; ndedifwane isi kusoghoda imbiri kwako.”