EZRA 8 - Biblia Ilagho Jiboie Kwa Wandu Wose

Wandu awo werewurieghe kufuma wubarishonyi

¹ Agha nigho marina gha wabaa wa vichuku werekoghe wubarishonyi Babuloni; wikawuyanya na Ezra cha Jerusalemu ngelo Mzuri Artashasta orekoghe ukibonya nguma.

² Gershoni wa Kichuku cha Finehasi, Danieli wa Kichuku cha Thamari, Hatushi wa Kichuku cha Daudi,

³ mwana wa Shekamia, Zekaria wa Kichuku cha Paroshi uo oreandikiloghe andwamweri na wandu ighana na mirongo misanu.

⁴ Eliehoenai mwana wa Zerahia wa Kichuku cha Pahath-moabu, andwamweri na wandu maghana awi.

⁵ Shakania mwana wa Jahazieli wa Kichuku cha Zatu, andwamweri na wandu maghana adadu,

⁶ Ebedi mwana wa Jonathani wa Kichuku cha Adini, andwamweri na wandu mirongo misanu.

⁷ Jeshaia mwana wa Athalia wa Kichuku cha Elamu, andwamweri na wandu mirongo mfungade.

⁸ Zebadia mwana wa Mikaeli wa Kichuku cha Shefatia, andwamweri na wandu mirongo wunyanya.

⁹ Obadia mwana wa Jehieli wa Kichuku cha Joabu, andwamweri na wandu maghana awi na ikumi na wunyanya.

¹⁰ Shelomithi mwana wa Josifia wa Kichuku cha Bani, andwamweri na wandu ighana na mirongo irandadu.

¹¹ Zekaria mwana wa Bebai wa Kichuku cha Bebai, andwamweri na wandu mirongo iwi na wunyanya.

¹² Johanani mwana wa Hakatani wa Kichuku cha Azgadi, andwamweri na wandu ighana na ikumi.

¹³ Kichuku cha Adonikamu awo wecheenugha konyuma, na marina ghawo ni Elifeleti, Jeueli, na Shemaia, andwamweri na wandu mirongo irandadu.

¹⁴ Kichuku cha Bigvai, ni Uthai na Zakuri andwamweri na wandu mirongo mfungade.

Ezra kupata Walawi kwa wundu ghwa Hekalu

¹⁵ Ngawikwanya wandu wose aho modenyi ghuendagha cha muzi ghwa Ahava; dikabonya kambi aho kwa matuku adadu. Iji nerekoghe ngilawua wandu na wakohani, serewonieghe Walawi aho.

¹⁶ Niko ngawidumiria vilongozi ikenda wiche: Eliezeri, na Arieli, na Shemaia, na Elnathani, na Jaribu, na Elnathani, na Nathani, na Zekaria, na Meshulamu; na walimu wawi: Joiaribu, na Elnathani.

¹⁷ Ngawiduma kwa Ido, kilongozi wa wandu aja Kasifia, wimkotie uo na wangara wake widumikagha Hekalunyi wididumie wandu wemdumikia Mlungu Hekalunyi.

¹⁸ Wikadidumia kwa mvono ghwa Mlungu, Sherebia, mundu uko na kudima, Mlawi wa Kichuku cha Mahli. Wana wake ikumi na wunyanya na waruna wikachanya nao.

¹⁹ Wokoni wikawidumia Hashabia na Jeshaia kufuma Kichuku cha Merari na wana wake mirongo iwi.

²⁰ Aighu ya awo, korekoghe na wadumiki wa Hekalu maghana awi mirongo iwi, awo weke wawae werewikiloghe ni Mzuri Daudi na wabaa wake witesieghe Walawi. Awo wose wereandikiloghe marina ghawo.

Ezra kulongoza wandu wifunge tumu na kulomba

²¹ Niko ngatangaza difunge tumu kaavui na Moda ghwa Ahava eri dipate kukusera imbiri ya Mlungu, na kumlomba udilongoze nicha chienyi na kudilindia isi na wana wedu na vilambo vedu vose.

²² Nerefueghe waya kumlomba mzuri wei udineke ijeshi ja masikari na wajoki farasi wedilindia na wamaiza chienyi, kwa kukaia nerekoghe namzera mzuri huwu kukaia Mlungu odu wadawirasimia awo wose wimrumiriagha, ela wadazamilwa na kuwikaba awo wose wimleghagha.

²³ Kwa huwo, dikafunga tumu, na kumlomba Mlungu udilindie, nao ukasikira kuvoya kodu.

Manosi kwa wundu ghwa Hekalu

²⁴ Niko ngasaghua wakohani kufuma kwa awo werekoghe vilongozi: Sherebia, Hashabia, na wandu wazima ikumi.

²⁵ Ngawipimia feza na dhahabu, na vombo ivo verefunyiroghe ni mzuri na wanjama wake, na wabaa wake, na wandu wa Israeli vitumiloghe Hekalunyi, ngavineka wakohani.

²⁶ Nani nerewipimieghe huwu: feza tani ra kimetriki mirongo iwi na iwi, vombo va feza ighana jimweri va kilo mirongo mfungade, dhahabu kilo elfu idadu na maghana ana,

²⁷ bakuli mirongo iwi ra kilo wunyanya na pointi inya, bakuli iwi righokie ra shaba gharama yaro ikatane na rija ra dhahabu.

²⁸ Niko ngawizera, “Inyo mwaelie kwa wundu ghwa BWANA, na vombo mfunyire kwa Mlungu na weke ndeyo va feza na dhahabu, vaelie.

²⁹ Muvilindie na ndighi hata mwavika Hekalunyi. Muvipime aho chumbenyi cha wakohani, nao muvineke vilongozi va wakohani na Walawi na kwa vilongozi va wandu wa Israeli.”

³⁰ Niko awo wakohani, na Walawi wikawada iyo feza na dhahabu, na ivo vombo, wikavighenja Hekalunyi aho Jerusalemu.

Kuwuya Jerusalemu

³¹ Ituku ja ikumi na iwi ja mori ghwa imbiri dikafuma Moda ghwa Ahava kughenda Jerusalemu. Mlungu odu orekoghe andwamweri nesi na kudilindia disekabo ni wamaiza na wandu wedilaliria chienyi.

³² Dikavika Jerusalemu; dikahoresha kwa matuku adadu.

³³ Ituku ja kana, dikangia andenyi ya Hekalu, dikaipima feza, dhahabu na vombo; dikavineka mkohani Merimothi mwana wa Uria, wikanye na Eleazari mwana wa Finehasi; nawo werekwanyeghe na Walawi, Jozabadi mwana wa Jeshua, na Noadia mwana wa Binui.

³⁴ Vilambo vose veretaliloghe na kupimwa, na wulemeri ghwa kula kindo, ghoreandikiloghe.

³⁵ Ngelo iyo, wandu wose werewurieghe kufuma wubarishonyi werefunyireghe vizongona vekora kwa Mlungu wa Israeli. Werefunyireghe njau ikumi na iwi kwa wundu ghwa Waisraeli wose, bauru mirongo ikenda na irandadu, na wana wa ng'ondi mirongo mfungade na mfungade; wokoni wikafunya fwandi ikumi na iwi kukuelesha na kaung'a. Ivi vose verekoghe vizongona vekora va kumfunyira BWANA.

³⁶ Wokoni wikareda barua ereandikiloghe ni mzuri wikawineka wabonyi nguma na wabaa wa isanga jiko magharibi ya Moda ghwa Eufrate; wikawitesia awo wandu chiaimweri na wutasi ghwaro Hekalunyi.