EZRA 7 - Biblia Ilagho Jiboie Kwa Wandu Wose

Ezra kuvika Jerusalemu

¹ Nyuma ya miaka imu, ngelo Artashasta mzuri wa Pashia orekoghe ukibonya nguma, korekoghe na mundu uwangwaghwa Ezra mwana wa Seraia; wawae Azaria, wa Kichuku cha Hilkia,

² wa Kichuku cha Shalumu, Zadoku, Ahitubu,

³ Amaria, Azaria, Meraiothi,

⁴ Zerahia, Uzi, Buki,

⁵ Abishua, Finehasi, Eleazari na Mkohani M'baa Haruni.

⁶ Uo Ezra, orejokieghe Jerusalemu kufuma Babuloni. Orekoghe mwalimu wa Sharia ukufudishire sharia ya Musa loli-loli, iyo BWANA Mlungu oreifunyireghe; mzuri ukamneka vose orelombieghe angu orekoghe na irasimio ja BWANA Mlungu wake.

⁷ Wokoni ugho mwaka ghwa mfungade ghwa kubonya nguma kwa Mzuri Artashasta, wandu wamu wa Israeli werejokieghe Jerusalemu chiaimweri na wakohani wamu na Walawi, na wabori, na walindiri wa Hekalu, na wadumiki wa Hekalu.

⁸ Ezra ukavika Jerusalemu mori ghwa kasanu ghwa ugho mwaka ghwa mfungade ghwa mzuri.

⁹ Ezra orekoghe wazoya kujoka kufuma Babuloni ituku ja imbiri ja mori ghwa imbiri, na ituku ja imbiri ja mori ghwa kasanu, ukavika Jerusalemu, angu orenekeloghe ndighi ni Mlungu wake.

¹⁰ Uo Ezra orekoghe wapata ngolo ekufundisha Sharia ya BWANA, na kuikatisha, upate kufundisha malaghiro na mawonyero gha BWANA andenyi ya Israeli.

Barua erenekeloghe Ezra ni Mzuri Artashasta

¹¹ Ihi ni barua iyo Mzuri Artashasta oremnekieghe Ezra, mkohani sena mwalimu wa Sharia; ufundishiro malaghiro gha BWANA na sharia rake kwa wundu ghwa wandu wa Israeli:

¹² “Ini Artashasta mzuri wa wazuri nakuandikia Ezra, mkohani sena mwalimu wa Sharia ya Mlungu wa mlungunyi.

¹³ “Nakulaghira kukaia mndungi wa wandu wa Israeli, angu wakohani wawo, angu Walawi wiko andenyi ya wuzuri ghwapo wikunde kukufunya weni wighende Jerusalemu mwadima kwendanya.

¹⁴ Ini chiaimweri na wanjama wapo mfungade, nakuduma kwendemanya malagho aighu ya Juda na Jerusalemu ngera wawuyakaia wada kunughana na sharia ya Mlungu wako iyo kuko nayo.

¹⁵ Wokoni kudo dhahabu na feza iyo niifunyire na wanjama wapo kwa Mlungu wa Israeli, uo Hekalu yake iko Jerusalemu.

¹⁶ Sena kuwade feza yose na dhahabu kwawuyawusa kufuma kwa wandu isanga jose ja Babuloni, na mafunyo ghose ghifunyiro kwa ngolo ni wandu wa Israeli na wakohani wawo, kwa kukunda kwawo kwa wundu ghwa Hekalu ya Mlungu wawo iyo iko Jerusalemu.

¹⁷ “Kutumie pesa iro nicha. Kughuo njau, bauru, na wana wa ng'ondi, chiaimweri na mafunyo ghawo gha viro na mafunyo gha kunywa; kuvifunye aighu ya madhabahu gha Hekalu iko Jerusalemu.

¹⁸ Masighariko gha feza na dhahabu mwadima kubonya sa iji mchaawona kunughana na lukundo lwa Mlungu onyu.

¹⁹ Ivo vilambo va wudumiki ghwa Hekalu ya Mlungu wako kunekelo, kuvighenje kwa Mlungu uko Jerusalemu.

²⁰ Kilambo chingi chikundikie kwa wundu ghwa Hekalu, kwadima kuchipata kufuma kwa mali ya mzuri.

²¹ “Na ini, Mzuri Artashasta nafunya momu kwa wawiki pesa wose wa isanga ja magharibi ya Moda ghwa Eufrate huwu: Ijo jose Ezra mkohani na mwalimu wa Sharia ya Mlungu wa mlungunyi uchaajikunda konyu, mjibonye kwa kufunga ndighi kose.

²² Ukakunda hata kilo elfu idadu na maghana ana ra feza, kilo elfu ikumi ra ngano, lita elfu iwi ra divei, lita elfu iwi ra mavuda, na chumbi chisene mtalo.

²³ Ijo jose jichaakundwa ni Mlungu wa mlungunyi, jibonyo jose kwa wundu ghwa Hekalu; machu ghake ghisecheaka aighu ya isanga japo na wana wapo.

²⁴ Ndemuna rusa elomba kodi angu wushuru kwa mkohani ungi, Walawi, wabori, walindiri, angu wadumiki wa Hekalu, angu wadumiki wazima wa iyo Hekalu.

²⁵ “Na oho Ezra, kunughana na hikima ya Mlungu wako iyo ukunekie, kuwike wabaa na watanyi widimagha kuwitanya wandu isangenyi jiko magharibi ya Moda ghwa Eufrate awo wiichi na kuinugha Sharia ya Mlungu wako. Kuwifundishe awo wiseichi iyo sharia.

²⁶ Mndungi ukalegha kuisikira Sharia ya Mlungu wako, na sharia ya wuzuri, uchatanywa karakara; ngera ni kubwaghwa, angu kubarishwa, angu kusokwa mali rake angu kufungwa jela.”

Ezra kumkasa Mlungu

²⁷ Ezra ukaghamba, “BWANA, uo Mlungu wa weke aba ndekaso! Wam'bonyere mzuri ukunde kuibonyera ishima Hekalu iyo iko Jerusalemu.

²⁸ Narumirikie imbiri ya mzuri kwa mvono ghwa Mlungu; hata kwa wanjama wake, na wabaa wake wiwadie ndighi. BWANA Mlungu wapo waninekie wuwana ghodeda na kuwinyavurisha ngolo wabaa wa vichuku va Israeli wipate kuwuyanya na ini.”