EZRA 6 - Biblia Ilagho Jiboie Kwa Wandu Wose

Malaghiro gha Mzuri Koreshi kuwoneka sena

¹ Niko Mzuri Dario ukafunya momu maandiko gha kala ghizighano kufuma nyumbenyi ya vilambo va kala va Babuloni.

² Ela vikaachawoneka andenyi ya muzi ghwa Ekbatana isanga ja Media. Aho niko chuo cherewonekieghe chiandikilo huwu:

³ “Mwaka ghwa imbiri ghwa kubonya nguma kwa Koreshi, orefunyireghe momu kukaia Hekalu iko Jerusalemu iagho sena; andu vizongona vifunywagha, na vizongona vikorwagha. Hekalu iyo ikaie na wuighu ghwa meta mirongo iwi na mfungade na wushapa ghwaro meta mirongo iwi na mfungade wokoni.

⁴ Wurigha ghuagho malala adadu kwa magho mabaa, na ilala jimweri kwa mbau, na gharama raro rilipo ni mfuko ghwa wuzuri.

⁵ Wokoni vombo va dhahabu na feza va Hekalu ivo Nebukadnezari orevifunyireghe Hekalunyi iko Jerusalemu na kuvidwa cha Babuloni viwunjo Hekalunyi iko Jerusalemu kula chimu andu kwaro.”

Dario kulaghira kazi ibonyo

⁶ Mzuri Dario ukaghenja matumbulio seji inughagha, “Kwa Tatenai, m'baa wa isanga jiko magharibi ya Moda ghwa Eufrate, Shethar-bozenai, na wambenyu wabaa wa masanga ghiko magharibi ya Moda ghwa Eufrate. “Injikenyi Hekalunyi

⁷ msengirie iyo kazi eiagha. Msighenyi m'baa wa Juda na waghosi wa kiyahudi wiiaghe iyo Hekalu ya Mlungu indo ja kawi andu erekoghe.

⁸ Aighu ya agho, namlaghira muwitesie kuiagha. Gharama raro rilipo ni mfuko ghwa wuzuri ripatikagha kufuma kwa kodi ipatikagha masanga gha magharibi ya Moda ghwa Eufrate, eri kazi isenono.

⁹ Kula ituku msekose kuwineka wakohani icho chose wichaakunda aho Jerusalemu; ngera ni wana wa njau, bauru angu ng'ondi kwa wundu ghwa vizongona vekora kwa Mlungu wa mlungunyi, angu ngano, munyu, divei, angu mavuda; wineko kuseko kukosa.

¹⁰ Malagho agho ghibonyo eri widime kumfunyira Mlungu wa mlungunyi vizongona viboie, winilombie na wana wapo.

¹¹ Wokoni nalaghira angu mndungi ukeghalusa sharia ihi, mkabo ghucharuchulwa kufuma nyumbenyi kwake ghusongolo nao udungo nagho, na nyumba yake ichabonywa kukaia sa tungasi.

¹² Mlungu uo oreisaghueghe Jerusalemu kukaie andu komtasira, ndemsime mzuri uo ose, angu wandu wichaakunda kughalusa momu ughu angu kukunda kuinona iyo Hekalu iko Jerusalemu. Ini Dario nabonya ilaghiro, nani nakunde jisikiro kwa kufunga ndighi kose.”

Hekalu kuwikwa wakfu

¹³ Niko Tatenai m'baa wa isanga jiko magharibi ya Moda ghwa Eufrate, na Shethar-bozenai, na wambao, wikabonya sa iji koni Mzuri Dario orelaghirieghe.

¹⁴ Vilongozi va Kiyahudi wikachuria kuagha na kuwona nicha kwa kusikira machilo gha Mlodi Hagai na Zekaria mwana wa Ido. Wikameria iaghi jawo sa iji koni werelaghiriloghe ni Mlungu wa Israeli, na kwa malaghiro gha Koreshi, na Dario, na Artashasta wazuri wa Pashia.

¹⁵ Hekalu ihi eremereloghe ituku ja kadadu ja mori ghwa Adari, mwaka ghwa karandadu ghwa kubonya nguma kwa Mzuri Dario.

¹⁶ Wandu wa Israeli, wakohani na Walawi, na wandu wose werewurieghe kufuma wubarishonyi, wikaiwika iyo Hekalu wakfu kwa kuboilwa.

¹⁷ Wikafunya kwa wundu ghwa kuwika Hekalu wakfu njau ighana jimweri, bauru maghana awi, wana wa ng'ondi maghana ana, na kizongona kwa wundu ghwa kaung'a, oro ikumi na iwi kunughana na mbari ikumi na iwi ra Israeli.

¹⁸ Wikawika wakohani kwa mafungu ghawo, na Walawi kwa mazughe seji iandikilo chuonyi kwa Musa wibonyeghe wutasi ghwa Mlungu aho Jerusalemu.

Pasaka

¹⁹ Wandu werewurieghe kufuma wubarishonyi werebonyereghe Pasaka ituku ja ikumi na inya ja mori ghwa imbiri, ugho mwaka ghunughie.

²⁰ Wakohani wose na Walawi werekoghe wakuelesha weni wose, wikakaia wielie. Walawi wikabwagha ng'ondi ya Pasaka kwa wundu ghwa wandu wose wiwurie kufuma wubarishonyi, kwa wundu ghwa wakohani wambao, na kwa wundu ghwawo weni.

²¹ Erejiloghe ni wandu wa Israeli werewurieghe kufuma wubarishonyi, na wokoni erejiloghe ni kula umu orekukwanyireghe nawo, na kukutanya na uko kunoneka kwa waisanga, na kwa awo werechieghe kumtasa BWANA uo Mlungu wa Israeli.

²² Wikabonya Ndima ya Mkate Ghusewadie Chachu matuku mfungade kwa kuboilwa; angu BWANA orewinekieghe kuboilwa ukam'bonya mzuri wa Ashuru uwikunde, hata ukawitesia kazi eagha Hekalu ya Mlungu, uo Mlungu wa Waisraeli.