EZRA 5 - Biblia Ilagho Jiboie Kwa Wandu Wose

¹ Ngelo iyo, walodi wawi Hagai na Zekaria mwana wa Ido wikafunya wulodi kwa Wayahudi werekoghe Juda na Jerusalemu kwa irina ja Mlungu wa Israeli uo orekoghe aighu yawo.

² Niko Zerubabeli mwana wa Shealtieli na Jeshua mwana wa Jehosadaki wikawuya na kuzoya kuagha sena Hekalu iko Jerusalemu, na walodi waja wawi wikawitesia.

³ Ahoeni Tatenai m'baa wa isanga ja magharibi ya Moda ghwa Eufrate, Shethar-bozenai na wambao wikacha na kuwizera Wayahudi, “Nani umnekie malaghiro gheagha ihi Hekalu na kuimeria?”

⁴ Wokoni wikakotia marina gha wandu weretesiagha kuagha Hekalu.

⁵ Ela Mlungu orekoghe ukiwizighana waghosi wa Kiyahudi, na awo wabaa ndewerewighirieghe kuagha hata wighenje malagho kwa Dario na matumbulio gha barua aighu ya ilagho ijo ghiwuye.

⁶ Ihi niyo kopi ya barua iyo Tatenai m'baa wa isanga ja kimonu cha Moda ghwa Eufrate na Shethar-bozenai na wambao wabaa wa isanga ja magharibi ya Moda ghwa Eufrate weremghenjereghe Mzuri Dario.

⁷ Wikamghenjera ripoti iandikilo huwu: “Mzuri Dario, kubonye nguma kwa sere.

⁸ Dereghendieghe isanga ja Juda ee mzuri, dikakua Hekalu ya uo Mlungu m'baa ikiaghwa na magho mabaa na mbau rawikilo wurighenyi. Kazi iyo yawuyabonywa kwa wuya m'baa, nayo yawuyaendelia nicha.

⁹ “Niko dikawikotia vilongozi widighorie ngera nani uwinekie rusa eagha iyo Hekalu sena na kuimeria.

¹⁰ Wokoni dikawikotia marina ghawo dipate kukumanyisha marina gha awo wiko vilongozi.

¹¹ “Wikaditumbulia huwu, ‘Isi de wadumiki wa Mlungu wa mlungunyi na ndoenyi, nesi diaagha nyumba ereaghiloghe miaka mingi isirie, iyo mzuri m'baa wa Waisraeli oreiaghieghe na kuimeria.

¹² Ela kwa kukaia weke aba werem'bonyereghe Mlungu wa mlungunyi kujokwa ni machu, orewifunyireghe na kumneka Nebukadnezari mzuri wa Babuloni, Mkaldayo uo oreinonieghe Hekalu ihi na kudwa wandu wunyika noko cha Babuloni.

¹³ Niko mwaka ghwa imbiri ghwa kubonya nguma kwa Mzuri Koreshi wa Babuloni, Koreshi orefunyireghe momu Hekalu ihi iagho sena.

¹⁴ Ukavifunya vombo va dhahabu na feza, ivo Nebukadnezari orevidwaeghe kufuma Hekalunyi iyo erekoghe Jerusalemu na kuvighenja hekalunyi ya milungu yake Babuloni, ukavineka mndumu orewangwagha Sheshbaza uo oremmbikieghe m'baa wa isanga ja Juda.

¹⁵ Ukamzera, “Wada ivi vombo kughende kuviwike Hekalunyi iko Jerusalemu, na Hekalu iyo iagho aeni erekoghe.”

¹⁶ Niko uo Sheshbaza ukacha ukaagha misingi yaro, na kufuma ngelo iyo, kazi eagha yaduagha ikiendelea, nayo yaduagha isesirie.’

¹⁷ “Kwa huwo kukawona nicha ee mzuri wandu ndewizighane aghadi ya vilambo va kala va kiwuzuri wiwone ngera gheko malaghiro gherefunyiroghe ni Mzuri Koreshi ghikundagha Hekalu ihi iko Jerusalemu iagho sena; nao kudighorie lukundo lwako aighu ya ilagho iji.”