EZEKIELI 9 - Biblia Ilagho Jiboie Kwa Wandu Wose

Kukabwa kwa Jerusalemu

¹ Niko ngasikira Mlungu ukiwanga kwa lwaka lubaa ukighamba, “Soghodenyi kaavui inyo wandu weghukaba ughu muzi; kula mundu udo iswagha jake jenona.”

² Shwa wori ngawona wandu warandadu wacha kufuma chia ya mbenge ya lughu ya Hekalu ilangayagha cha kaskazinyi; kula umu uko na iswagha jake jebwagha mkonunyi kwake. Werekwanyeghe na mndumu urwae nguwo ya kitani, uwadie kilambo cheandika luwarunyi kwake. Wikaghenda na kukaia kimusi kaavui na madhabahu ya shaba.

³ Na wubaa ghwa Mlungu wa Israeli ghorekoghe ghwajoka kufuma kwa uo kerubi, andu ghorekoghe ghukikaia, na kuida cha mnyangonyi ghwa Hekalu. BWANA ukammbanga uo mundu orerwaeghe nguwo ya kitani, uo orekoghe uwadie kilambo cheandika luwarunyi kwake.

⁴ BWANA ukamzera, “Ghenda mzinyi kose, aghadi ya Jerusalemu, kuwibonye alama chamunyi wandu wiko na wasi na kulilia ughu muzi kwa wundu ghwa wuchafu ghose ghwawuyabonywa andenyi yaro.”

⁵ Na kwa awo wazima ukaghamba ngisikira, “Mnughenyi muide aghadi ya muzi m'bwaghe; mselekie hata msefuye wughoma.

⁶ M'bwaghe putu waghosi, wadawana na wai, wana watini na waka; ela mseadade mndungi uko na alama chamunyi kwake; moozoia ahaeni Hekalunyi.” Niko wikazoya na waghosi aweni werekoghe Hekalunyi.

⁷ Niko Mlungu ukawizera, “Lushenyi iyo Hekalu, mchure waza raro na gharia; zoenyi kazi.” Niko wikafuma na kuzoya kubwagha wandu mzinyi.

⁸ Hata iji werekoghe wikibwagha, nani ii chia naasigharika niekeri, ngaghwa kiwushu-wushu ngalila ngighamba, “Ai, e Bwana MLUNGU! Kuabwagha masighariko ghose gha Israeli kwa wundu ghwa machu kwakaia nagho aighu ya Jerusalemu?”

⁹ Nao ukanizera, “Kaung'a ra wandu wa Israeli na wandu wa Juda raaka mbaa nandighi; wandu wachulwa ni kudiana bagha isangenyi, na hachi kusoweka andenyi ya muzi ghwa Jerusalemu; angu waghamba, ‘BWANA wamerie kujisigha isanga; na BWANA ndewuewona.’

¹⁰ Ela ini sichaalekia, hata sichaafuya wughoma, ela nichawilipa karakara na mabonyo ghawo.”

¹¹ Nani ngammbona uja mundu orerwaeghe nguwo ya kitani, uwadie chuo cheandika a luwarunyi kwake wawuya kwa BWANA ukighamba, “Nameria kubonya sa iji koni kunilaghirie.”