EZEKIELI 10 - Biblia Ilagho Jiboie Kwa Wandu Wose

Wubaa ghwa BWANA kusigha Hekalu

¹ Niko ngazighana, ngawona aighu mawingunyi gherekoghe naighu ya vongo va makerubi, kilambo chimu chifwanane na kifumbi cha nguma chibonyero na igho ja safire.

² Mlungu ukamzera uja mundu orerwaeghe nguwo ya kitani, “Ghenda aghadi ya magurudumu ghimaragha nandonyi ya uo kerubi, kubeghe ngonde ichue ya maka gha modo ghiko ghadi na ghadi ya uo kerubi, kughisasare aighu ya ugho muzi.” Nao ukaghenda ngimzighanira.

³ Na agho makerubi gherekoghe ghikikaia kimusi chia ya kusinyi ya Hekalu, iji uo mundu orengiagha; iwingu jikafinikira waza ya nandenyi.

⁴ Wubaa ghwa BWANA ghukajoka kufuma kwa agho makerubi, hata mnyangonyi ghwa Hekalu, na iwingu jikachua andenyi ya Hekalu; waza ikachulwa ni mwengere ghwa wubaa ghwa BWANA.

⁵ Lwaka lwa mawawa gha makerubi loresikiroghe hata waza ya shighadi, sa lwaka lwa Mlungu Uo-Uwadie-Ndighi-Rose ingelo wakadeda.

⁶ Hata iji BWANA oremlaghirieghe uja mundu urwae nguwo ya kitani, kushoa maka ghamu gha modo, kufuma ghadi na ghadi ya agho magurudumu agho gherekoghe nandonyi ya agho makerubi, uja mundu ukaghenda na kukaia kimusi mbai na mbai ya igurudumu jimu.

⁷ Na ikerubi jimu jikaghorua mkonu ghwake kufuma ghadi na ghadi ya agho makerubi, hata modonyi ugho ghorekoghe ghadi na ghadi yawo; ukawusa modo ghumu na kughuwika mikonunyi kwa uo mundu orerwaeghe nguwo ya kitani; nao ukaghuwusa na kufuma.

⁸ Agho makerubi gherekoghe ghikiwoneka na kilambo sa mkonu ghwa mdamu nandonyi aisi ya mawawa ghawo.

⁹ Nani ngazighana ngawona korekoghe na magurudumu ana a chuwarunyi ra makerubi; kula ikerubi igurudumu jimweri luwarunyi kwake; na kuwoneka kwaro agho magurudumu ni sa krustali ing'alaa-ng'ala.

¹⁰ Fwana raro redeeka rifwanane; magurudumu ghose ana ghedefwanana seji kula jimu jeeka andenyi ya mmbao.

¹¹ Ngelo gherekoghe ghikighenda kulangaya imu ya mbembe inya, ghereghendieghe kuseko na kughaluka; ela andu uko kose igurudumu ja imbiri jeremarieghe, agho mazima ghose gherenughieghe wokoni kuseko na kughaluka.

¹² Vidanga va agho magurudumu, na chuzi raro, na magurudumu verekoghe na meso chia rose, ee, magurudumu gha agho makerubi ana.

¹³ Seji nisikire magurudumu agho ghikiwangwa, gherewangiloghe magurudumu gha kikulughulu.

¹⁴ Kula jimu ja agho makerubi jerekoghe na mawushu ana. Wushu ghwa imbiri ghodeeka ghwa ikerubi, wushu ghwa kawi ghodeeka ghwa mdamu, wushu ghwa kadadu ghodeeka ghwa shimba, na wushu ghwa kana ghodeeka ghwa indu.

¹⁵ Na agho makerubi ghikajoka nokoighu; (agho nigho gheni rija nyamandu riko moyo nereriwonieghe aho Moda ghwa Kebari.)

¹⁶ Iji agho makerubi ghereghendieghe, ghereghendanyeghe na magurudumu ghiko chuwarunyi kwawo. Wokoni iji gherewusireghe mawawa ghawo kujoka nokoighu, agho magurudumu ndegherefumieghe chuwarunyi kwa agho makerubi ela gherejokieghe chiaimweri nagho.

¹⁷ Ngelo gherekaieghe duu, na magurudumu gherekaieghe duu wokoni, ghiendajoka nokoighu, na magurudumu gherejokieghe wokoni; angu iyo roho ya rija nyamandu erekoghe andenyi yaro.

¹⁸ Niko wubaa ghwa BWANA ghukafuma aho mnyangonyi ghwa Hekalu, ghukamanga aighu ya makerubi.

¹⁹ Makerubi ghikakuchua mawawa ghawo, ghikaburuka kufuma ndoenyi ngizighanira ingelo gherekoghe ghikighenda, na magurudumu ghiko chuwarunyi rawo; ghikaghenda na kukaia kimusi a mnyangonyi chia ya mashariki ya mbenge ya Hekalu ya BWANA; wubaa ghwa Mlungu wa Israeli ghukakaia aighu yawo.

²⁰ Iro ni rija nyamandu reni nereriwonieghe riko nandonyi ya Mlungu wa Israeli aho Moda ghwa Kebari, ngawimanya kukaia awo ni makerubi.

²¹ Kula jimu jaro jerekoghe na mawushu ana, na mawawa ana; na aisi ya agho mawawa korekoghe na vilambo viwonekagha sa mikonu ya wadamu.

²² Mawushu gharo gherewonekieghe sa ghaja gheni nereghiwonieghe Moda ghwa Kebari; kula jimu jikakaia jikighenda kiimbiri.