EZEKIELI 1 - Biblia Ilagho Jiboie Kwa Wandu Wose

MAWONO GHA IMBIRI GHA WUBAA GHWA MLUNGU KWA EZEKIELI ( 1.1–7.27 ) Kifumbi cha nguma cha Mlungu

¹ Ituku ja kasanu ja mori ghwa kana, mwaka ghwa mirongo idadu, iji nerekoghe Moda ghwa Kebari, aghadi ya wandu wa Israeli weredwaloghe wunyika, mlungunyi korerughuloghe, ngawona mawono gha Mlungu.

² Ituku ja kasanu ja ugho mori, (nagho ni mwaka ghwa kasanu kufuma Mzuri Jehoiakini wadwalwa wunyika),

³ BWANA oreghorieghe na ini mkohani Ezekieli, mwana wa Buzi, andenyi ya isanga ja Babuloni, kaavui na Moda ghwa Kebari; ngasikira wulemeri ghwa ndighi ra BWANA aho.

⁴ Na iji nerekoghe ngizighana, ngawona kiremba kibaa cha mbeo chikiweta chia ra kaskazinyi, na iwingu ibaa jiko na mwengere ghujimarie chia rose; na modo ghukikumba lumu ngelo rose, na ghadi na ghadi ya ugho modo, kilambo chimu cherekoghe chiking'ala-ng'ala sa shaba.

⁵ Ghadi na ghadi ya icho kiremba, korewonekieghe fwana sa nyamandu riko moyo inya. Kuwoneka kwaro korekoghe huwu: rerekoghe na fwana sa ra wadamu,

⁶ ela kula imu erekoghe na mawushu ana, na mawawa ana.

⁷ Maghu ghawo gherekoghe ghighorokie, na chwau ra maghu ghawo, rerekoghe sa kochokocho ra ngache ring'alaa-ng'ala sa shaba izughulo.

⁸ Nandonyi ya mawawa ghawo, rerekoghe na mikonu ya wadamu. Huwu niko rerekoghe: mawushu ana, na mawawa ana, na mikonu ya wadamu ina.

⁹ Mawawa ghawo ghereadadaneghe, kula imu erekoghe ikighenda kiimbiri kuseko na kughaluka.

¹⁰ Mawushu ghawo gherekoghe huwu: kula wushu ghorekoghe na fwana ya mdamu naimbiri, fwana ya shimba luwaru lwa kiwomi, fwana ya ng'ombe luwaru lwa kiwaka, na fwana ya indu luwaru lwa nanyuma.

¹¹ Huwo niko mawushu ghawo gherekoghe. Mawawa ghawo ghereghorokieghe noko ighu; kula nyamandu erekoghe na mawawa awi, kula iwawa jimu jikiadada iwawa ja mmbao; na ghaja mawawa ghamu awi gherefinikireghe mimbi yawo.

¹² Kula nyamandu ikakaia ikighenda imbiri andu kose roho yawo erekundieghe kughenda; na iro nyamandu rikaghenda wokoni kuseko na kughaluka.

¹³ Ghadi na ghadi ya iro nyamandu riko moyo, korekoghe na kilambo chimu chiwonekagha sa maka gha modo, sa tochi riakagha ii chia na ii chia aghadi ya iro nyamandu riko moyo, na ugho modo ghorekoghe ghukiaka nandighi; na kufuma kwa ugho modo lorefumieghe luhehia.

¹⁴ Iro nyamandu riko moyo rerekoghe rikikimbia naimbiri na nanyuma sa luhehia luakagha.

¹⁵ Idana iji nerekoghe ngizighanira iro nyamandu riko moyo inya, nerewonieghe igurudumu ndoenyi jiko luwarunyi kwa kula nyamandu jikiadada andoenyi.

¹⁶ Magurudumu gharo gherebonyeroghe ghifwane huwu: Gherekoghe ghiking'ala-ng'ala sa krustali, na ghose ana ghedefwanana. Kubonywa kwaro kodewoneka sa igurudumu jingiagha andenyi ya igurudumu mmbao.

¹⁷ Iji gherekoghe ghikighenda, ghereghendieghe chiaimweri chia iyo yose ya mbembe raro inya, kuseko na kughaluka ii chia angu ii chia.

¹⁸ Agho magurudumu ana gherekoghe na vidanga na chuzi; na vidanga varo, verechuloghe ni meso chia rose.

¹⁹ Hata iji iro nyamandu riko moyo rerekoghe rikighenda, agho magurudumu ghereghendanyeghe naro, na iji rerewukieghe noko ighu, agho magurudumu ghikawukanya naro.

²⁰ Andu kose roho yawo erekundieghe righende, iro nyamandu rereghendieghe, na agho magurudumu ghikawukanya naro, kwa kukaia roho ya iro nyamandu riko moyo erekoghe andenyi ya agho magurudumu.

²¹ Iji iro nyamandu rereghendieghe, na agho magurudumu wokoni ghereghendieghe; iji reremangeghe kimusi na agho magurudumu gheremangeghe, na iji gherewukieghe, ghikawuka chiaimweri naro; kwa kukaia roho ya iro nyamandu riko moyo edeeka andenyi ya agho magurudumu.

²² Naighu ya vongo va iro nyamandu riko moyo, korekoghe na kilambo chiwonekagha sa mawingunyi ching'alaa-ng'ala sa kilole chielie nandighi chialilo naighu ya vongo vawo.

²³ Na aisi ya mawingunyi, mawawa gha rija nyamandu gherekoghe ghaghorolwa, kula jimu cha kwa mmbao; na kula nyamandu, erekoghe na mawawa ghamu awi ghekufinikira mumbi ghwake.

²⁴ Hata iji rerekoghe rikighenda, neresikireghe lwaka lwa mawawa ghawo sa lwaka lwa machi mengi, sa lukuwa lwa Uo Uwadie Ndighi Rose; ndoghoi yaro sa lwaka lwa ijeshi. Ngelo rakaia kimusi, rikakucha mawawa ghawo.

²⁵ Lukacha lwaka lufumie naighu ya mawingunyi naighu ya vongo vawo; na iji rerekaieghe kimusi kima, rikakucha mawawa ghawo.

²⁶ Naighu ya mawingunyi, agho gherekoghe naighu ya vongo vawo, korekoghe na kilambo chifwanane na kifumbi cha nguma chiko sa safire; na uo orechiserieghe orefwananeghe na mdamu.

²⁷ Kufuma andu korekoghe kukiwoneka sa kiwonu chake kujoka nokoighu kwa uo orefwananeghe na mdamu, nerewonieghe seji ni shaba iakaaka, seji ni modo ghwarighirilwa kiwonunyi; na kufuma andu korewonekieghe sa kiwonu chake kughenda nokoisi, nerewonieghe seji ni modo, na kung'ala-ng'ala koremmarieghe chia rose.

²⁸ Sa lusenge lwa vua luko mawingunyi ngelo ya vua kunya, niko uko kung'ala-ng'ala kwaro korekoghe kwammara chia rose. Kuwoneka uko kodefwanana na wubaa ghwa BWANA. Nani iji nerehuwonieghe ugho wubaa, nereghueghe andonyi kiwushu-wushu, ngasikira lwaka lwa mndumu udedagha.