ESTA 7 - Biblia Ilagho Jiboie Kwa Wandu Wose

¹ Nao mzuri na Hamani wikaghenda kuja karamu na Malkia Esta.

² Nao ijo ituku ja kawi, iji werekoghe wikinywa divei, mzuri ukamkotia Esta sena, “Kwakunde kii Malkia Esta? Kuchanekwa. Ilombi jako niki? Hata ngera ni nusu ya wuzuri ghwapo, jichakatishwa.”

³ Niko Malkia Esta ukamtumbulia, “Ngera loli narumirikia imbiri kwako ee mzuri, iji kwakunda, haja yapo ni ini moni nikaie moyo, na ilombi japo ni wandu wapo nawo wikaie moyo.

⁴ Kwa kukaia ini, na wandu wapo damerie kuuzwa, eri dibwagho kuseko na wughoma ghungi, dimerelo putu. Ngera wei dedeuzwa dikaie wazumba womi na waka, sakaiagha na ilagho jingi jekusumbua, nadakaia kima. Kwa kukaia wasi ghodu ndeghudimagha kukatanishwa na hasara mzuri uchaipata.”

⁵ Nao mzuri Ahasuero ukamkotia Malkia Esta, “Nani udimagha kubonya ilagho jifwane huwo? Oko hao uo mundu?”

⁶ Esta ukatumbulia, “M'maiza na mkorongi odu ni uhu mundu mmbiwi Hamani!” Nao Hamani ukangilwa ni wowa m'baa imbiri ya Malkia na mzuri.

⁷ Mzuri ukawuka karamunyi kwa machu, ukafuma na kughenda cha mbuwenyi ra ngome. Hamani ukawona kukaia mzuri ookunda kumneka ikabo; ukasigharika eri umvoye Malkia Esta ujikire irangi jake.

⁸ Nao mzuri ukawuya sena chumbenyi andu werekoghe wikinywa divei, ukamkua Hamani wakukumba andonyi kochinyi kwa Esta; ukaghora kwa lwaka, “Wele ngai, umundu ookunda kumdidika malkia imbiri yapo, sena andenyi ya ngome yapo!” Mzuri usendeemeria kudeda woruwo, weke kolowi wikamfinikira chongo Hamani.

⁹ Nao Harbona, umu wa waja weke kolowi wimdumikiagha mzuri ukaghamba, “Sena huwu odeeka waboisa mudi ghom'bwagha Mordekai kwa kummbanika; uja orekirieghe irangi jako ee Mzuri. Mudi ghuko na wulacha ghwa meta mirongo iwi na iwi, huwu ghoko kwake!” Nao mzuri ukafunya momu, “Mmbanikenyi aighu ya ugho mudi ghoni.”

¹⁰ Nao Hamani ukabwaghwa kwa kuwanikwa lugha aighu ya ugho mudi ghoni oreghuboisireghe kwa wundu ghwa kum'bwagha Mordekai. Machu gha mzuri ghikahoa.