ESTA 3 - Biblia Ilagho Jiboie Kwa Wandu Wose

Hamani kubonya njama ewimeria Wayahudi

¹ Nao nyuma ya matuku ghamu, mzuri Ahasuero ukamjosa daraja Hamani, ukawuya waziri m'baa. Hamani orekoghe ni mwana wa Hamedatha wa kivalwa cha Agagi.

² Nao mzuri ukalaghira wadumiki wose wa serikali wimsikire Hamani kwa kumghoghomia na kumdungia ngokoro; ela Mordekai oreleghieghe kubonya huwo.

³ Nao wadumiki wamu wa mzuri werekoghe mbengenyi ya ngome wikamkotia Mordekai, “Kwaki oho kumenyagha momu ghwa mzuri?”

⁴ Nawo wikakaia wikimzera agho malagho ituku ituku, ela Mordekai nderewisikireghe anduangi. Konyuma wikamghoria Hamani wipate kuwona ngera uo urumaghia iyo tabia ya Mordekai, kwa kukaia orekoghe wawimanyisha angu uo ni Myahudi.

⁵ Nao iji Hamani wamanya angu Mordekai ndewuemghoghomia hata kumdungia ngokoro, ukachulwa ni machu loli-loli.

⁶ Wiendamanyishwa angu Mordekai ni Myahudi, ukawona angu kumneka adhabu uekeri ndeikatagha. Ukabonya mpango ghowimeria Wayahudi wose, wandu wa kivalwa cha Mordekai wiko andenyi ya wuzuri ghwa Ahasuero.

⁷ Nao mwaka ghwa ikumi na iwi, ghwa kubonya nguma kwake mzuri Ahasuero, mori ghwa imbiri ghuwangwaghwa Nisani, Puri (Yaani kura) ikakabwa imbiri ya Hamani, upate ituku na mori ghufwanagha ghokatisha mpango ghwake. Ituku jerepatiroghe ni kura, ni ja ikumi na idadu ja mori ghwa ikumi na iwi, ghuwangwaghwa Adari.

⁸ Nao Hamani ukamzera mzuri, “Eko mbari imu ya wandu wisasarikie andu kose kwa wuzuri ghwako, nawo weko kula isanga. Wandu awa weko na sharia zima putu risefwanane na sharia ra wandu wazima. Chiaimweri na huwo, ndewinughagha sharia rako; kwa huwo kukeduarumaghianya nawo, ndewikufwanagha kilambo chingi.

⁹ Idana iji kwakunda ee mzuri, kufunye momu wandu awa witotesho, nani nalaghira kufunya feza kuchumba kilogramu maghana adadu na mirongo ina elfu, ritumilo kwa kazi ya wutawala andenyi ya wuzuri ghwako.”

¹⁰ Nao mzuri ukaifunya pete yake ya muhuri, uitumiagha kwa kukaba matangazo ghake, ukamneka Hamani mwana wa Hamedatha, wa kivalwa cha Agagi, m'maiza wa Wayahudi.

¹¹ Mzuri ukamzera Hamani, “Wandu wose chiaimweri na iro rose ni vako, bonya sa iji kukundagha.”

¹² Nao ituku ja ikumi na idadu ja mori ghwa imbiri, Hamani ukawiwanga waandiki wose wa mzuri. Ukafunya momu angu itangazo wajifunya, jifasirilo na kubonywa kopi rikate kwa viteto vose na maandiko ghitumilwaghwa andenyi ya ugho wuzuri, na kudumwa kwa wabaa wose wa masanga, watini na wabaa wori na vilongozi va mbari rose. Itangazo ijo jerefunyiroghe kwa irina ja mzuri Ahasuero, jikakabwa muhuri ghwa pete yake.

¹³ Barua iro rikanekwa watarashi wirimarishe masanga ghose; Wayahudi wose m'baa kwa mtini, waka kwa wana wibwagho kuseko na wughoma ghungi, sena wisoko mali rawo rose. Wibwagho kwa ituku jimweri, ijo ituku ja ikumi na idadu ja mori ghwa ikumi na iwi ghuwangwagha Adari.

¹⁴ Malagho gha itangazo iji gherekoghe ghimanyisho wandu wose, eri kula mundu ukuwike tayari kwa ituku ijo.

¹⁵ Kwa nguma ya mzuri, itangazo iji jerefunyiroghe kwa wandu wose, andenyi ya muzi m'baa ghwa Susa, na watarashi wikajimarisha isangenyi kose kwa shwa-shwa. Mzuri na Hamani wikasea kidombo kunywa, ela wandu wa muzi m'baa ghwa Susa, wikakambwa ni chongo.