ESTA 2 - Biblia Ilagho Jiboie Kwa Wandu Wose

Esta kunekwa Wumalkia

¹ Konyuma, machu gha mzuri Ahasuero ghiendahoa, ukamkumbuka Vashti seji ubonyere, na seji ufunyire momu isangenyi aighu yake.

² Niko awo wadumiki wimdumikiagha mzuri wikamzera, “Kwaki kuselolelwagha wai wamu wighokie?

³ Kwadima kusaghua wabaa wa isanga wa wuzuri ghwako, kuwidume wiwirede wai wose wighokie nyumbenyi ya waka, iko muzi ughu m'baa ghwa Susa. Wiwiko aisi ya wuzighaniri ghwa Hegai uja kolowi mzighaniri wa waka; awo wai wineko mavuda ghekuboisa nicha.

⁴ Niko aho mwai uchaakuboia, ubonyo kukaia malkia wulalo ghwa Vashti.” Ilagho ijo jikam'boia mzuri ukabonya woruwo koni.

⁵ Korekoghe na Myahudi umu andenyi ya muzi ghwa Susa, uwangwagha Mordekai mwana wa Jairi, mwana wa Shimei, mwana wa Kishi, wa mbari ya Benjamini.

⁶ Mordekai orekoghe umu wa waja wandu weredwaloghe wunyika ngelo ya Jekonia mzuri wa Juda, iji orewadiloghe ni Nebukadnezari, mzuri wa Babuloni.

⁷ Nao orekoghe na mwamae uwangwagha Esta, uo orewangwaghwa kwa Kiebrania Hadasa. Orekoghe mwai ughokie uumbikie nicha. Wavi wake werefueghe, niko uo Mordekai ukamlela sa mwana wake tiki.

⁸ Nao iji momu ghwa mzuri ghwatangazwa worinyi, na wai wengi kuredwa ugho muzi m'baa ghwa Susa, Esta orekoghe andwamweri nawo. Nawo wose wikawikwa ngomenyi ya mzuri, aisi ya wuzighaniri ghwa Hegai, uja mlindiri wa waka.

⁹ Hegai ukaghokelwa ni Esta, ukakaia ukimpendelia; shwa wori ukamneka Esta mavuda na vindo viboie. Sena aighu ya agho, ukamwinja kwa wambao ukammbika andu kuboie kuchumba andenyi ya iyo nyumba ya waka; ukamsaghuya wadumiki wa kiwai mfungade kufuma ngomenyi ya mzuri, wipate kumdumikia.

¹⁰ Esta orekoghe usekumanyishire uo moni kukaia ni wa mbari na kichuku cha Kiyahudi, angu Mordekai oremkanieghe usebonye huwo.

¹¹ Kula ituku Mordekai ukakaia ukiida-ida wazenyi kwa iyo nyumba ya waka, ukikunda kumanya seji Esta uko, na seji uchaabonyerwa.

¹² Wai werekoghe wikikuboisa nicha kwa meri ikumi na iwi, ima wighenjo kwa mzuri Ahasuero izughe kwa izughe. Meri irandadu ya imbiri weretumieghe mavuda gha manemane, na meri irandadu ya kutua, wikatumia mavuda gha marumba mazima.

¹³ Kula mwai orekoghe ukinekwa kindo icho chose orekundieghe kuchidwa kufuma kwa iyo nyumba ya waka, ughende nacho aho ngomenyi.

¹⁴ Ngelo eghenda, erekoghe ya nakenyi; nakesho mwai wadaghenjwa kwa nyumba zima ya waka, na kuwikwa aisi ya wuzighaniri ghwa Shaashgazi, kolowi owizighana waka wazumba wa mzuri. Mwai ungi nderedimagha sena kuwuya kwa mzuri, isaakaia mzuri waboilwa ni uo moni, na kumdumiria uwango kwa irina jake.

¹⁵ Ngelo yake eghenda kwa mzuri iendavika, Esta mwai wa Abihaili, mwamae Mordekai, uo oremlelieghe sa mwana wake, nderelombieghe kilambo chingi kizima kuchumba icho cheni orenekeloghe ni Hegai uja kolowi mzighaniri wa waka wa mzuri. Esta ukaghokia kula mundu oremmbonieghe.

¹⁶ Nao mwaka ghwa mfungade ghwa kubonya nguma kwake mzuri Ahasuero, mori ikumi na isanu ghuwangwaghwa Tebethi, Esta ukaghenjwa ngomenyi kwa mzuri.

¹⁷ Mzuri ukaboilwa ni Esta kuchumba waka wazima wose. Ndekuwadie ungi sena orerumirikieghe mesonyi kwake kuchumba uo. Nao mzuri ukamngira kirumbu cha kiwuzuri chongonyi kwake, ukam'bonya ukaie malkia wulalo ghwa Vashti.

¹⁸ Ukabonya karamu mbaa, kwa wundu ghwa ishima ja Esta; ukawiwanga vilongozi na wadumiki wa serikali. Sena mzuri ukafunya momu ijo ituku jikaie jehora kwa masanga ghose, ukafunya manosi malazi gha kiwuzuri.

Mordekai kuvuvua irangi ja mzuri

¹⁹ Nao iji wai werekwanyikieghe indo ja kawi, Mordekai orekoghe kidombo mbengenyi ya mzuri.

²⁰ Esta orekoghe usekumanyishire uo moni mbari na kichuku chake; angu Mordekai oremkanieghe nandighi usetime kubonya huwo, na Esta ukamsikira sa iji koni orekoghe ukimsikira ngelo ya wanake ghwake, iji orekoghe ukimlela.

²¹ Matuku agho, iji Mordekai orekoghe kidombo mbengenyi ya mzuri, Bigthana na Tereshi, wawi wa awo weke kolowi welindia vumba va mzuri, werebonyereghe machu, wikabonya njama em'bwagha mzuri Ahasuero.

²² Nao Mordekai ukaimanya iyo njama, ukammanyisha Malkia Esta, nao ukamghoria mzuri seji waghorelwa ni Mordekai.

²³ Nao iji malagho ghapelelezwa na kuwoneka kukaia gha loli, niko awo wandu wawi wikabwaghwa kwa kuwanikwa mudinyi. Mzuri ukafunya momu malagho agho ghiandiko chuonyi cha wukumbuso cha wuzuri.