DANIELI 9 - Biblia Ilagho Jiboie Kwa Wandu Wose

Danieli kuwilombia wandu wake

¹ Dario mwana wa Ahasuero, mvalwa wa Wamedi, orebonyeroghe kukaia mzuri wa Babuloni.

² Mwaka ghwa imbiri ghwa kubonya nguma kwake, ini Danieli nerekoghe ngishoma vuo na dini, na kuririkanya malagho gha iyo miaka mirongo mfungade Jerusalemu ichaakaia ighacho kunughana na seji BWANA oremghorieghe.

³ Niko ngamghalukia BWANA Mlungu na kumlomba kwa kufunga ndighi; ngimlomba na kuvoya kwa kufunga tumu na kurwa nguwo ra magunia, na kusea kidombo ivunyi.

⁴ Ngamlomba BWANA Mlungu wapo, ngarumiria makosa gha wandu wapo ngighamba, “Ee BWANA, ko Mlungu m'baa oobolwa; kwadakatisha malaghano na lukundo lukatie kwa awo wikunde kuiwadia memu yako.

⁵ Isi dabonyere kaung'a na makosa; dabonyere kisha sena dikakulegha, dikaisigha memu yako na malaghiro ghako.

⁶ Dalemelo ni kuwisikira wadumiki wako walodi awo wereghorieghe na wazuri wedu, na wabaa wedu, na weke aba wedu, na wandu wose wa isangenyi kwa irina jako.

⁷ Oho ko mhachi ee BWANA, ela isi wandu wa Juda na wa Jerusalemu daawuyafwa waya chiaimweri na wandu wa Israeli wose, awo wiko kaavui na awo wiko kula andenyi ya masanga ghose korediwingieghe kwa wundu ghwa mawiwi derekubonyereghe.

⁸ Isi dafwa waya ee Bwana, chiaimweri na wazuri wedu, na wabaa wedu, na weke aba wedu; angu dakubonyere kaung'a.

⁹ Oho Bwana Mlungu odu ko wa wughoma, kulekagha makosa, hata ngera dakuleghie.

¹⁰ Ndederekusikireghe oho ee BWANA Mlungu odu, hata kunugha sharia rako koredinekieghe kwa chia ya wadumiki wako walodi.

¹¹ Wandu wose wa Israeli wamerie kuchikanya sharia rako, wikaghaluka na kulegha kukusikira. Kwa huwo njowe na maghemi ghose ghiandikilo andenyi ya Sharia ya Musa mdumiki wako, ghamerie kudichea; kwa kukaia dakubonyere kaung'a.

¹² Oho kookatisha malagho ghako, agho koreghighorieghe aighu yedu na aighu ya awo widibonyere nguma, kwa kureda bugha aighu yedu. Kwa kukaia maza ribonyero Jerusalemu nderibonyero andu kungi ndoenyi kose.

¹³ Bugha rose riandikilo andenyi ya Sharia ya Musa, ramerie kudichea; sena hoku ndedicheekuvoya BWANA Mlungu odu kudineke kughaluka na kusigha mawiwi ghedu, dipate kuisikira loli yako.

¹⁴ Kwa wundu ugho oho BWANA kukakaia tayari kudikaba; angu oho BWANA Mlungu odu koko mhachi kwa kazi rako rose kuribonyere, na isi dikalegha kukusikira.

¹⁵ “Idana ee BWANA Mlungu odu, oho korewifunyireghe wandu wako kufuma isanga ja Misri kwa mkonu ghwa ndighi, na irina jako jikamanyika hata idime. Isi dabonyere kaung'a, dabonyere makosa.

¹⁶ Ee BWANA, kwa wundu ghwa mabonyo ghako gha hachi kubonyere kwa wundu ghodu, nakulomba kusighe machu na kubia kwako. Kughuleke muzi ghwako Jerusalemu, ugho mghondi ghwako ghwa wueli. Kaung'a redu na makosa gha weke aba, ghashekerie Jerusalemu na wandu wako wimenyeke na kusholelwa ni wandu wose widimarie chia rose.

¹⁷ Idana ee Mlungu odu, kusikire kulomba na kuvoya kwapo ini mdumiki wako. Kwa wundu ghwako ee Bwana, nakulomba kuizighane Hekalu yako inonelo.

¹⁸ Degha kudu kwako kusikire ee Mlungu wapo; zighana kuwone wuduu ghodu, na ugho muzi ghuwangilo kwa irina jako. Ndediwuekuvoya angu wei diko na hachi ingi imbiri kwako, ela ni kwa wundu ghwa wungi ghwa wughoma ghwako.

¹⁹ Ee BWANA, sikira; Ee BWANA, fuya wughoma; Ee BWANA, sikira kubonye. Kusakemuka ee Mlungu wapo, kwa wundu ghwako kumoni, na kwa wundu ghwa muzi ghwako, na wandu wako wiwangilo kwa irina jako.”

Gabrieli kutambushira ugho wulodi

²⁰ Ngachuria kulomba, na kurumiria kaung'a rapo na ra wandu wapo Israeli. Ngamvoya BWANA Mlungu wapo uiaghe sena Hekalu yake ya wueli.

²¹ Hata iji nerekoghe ngilomba, uo mundu Gabrieli neremmbonieghe andenyi ya mawono kiimbiri, ukanichea shwa ukiburuka, ngelo efunya kizongona cha nakenyi.

²² Ukanizera, “Ee Danieli, idana nacha kukuneka hikima na kumanya.

²³ Kwendazoya kuvoya, itumbulio jafunyiroghe. Nacha kukughoria kwa kukaia kwakundo nandighi. Kwa huwo sikiria, kutambukilo ni agho mawono.

²⁴ “Miaka mirongo mfungade mando mfungade ni ngelo iwikilo ewifungua wandu wako na muzi ghwako ghwa wueli wifume kaung'enyi na wuwiwinyi. Kaung'a ichalekwa, na hachi ya kala na kala kumangishwa, mawono na wulodi ghipate kukatia, na kumshinga mavuda uo Mweli.

²⁵ Kwa huwo kumanye sena kutambukilo kukaia, kufuma momu ghwafunywa Jerusalemu iagho sena, hata kucha kwa mshingwa mavuda, uo m'bonyi nguma, ichakaia ni miaka mfungade mando mfungade. Sena kwa miaka mirongo irandadu na iwi mando mfungade, ichaaghwa sena na chia rake mbaa, na mahandaki, elaima kwa wasi.

²⁶ Nyuma ya iyo miaka mirongo irandadu na iwi mandu mfungade, uja mshingwa mavuda uchabwaghwa duu; wandu wa m'baa wa ughu muzi na Hekalu yaro.

²⁷ Uja m'bonyi nguma uchabonya mapatano ghimange na wandu wengi kwa miaka mfungade, nao uchafunga vizongona na mafunyo visefunyo ghadi na ghadi ya iyo miaka mfungade. Mmbiwi mnoni uchangirwa kondenyi Andu kwa Wueli kwa Hekalu, nao uchakaia aho hata uo oremmbikieghe aho uvikie kutua kwake kupangilo ni Mlungu.”