DANIELI 4 - Biblia Ilagho Jiboie Kwa Wandu Wose

Ndodo ya kawi ya Nebukadnezari

¹ Mzuri Nebukadnezari ukaduma malagho kwa wandu wose wa mbari, na viteto wikaiagha ndoenyi kose: “Sere ndeichurikie konyu!

² Nawona nicha kummanyisha alama na mashiniko ghibonyero kwapo ni uo Mlungu Uko Aighu Na Ndighi.

³ Iro alama rake ni mbaa saki, na mashiniko ghake ghawadie ndighi saki! Wuzuri ghwake ni ghwa kala na kala, nao wadabonya nguma kivalwa hata kivalwa.

⁴ “Ini Nebukadnezari nerekoghe ngihoresha andenyi nyumbenyi kwapo, na kusikira nicha andenyi ya ngome yapo.

⁵ Ngaloda ndodo ikaniobosha, ngelo nerekoghe nalala wulinyi kwapo ngiririkanya na kughesha malagho, nao ngaturukia.

⁶ Kwa huwo ngafunya momu kukaia wandu wose wa hikima wiko Babuloni wiredo kwapo, wipate kunimanyisha kutambushira kwaro iyo ndodo.

⁷ Niko wasawi na waghanga, na Wababuloni, na wamanyi wa nyerinyeri wikacha; ngawighoria ndodo yapo, ela ndeweredimieghe kunitambishira kutambua kwaro.

⁸ Kutua Danieli, uo orewangwagha Belteshazari kunughana na irina ja mlungu ghwapo, ukacha. Ngawona andenyi kwake roho ya milungu ielie, nani ngamghoria ndodo yapo, ngighamba,

⁹ Ee Belteshazari, m'baa wa wasawi, kwa kukaia naichi roho ya milungu ielie eko andenyi kwako, hata ndekuwadie ngasu ingi ikurie kwako, ola ndodo hei niilodere, kunimanyishe kutambua kwaro.

¹⁰ Mawono gherenichieghe niko nilale wulinyi kwapo ni agha: Nerezighanireghe ngawona mudi ghuko ghadi na ghadi ya ndoenyi; ghorekoghe mlacha nandighi.

¹¹ Ugho mudi ghukazoghua na kuwuya m'baa hata mbashu raro rikavika mawingunyi; ghukawoneka ndoenyi kose.

¹² Ghorekoghe na malemba ghiboie, na matunda gherekoghe mengi nandighi. Mudi ugho ghorewinekieghe vindo wandu wose. Nyamandu ra isakenyi rerepatireghe kiju aho; na nyonyi ra mbeonyi rikakupatira wulalo mbashunyi kwaro; kula kiumbe chiko na mumbi cherepatireghe vindo aho.

¹³ “Hata iji nerekoghe nilale wulinyi, ngawona mawono, malaika mweli uchereshagha ukisea kufuma mlungunyi.

¹⁴ Ukakema na lwaka lubaa ukighamba, ‘Demenyi ugho mudi, mdumbuo mbashu raro na kuangura malemba gharo, msasare matunda ghake, nyamandu ra isakenyi ripate kughenda, na nyonyi ra mbeonyi riinjike noko kufuma mbashunyi raro.

¹⁵ Ela msighe kirimba na miri yaro ndoenyi, chifungilo na mnyororo ghwa chuma na shaba aghadi ya nyasi mbishi. Msighenyi ukabo ni mami gha mishushure ya mlungunyi, na vindo vake vikaie chiaimweri na nyamandu, iro nyasi ra mlambenyi.

¹⁶ Akili rake nderighaluso sa ra nyamandu, hata miaka mfungade iide aighu yake.

¹⁷ Kutanya uko kwanughana na sharia idumbulo na kutangazwa ni weke malaika waeli wichereshagha, eri kutua wandu wiko moyo wimanye kukaia Uo-Uko-Aighu-Nandighi wadabonyera mawuzuri ghose gha wadamu nguma, nao wadamneka uo ose umkundagha, na kumjosa uo uko mnyonge.’

¹⁸ Ihi niyo ndodo niilodere ini Nebukadnezari ee Belteshazari. Kuniwonyere kutambua kwaro, kwa kukaia wandu wa hikima wose wa wuzuri ghwapo yawilema kutambua. Ela oho, angu kuko na roho ya milungu ielie, kwadima kunitambushira.”

Danieli kutambushira iyo ndodo

¹⁹ Niko Danieli, uo uwangwagha Belteshazari, ukakambwa ni chongo kwa ngelo vui, ukiririkanya jeghora. Mzuri ukaghamba, “Belteshazari, iyo ndodo na kutambushira kwaro isekukambire chongo.” Belteshazari ukatumbulia, “Bwana wapo, iyo ndodo ndeikaie ya awo wizamilwagha ni oho, na kutambushira kwaro kukaie kwa wamaiza wako!

²⁰ Ugho mudi kughuwonie, ghukazoghua na kuwuya m'baa, hata mudo ghwaro ghukavika mawingunyi, ghukawoneka kutua kwa ndoenyi kose,

²¹ malemba gharo gherekoghe ghiboie na matunda mengi, ghidimagha kujighwa ni wandu wengi; ghukarineka nyamandu kiju, na nyonyi ra mbeonyi rikaagha vijungi mbashunyi kwaro.

²² “Mudi ugho ni oho kumoni ee mzuri, kuzoghue na kuwuya m'baa. Wubaa ghwako ghwazoghue na kuvika mlungunyi, na nguma rako raerie hata kutua kwa ndoenyi.

²³ Na sa iji oho mzuri kuwonie malaika mweli ukisea kufuma mlungunyi na kughamba, ‘Demenyi ugho mudi na kughunona, ela msighe kirimba charo na miri yaro ndoenyi, nao mchifunge na mnyororo ghwa chuma na shaba a nyasinyi mbishi, upate mami gha mshushure ghwa mlungunyi; sighenyi ifungu jake jikaie chiaimweri na nyamandu ra isakenyi hata miaka mfungade iide.’

²⁴ “Uku niko kutambua kwaro ndodo iyo ee mzuri. Sharia yafumie kwa Uo-Uko-Aighu-Nandighi na kuredwa aighu yako bwana wapo mzuri.

²⁵ Kuchawingwa kufuma kwa wadamu, na oho kuchakaianya na nyamandu ra isakenyi; kuchaja nyasi sa ng'ombe, na oho kuchakabwa ni mami kwa mishushure ifumagha mlungunyi. Miaka mfungade ichaida, hata kwamanya kukaia Uo Uko Aighu na Ndighi wabonyagha nguma aighu ya mawuzuri gha wadamu, nao wadamneka uo ose umkundagha.

²⁶ Na sa iji erelaghiriloghe kusigha kirimba cha miri yaro, wuzuri ghwako ghuchamangishwa nyuma ya oho kumanya angu Mlungu wabonyagha nguma ndoenyi.

²⁷ Kwa wundu ugho ee mzuri, njama yapo ndeirumirikie imbiri kwako. Sigha kaung'a rako, kuinughe hachi; kusighe mawiwi, kuwonyere wughoma kwa awo wikorongelo eri kukaie na sere na kuwona nicha.”

²⁸ Maza iri rose rikakatishwa aighu ya mzuri Nebukadnezari.

²⁹ Kutua kwa meri ikumi na iwi, orekoghe ukisela aighu gorofenyi ya ngome ya kiwuzuri ya Babuloni.

³⁰ Mzuri ukaghamba, “Welee, ugho sighoghoni muzi ghwa Babuloni m'baa nighuaghie kwa kudima kwapo ghukaie malalo gha kiwuzuri ghwa wubaa na nguma?”

³¹ Hata imbiri ya madedo agho kusia momunyi kwa mzuri, lwaka lukacha kufuma mlungunyi lukighamba, “Ee Mzuri Nebukadnezari, kwazerwa huwu: Wuzuri ghwameria kuinjwa kwako.

³² Oho kuchaghenjwa noko kufume kwa wandu, kukaianye na nyamandu ra isakenyi, kuje nyasi sa ng'ombe kwa miaka mfungade, hata kwameria kukufundisha kukaia Uo Uko Aighu Na Ndighi wabonyeragha mawuzuri gha wadamu nguma, na kumneka uo ose ukundagha.”

³³ Agho malagho ghikakatishwa aighu ya Nebukadnezari shwa wori. Ukaghenjwa noko kufuma kwa wandu; ukaja nyasi sa ng'ombe, na mumbi ghwake ghukakabwa ni mami kwa mishushure ya mlungunyi, hata iridia jake jikazogua na kuwuya ilacha sa mafuri gha indu, na chwakule rake rikawuya ndacha sa ra nyonyi.

Nebukadnezari kumkasa Mlungu

³⁴ Nebukadnezari ukaghamba, “Kutua kwa agho matuku, ini Nebukadnezari nerewusireghe meso ghapo cha mlungunyi, nawurilwa ni akili rapo, ngamkasa Uo-Uko-Aighu-Nandighi, ngamkasa na kumneka ishima uo uduagha moyo kwa kala na kala. Uo wadabonya nguma kwa kala na kala, na wuzuri ghwake ghwadakaia vivalwa na vivalwa.

³⁵ Wandu wose wikaiagha ndoenyi si kilambo chingi; nao wadabonya sa iji ukundagha moni na malaika wa mlungunyi, na wandu wa ndoenyi. Ndekuwadie mndungi udimagha kusimana nao, angu kumkotia niki ubonyagha.

³⁶ “Ngelo iyo cheni, iji akili rapo raniwuria, wubaa ghwa wuzuri ghwapo, ishima japo na kuboa kwapo vikaniwuria. Wanjama wapo na wabaa wikanilola, ngawuya na kumangishwa andenyi ya wuzuri ghwapo, na hata wubaa mungi ghukachurilwa aighu yapo.

³⁷ Idana ini Nebukadnezari, nadamkasa, na kumkuma, na kumneka ishima Mzuri wa mlungunyi; angu kazi rake rose ni ra loli, na chia rake ni ra hachi. Wandu wose wighendagha kwa kukukasa, oko na ndighi ra kuwisera.”