DANIELI 10 - Biblia Ilagho Jiboie Kwa Wandu Wose

Mawono gha Danieli aho Modenyi ghwa Tigrisi

¹ Mwaka ghwa kadadu ghwa Koreshi mzuri wa Pashia, Danieli uo orewangwagha Belteshazari orenekeloghe wufunuo. Wufunuo ugho ghorekoghe ghwa loli, ghwa malagho gha wuda m'baa. Danieli ukamanya kutambua kwaro wufunuo ugho andenyi ya mawono.

² Matuku agho, ini Danieli ngalila kwa njumwa idadu.

³ Serejieghe vindo visingie, hata nyama na divei ndeverengirieghe momunyi kwapo anduangi. Serekushingieghe mavuda kwa njumwa idadu gi.

⁴ Ituku ja mirongo iwi na inya ja mori ghwa imbiri, nerekoghe kimusi mbai na mbai ya ghuja moda m'baa Tigrisi.

⁵ Ngawusira meso ghapo na kuzighana, ngawona mundu urushiro nguwo ya kitani, urwae mkowa ghwa dhahabu iboie na ndighi kiwonunyi kwake.

⁶ Mumbi ghwake ghorekoghe ghuking'ala-ng'ala sa lulu, na wushu ghwake ghorekoghe ghukiaka sa luhehia. Meso ghake gherekoghe sa lumu lwa modo; mikonu na maghu ghake gherekoghe sa shaba izughulo nandighi, na lwaka lwake lorekoghe sa lwaka lwa izungu ja wandu.

⁷ Ini Danieli nerewonieghe agho mawono niekeri, kwa kukaia awo wandu werekwanyeghe nani ndewereghiwonieghe. Werewadiloghe ni kusughusika, wikakimbia wikuvise.

⁸ Niko ngasigharika niekeri, na kuwona agho mawono mabaa; hata seresigharikieghe na ndighi ringi andenyi kwapo. Wushu ghwapo ghukaghaluka ghoobosha, ngasirilwa ni ndighi putu.

⁹ Niko ngasikira ukideda, ngaghwa kiwushu-wushu, na kuwadwa ni dilo nyingi wushu ghwapo ghwadunga andonyi.

¹⁰ Nao mkonu ghukaniadada na kuniwusira, ngadunga mikonu yapo andonyi, na kumanga na vitemberu ngisughusika.

¹¹ Nao malaika ukanizera, “Ee Danieli, Mlungu wakukunde na ndighi. Wuka kimusi kughiririkanye agho malagho nikughoriagha kwa kukaia naadumwa kwako.” Hata iji orekoghe ukighora agho malagho, ngawuka kimusi ngisughusika.

¹² Ukanizera, “Kusakeobua Danieli, kwa kukaia kufuma ijo ituku korekufunyireghe kutambukilo, kukakusera imbiri ya Mlungu wako, malombi ghako ghasikiro, niko nacha kwa wundu ghwa malombi ghako.

¹³ M'baa wa wuzuri ghwa Pashia wanitangalie kwa matuku mirongo iwi na jimweri. Ela Mikaeli, umu wa waja weke malaika wabaa, ukacha kunitesia; kwa kukaia nedesighwa niekeri na uo m'baa wa wuzuri ghwa Pashia.

¹⁴ Nani nacha kukumanyisha iro maza richaawipata wandu wako matuku ghichagha; kwa kukaia mawono agho ni malagho gha ngelo nyingi richagha.”

¹⁵ Uendameria kughora agho malagho, ngaghaluka na kughoghomesha wushu ghwapo andoenyi, ngawuya kituri.

¹⁶ Uo malaika ufwanane na mdamu ukaniadada momu ghwapo ngazoya kudeda. Ngamzera, “Ee bwana wapo, agha mawono ghanivavira, nani naasilwa putu.

¹⁷ Ini mdumiki wako, nidima wada kudedanya na oho bwana wapo? Ndighi raanisiria putu, hata miruke eni sina.”

¹⁸ Niko uo malaika ufwanane na mdamu ukaniadada sena, ukaningira ndighi.

¹⁹ Nao ukanizera, “Ee mundu, Mlungu wakukunde nandighi. Kusakeobua, sere ndeikaie kwako; kukufungishe ndighi, kukaie ing'oni.” Uendaghora nani, ngapata ndighi ngaghamba, “BWANA wapo ghora, angu kwanineka ndighi.”

²⁰ Niko ukaghamba, “Kwamanya kwaki nacha kwako? Idana nichawuya kulwa na uja m'baa wa Pashia, nani ngameria kumsima, m'baa wa Wagriki uchacha.

²¹ Ndekuwadie mndungi unitesiagha, ela Mikaeli uo malaika onyu. Idana nichakumanyisha agho ghiandikilo andenyi ya Chuo cha Loli.