AYUBU 9 - Biblia Ilagho Jiboie Kwa Wandu Wose

¹ Niko Ayubu ukatumbulia:

² “Loli naichi huwo niko iko: ela mdamu wadima wada kukaia mhachi imbiri ya Mlungu?

³ Ngera mundu odekunda kusimana nao, ndadimagha kumtumbulia hata indo jimweri kwa makoto elfu.

⁴ Mlungu oko na hikima na ndighi nyingi; ndekuwadie mndungi udimagha kusimana nao.

⁵ Wadainja mighondi isemanyagha, na kuibingilisha kwa machu ghake.

⁶ Mlungu wadaisughusa ndoe kufuma andu kwaro, na kuribonya nguro raro rinengenenge.

⁷ Wadalaghira iruwa jisebuke, na kughiria nyerinyeri risefunye miengere.

⁸ Nuo moni uekeri orealieghe mlungunyi, na kuwadia mivo-mivo ya bahari.

⁹ Mlungu nuo orebonyereghe nyerinyeri kibarabara, na Orioni, na Kilimia, na nyerinyeri ra kusinyi,

¹⁰ wadabonya maza mbaa risemanyikagha, na vilambo va mashiniko visetalikagha.

¹¹ Mlungu waawuyaida nani simmbonagha; waawuyaghenda, ela siwuemmanya.

¹² Mlungu ukawusa-lee, nani udimagha kumghiria? Nani udimagha kumkotia, ‘Niki kubonyagha?’

¹³ “Mlungu ndeghalusagha machu ghake, watesia wa Rahabu weremghoghomieghe.

¹⁴ Nidima wada kumtumbulia, angu kughalusana malagho nao?

¹⁵ Ngeduaka nisene ikosa, sidimagha kumtumbulia; suti nilombe wughoma kwa uo unishitakiagha.

¹⁶ Hata ngera nedemmbanga nao unidike, sadimagha kurumiria wei wawuyanisikiria.

¹⁷ Wadanikaba na mbeo ya kiremba, na kuchuria kunishoghonua duu.

¹⁸ Ndewuenisighia wulalo ghosoda, ela waawuyanichuria luwawo.

¹⁹ Ngaghamba niatumia ndighi; nimdima! Ngaghamba nialola hachi, uwangwa nani kutanyonyi?

²⁰ Hata ngera siwadie ikosa, madedo ghapo gheni ghichanitanya; hata ngera nakatie, uchaniwona nalagharie.

²¹ Ini nakatie, ela sitalie; nakoja kukaia moyo.

²² Ghose ni kara kara; niko naghamba wadatotesha wose wecha na wawiwi.

²³ Mundu usewadie ikosa ukafwa kwa shwa-shwa, Mlungu wadaseka wasi ghwake.

²⁴ Wurumwengu ghoonekwa wandu wawiwi, Mlungu ukaawibwagha meso watanyi waro; kamanya suo ungi ubonyere, nani ubonyere?

²⁵ “Matuku ghapo ghaida na iseghe kuchumba mundu ukimbiagha, nagho ghaida noko kuseko na kuboilwa kungi.

²⁶ Ghaida na iseghe sa ishua jighendagha naiseghe, na sa indu iseagha kuwada madiwo ghake.

²⁷ Ngaghamba, ‘Nialiwa malalamiko ghapo, nikuchuke wushu na kuvivira,’

²⁸ niawoka kuobua matiriro ghapo, angu naichi ndekuchaakaia kuseniwonie ikosa.

²⁹ E hoku nitanyiro kukaia mkosi-lee, nijiaki wasi ghwa duu?

³⁰ Hata nikuoghoshe na machi ghielie, na kuelesha mikonu yapo na sabuni,

³¹ ela sena uchanipotua andenyi ya kina cha wuchafu, na nguwo rapo rikumbo noko.

³² Mlungu si mdamu sa ini, hata nidime kumtumbulia, na kudedanya nao kutanyonyi.

³³ Kumangu wakaiagha mpatanishi ungi aghadi yapo na Mlungu, udimagha kutanya aghadi yedu.

³⁴ Mlungu ndeniinjire ikabo jake, eri useduoniobosha.

³⁵ Aho niko nidimagha kudeda nisemuobuagha, kwa kukaia naichi seji niko.