AYUBU 7 - Biblia Ilagho Jiboie Kwa Wandu Wose

¹ “Mdamu oko na wudumiki ghukurie ndoenyi, na matuku ghake gheeka sa matuku gha kibarua.

² Seji mzumba ulolagha kiju, na seji kibarua ulolagha mafungu ghake,

³ niko nani moni ninekelo meri ekaia duu, na vio va wasi.

⁴ Iji nangia kulala, niasowa dilo; nadaghalaa-ghala a wulinyi ngighamba, ‘Ndoe ielali?’

⁵ Mumbi ghwapo ghoochua vizi na wuchafu, mrongo ghwapo ghwabarika na kubonya vonda.

⁶ Matuku ghapo ghaida shwa-shwa kuchumba igurudumu ja mluki nguwo; nagho ghasia ghisene isuwirio.

⁷ “Kumbuka ee Mlungu kukaia, irangi japo ni mruke mduu, najingi sichaawona mecha sena.

⁸ Uo uniwonagha, ndewuyaaniwona sena; kuchanilola ela ndekuchaaniwona.

⁹ Sa iji koni iwingu jichukuagha na kulaghaya, niko koni mundu userwagha kaburinyi usechaawuya sena.

¹⁰ Ndewuyagha nyumbenyi kwake sena, hata ndewuyaamanyika anduangi.

¹¹ “Kwa huwo sichaanyama kima; nichadeda ngikaia na kuvavirika kubaa rohonyi kwapo; nichalalamika ngikaia na kuwawa ngolonyi kwapo.

¹² Huwo neeka nyamandu mbaa ya baharinyi, hata kuniwikie mlindiri?

¹³ Nalala wulinyi kwapo ngitima kuhoresha; nakunde kuhoresha luwawo lwapo.

¹⁴ Ela oho kwadaniturusa na ndodo na kuniobosha na mawono gha kio.

¹⁵ Aho niawona ni nicha nikunyore nifo kuchumba kukaia na ughu mumbi.

¹⁶ Niazamilwa ni kukaia moyo; sidimagha kukaia moyo matuku ghose. Nisighenyi, angu matuku ghapo ni mruke mduu.

¹⁷ Mdamu niki hata kumtale na ndighi huwu, na kumririkanyagha huwu?

¹⁸ Kwadamzighana kula nakesho, na kumtima kula ngelo.

¹⁹ Ndekulekagha kunizighana, na kunisigha nimile mada ghapo?

²⁰ Ngabonya kaung'a-lee, nakubonya wada oho kulawuagha wandu? Kwaki kunibonyere nikaie bole? Neewuya msigo kwako?

²¹ Ndekudimagha kunilekia makosa ghapo, na kuinja kaung'a rapo? Kafwani koni nichawunjwa terinyi; kuchanilola ela sichaawoneka.”