AYUBU 5 - Biblia Ilagho Jiboie Kwa Wandu Wose

¹ “Wanga idana, kuwone ngera oko mndungi udimagha kukudika. Ni uao wa weke malaika kudimagha kumghendia?

² Loli kipepe chabwaghaa mkelu, na iriso jabwaghaa mundu wa ndonyi.

³ Nammbonie mkelu uaghikie nicha, ela shwa wori ngaghuwasira njowe muzi ghwake.

⁴ Wana wake ndewine saghi; wasimwa mwandunyi hata ndewine mndungi owidederia.

⁵ Makuwido gha mkelu, hata viro vake vifumagha minjonyi, vichajighwa ni wandu wa njala, na wandu wichakaia na bea ya mali rake.

⁶ Makorongo ndeghifumagha terinyi, hata wasi ndeghubukagha andonyi.

⁷ Ela mdamu oovailwa wasi, sa susa ra modo ritarikagha nokoighu.

⁸ “Ngera ni ini, nadamlola Mlungu na kumghoria wasi ghwapo.

⁹ Uo wadabonya maza ra mashiniko, na weke mwakilimbiti wisena mtalo.

¹⁰ Wadanyesha vua ndoenyi, na kurinyoshera mbuwa machi.

¹¹ Wadawijosa wandu wiko ndonyi, na awo wililagha wadawiwusira na kuwiwika banana.

¹² Wadarivurugha njama ra wandu wa mikalo, eri wisepate nicha ingi.

¹³ Wawiwada wandu wa hikima kwa mikalo yawo cheni, na kuimeria shwa mipango ya wandu wikalie.

¹⁴ Waserelwa ni kira nadime, nawo waadada-adada dimeghadi seji ni kio.

¹⁵ Ela Mlungu wadawikira wana wakiwa wisebwagho ni wamaiza wawo; wadawikira na ndighi ra awo wiwadie kudima.

¹⁶ Kwa huwo wakiwa wawineka isuwirio, na wawiwi wawinyamirisha.

¹⁷ “Warasimilwa uo mundu ukanilwagha ni Mlungu, kwa huwo kusekemenya iji kwakanilwa ni Uo-Uwadie-Ndighi-Rose.

¹⁸ Ukashoghonua, ufunga; ukakaba, uboisa.

¹⁹ Kukapatwa ni wasi mando arandadu, uchakukira; hata indo ja mfungade, ndekuchaapatwa ni kiwiwi chingi.

²⁰ Ngelo ya njala, uchakuwika moyo; ngelo ya wuda, uchakukira kusebwagho.

²¹ Uchakulindia iji kwazighirilwa, hata ndekuchaaobua iji kunoneka kwacha.

²² Ngelo ya kunoneka na ngelo ya njala oho kuchaseka, hata ndekuchaaobua nyamandu ra isakenyi.

²³ Mbuwa yako ndeichaakaia na magho, na nyamandu ra isakenyi nderichaakuwada.

²⁴ Kuchamanya kukaia hema yako eko banana, na iji kwatala ng'ondi rako ndekuchaasowa ingi anduangi.

²⁵ Wana wako wichakaia wengi, na kivalwa chako chichakaia kingi sa nyasi ra ndoenyi.

²⁶ Kucharikwa mghosi wa matuku, seji ndembe ya viro ikuwidwagha kwa ngelo yaro.

²⁷ Ola dalolie dikawona angu, malagho agha ni gha loli. Sikira, kughimanye kwa wundu ghwa wucha ghwako.”