AYUBU 42 - Biblia Ilagho Jiboie Kwa Wandu Wose

¹ Niko Ayubu ukamtumbulia BWANA:

² “Naichi kukaia kwadima kubonya maza rose, hata ndekuwadie mpango ghungi ghwako ghudimagha kughirilwa anduangi.

³ Kwanikotia seji nidimie kukaia na ngera na hikima yako, niseichi kindo chingi. Ini nedededa malagho niseghimanyagha, malagho ghiko mabaa nisedimagha kughitambua.

⁴ ‘Kwanizerie nisikire kudede, nani nitime kutumbulia makoto ghako.’

⁵ Ini nedesikira malagho ghako ghikighorwa, ela idana nakuwona na meso ghapo.

⁶ Nakumenya ini moni, na kuhea ngisea kidombo aterinyi na ivunyi.”

Malagho gha kutua

⁷ Nao iji BWANA wameria kughora na Ayubu, ukamzera Elifazi Mtemani, “Najokwa ni machu aighu yako na waghenyi wako wawi; kwa kukaia ndemdedie malagho gha loli aighu yapo sa mdumiki wapo Ayubu.

⁸ Idana mmbwade njau mfungade na bauru mfungade, mghende kwa mdumiki wapo Ayubu mfunye kizongona chekora kwa wundu ghonyu. Mdumiki wapo Ayubu uchamlombia, nani nichasikira malombi ghake nisechem'bonyera kunughana na wukelu ghonyu; kwa kukaia ndemdedie malagho gha loli aighu yapo sa mdumiki wapo Ayubu.”

⁹ Niko Elifazi Mtemani, na Bildadi Mshuhi, na Sofari Mnaamathi, wikaghenda na kubonya sa iji koni BWANA orewizerieghe, na BWANA ukaghirumiria malombi gha Ayubu.

¹⁰ Hata iji Ayubu wameria kuwilombia waghenyi wake wadadu, BWANA ukam'bonya kuwona nicha mando awi kuchumba imbiri.

¹¹ Waruna wose wa womi na wa waka, na wandu wose weremmanyireghe imbiri, wikacha na kubonya karamu nyumbenyi kwake. Wikawadwa ni wughoma ghwake; wikamhoresha ngolo kwa wundu ghwa wasi ghose BWANA orekoghe wamredia, na kula umu ukamneka pesa na pete ya dhahabu.

¹² BWANA ukamrasimia Ayubu miaka yake ya kutua kuchumba iyo ya imbiri. Ukakaia na ng'ondi elfu ikumi na inya, ngamila elfu irandadu, ng'ombe elfu iwi, na weke punda wa waka elfu imweri.

¹³ Wokoni ukapata wana mfungade wa womi, na wa waka wadadu.

¹⁴ Mwana wa imbiri wa waka ukammbanga Jemima, na wa kawi ukammbanga Kezia, na wa kadadu ukammbanga Keren-hapuku.

¹⁵ Ndekorekoghe na waka wangi isanga jose wighokie sa wai wa Ayubu. Ndee ukawineka ifwa chiaimweri na waruna wa womi.

¹⁶ Nyuma ya agha, Ayubu ukakaia moyo miaka ighana na mirongo ina; ukawona wana wake, na weke wawae, hata kivalwa cha kana.

¹⁷ Ayubu ukafwa, mghosi wa matuku mengi.