AYUBU 41 - Biblia Ilagho Jiboie Kwa Wandu Wose

¹ “Welee, kwadima kuwada mamba na ndoana ewada samaki, angu kumfunga momu ghwake na kamba?

² Kwadima kumfunga mbua na kamba, angu kungira ndoana mizunyi kwake?

³ Wadima kukulomba kumlekerie? Wadima kukuvoya kumfuye wughoma?

⁴ Wadima kubonya mapatano na oho, na kulaghira kukudumikia matuku ghose?

⁵ Kwadima kumfunga na kusarigha nao sa nyonyi? Kwadima kumfunga na kamba kumlongoze eri kusekesheghe wai wako wa kazi?

⁶ Wawadi samaki wadima kum'bonyera ighuri? Wadima kumdumbua-dumbua wimuuze?

⁷ Kwadima kuturua mrongo ghwake na kirau, angu kuturua chongo chake na ifumu?

⁸ Kukatima kummbwada, kuchakaia kukikumbuka wuda ghwaro, na oho ndekuwuyaabonya huwo sena.

⁹ Mundu ukawona mamba, uawadwa ni kiwogho-wogho; hata uaghwa andonyi.

¹⁰ Ndekuwadie mndungi uko ing'oni udimagha kumnyavura. Da nani sena udimagha kusimana nani?

¹¹ Nani wawuyanilawia nimlipe? Vilambo vose viko ndoenyi ni vapo.

¹² “Leka nikughorie seji mamba uko; seji uko m'baa, uwadie ndighi.

¹³ Nani udimagha kusicha mrongo ghwake? Nani udimagha kuturua agho malala awi gha mrongo ghwake?

¹⁴ Nani udimagha kum'asamua momu ghuko na maghegho gheobosha?

¹⁵ Mghongo ghwake ghoobonywa na makoko, sa ngao ripangilo msitari; riwadanishiro kaavui kaavui, seji reekandwa na sungu.

¹⁶ Reepangwa kaavui nandighi, mbeo isedimagha kungia.

¹⁷ Reekwanywa chiaimweri, kula imu na mmbao; risedimagha kutanywa.

¹⁸ Ukatinya, mwengere ghuawoneka; meso ghake gheeka gha ngundu sa iruwa jibukagha.

¹⁹ Momu ghwake ghwadafunya chumu ra modo, na susa ritarikagha.

²⁰ Mbua rake radafunya mosi, sa nyungu idoghodagha yawikirilwa modonyi.

²¹ Miruke yake yadaakisha maka, na momu ghwake ghwadafunya lumu lwa modo.

²² Singo yake yawadie ndighi, wose wimmbonagha wadamuobua.

²³ Nyama rake reewadanishwa gi; reemanga gi risenyavurikagha.

²⁴ Lagha yake ekua sa igho; eekua sa igho jesha ja ndonyi.

²⁵ Ukawuka, hata wandu wiwadie ndighi wadaobua; wangilwa ni kiture na kukimbia kwa wowa.

²⁶ Ukadungwa na lufu ndelumturuagha; Ifumu, hata iwanu, angu ifumu itini ndejim'bonyagha ilagho jingi.

²⁷ Wadatala chuma sa itasa, na shaba sa mudi ghuworie.

²⁸ Ukeduakumbwa na iwanu ndekimbiagha; magho ghakumbwa na kikuza kwake ni sa matasa.

²⁹ Rungu kwake ni sa itasa, ukakumbwa na ifumu, uaseka.

³⁰ Nandonyi kwake kooka sa chuwigha rikalie, ukakaida a mazozonyi riadema sa igare jechana viro.

³¹ Wadabonya andu kumilie kunyavurike sa machi ghidoghodagha, na bahari sa nyungu ya mavuda ghidoghodagha.

³² Wadasigha chia ing'alaa-ng'ala nanyuma, na kubonya ifuo ja chokwa baharinyi.

³³ Ndekuwadie nyamandu ingi ndoenyi ifwanane nao, ni nyamandu isena wowa.

³⁴ Wadamenya hata nyamandu rikukasire; ni mzuri wa nyamandu rose ra isakenyi.”