AYUBU 39 - Biblia Ilagho Jiboie Kwa Wandu Wose

¹ “Kwaichi ngelo mburi ra isakenyi rivagha? Kwazighanire sarigha ikiva?

² Kwaichi radwagha meri ilinga ima rive, kwaichi ngelo rivagha?

³ Radima kuva wana wawo, na luwawo lwasia.

⁴ Ndaghina rawo razoghua isakenyi riko nandighi; raghenda, hata nderiwuyagha kwa weke mae anduangi.

⁵ “Nani ulekerie furo? Nani urifungue?

⁶ Narinekie ikara jikaie muzi ghwawo, na kurisigha rikaie andu kwa kiserere.

⁷ Yakaia kula na ndoghoi ra muzi m'baa, hata mndungi ndedimagha kuifugha ibonye kazi.

⁸ Mighondi ni mlamba ghwake ghojia; yadamara-mara ikilola nyasi mbishi ipate kuja.

⁹ “Welee, mbogho yadima kukunda ikudumikie? Yadima kulala kiwandenyi kwako?

¹⁰ Kwadima kuifunganya na ighembe ikulimie? Kwadima kuibonya ibubule mbuwa?

¹¹ Kwadima kuisuwiria angu iko na ndighi nyingi? Kwadima kuisighia kazi rako?

¹² Kwadima kuisuwiria ikukwanyira makuwido ghako, na kureda viro vako andu kuvichaniagha?

¹³ “Nyagha yadakaba-kaba mbawa rake kwa kuboilwa, ela ndeidimagha kuburuka sa ichachula.

¹⁴ Kwa kukaia yadava maghi ghake ndoenyi, na kughisigha ghipate iruke ja ndoe.

¹⁵ Yaliwa kukaia ghadima kuwadilwa, na kubarwa ni nyamandu ya isakenyi.

¹⁶ Yawibonyera wana wake kinyanya seji si wake wangi; ndeitalagha hata ngera kazi yake yakaia ya duu.

¹⁷ Ni ini niibonyere ikaie mkelu; ngaiima hikima.

¹⁸ Ela ikawoka kukimbia, hata farasi na mjoki wake ndewidimagha kusimana nayo.

¹⁹ “Wele Ayubu, ni oho kurinekagha farasi ndighi? Ni oho kurirushagha singa singonyi kwawo?

²⁰ Ni oho kuribonyagha rirame-rame sa zighe, na kuobosha wandu kwa lukaso?

²¹ Radakura-kura vololonyi rikiboilwa ni ndighi rawo, naro rafuma noko kughenda wudenyi.

²² Nderina kiture hata nderiobuagha, hata ndeiwuyagha nyuma wudenyi.

²³ Maswagha ghidwalo ni mjoki farasi, ghaawuyakaba-kaba aluwarunyi na kung'alishwa ni iruwa.

²⁴ Farasi, rasumbuka na kusughusika, rikikimbia kiimbiri; tarumbeta ikeduakabwa ndeimangagha kimusi.

²⁵ Tarumbeta ikakabwa, farasi riakema; ranukilwa ni wuda ghuko kula. Rasikira chwaka ra wabaa rikilusha wuda.

²⁶ “Welee, ni oho kuifundishagha mbungu kuburuka, ingelo ikuchuagha mawawa ghake kughenda cha kusinyi?

²⁷ Welee, ni oho kuilaghiragha indu ijoke na kubonya kijungu chake andu kwa ighu?

²⁸ Yadabonya muzi ghwake ighambenyi jiko ighu, na kuagha ngome rake a mchombololonyi ghwa igho.

²⁹ Kufuma aho yadazighana ikilola madiwo, nayo yadaghiwona hata ghiko kula.

³⁰ Indu radaimara gharia mbai mbai, na vana vawo vadaanywa bagha.”