AYUBU 38 - Biblia Ilagho Jiboie Kwa Wandu Wose

BWANA kumtumbulia Ayubu

¹ Niko BWANA ukamtumbulia Ayubu kufuma mbeonyi ya kikulughulu:

² “Oho nani kukotiagha hikima yapo kwa malagho gha duu ghiseeliagha?

³ Kaia nicha sa mndwawomi; kunitumbulie makoto ghapo.

⁴ “Welee, iji nereumbagha wurumwengu korekoghe? Nighorie ikakaia kudimagha.

⁵ Nani orewikieghe vipimo varo? Nani orewikirieghe kamba ya vipimo ikakaia kuichi?

⁶ Welee, niki chawuyawadia ndoenyi? Nani orewikirieghe igho jaro ja mbembenyi?

⁷ Ngelo iyo, nyerinyeri ra nakesho rereborieghe chiaimweri, na weke malaika wose wikazuma kwa kuboilwa.

⁸ “Nani orevingieghe machi gha bahari, ingelo gherevungukagha embelonyi kwaro?

⁹ Ni ini nereifinikireghe marundu, na kuiseria kira kibaa.

¹⁰ Ngaibonyera mpaka, na kuighiria isechumbe.

¹¹ Nereizerieghe, ‘Kootuya aeni aha, kusechumbe; mivo-mivo yako iwadie ndighi, suti ituye aho.’

¹² “Wele Ayubu, jingi kwalaghirie ndoe iele kufuma kwavalwa?

¹³ Jingi kwalegherie mwengere ghwa ndoe kuelenyi ghulangale hata kutuonyi kwa ndoenyi na kuwifunya wawiwi andu werekuvisireghe?

¹⁴ Mwengere ghwa dime ghwafunukua mighondi na vololo riwoneke worinyi; rawoneka worinyi sa nguwo yakuchulwa, na sa muhuri ghwakabwagha aighu ya wongo.

¹⁵ Mwengere ghwa dime ghwawuya m'baa kwa wawiwi; ghwawighiria wisebonye wuwiwi ghwawo.

¹⁶ “Jingi kwavikie andu ndoria ra bahari rivumbulukiagha? Jingi kwaselie kondenyi baharinyi?

¹⁷ Jingi kwawonyero mbenge ra wurumwengu ghwa wafu ghuko kira?

¹⁸ Kwaichi wurumwengu seji ghung'ane? Ghora kamanya kuichi agha ghose.

¹⁹ “Kwaichi andu mwengere ghwafumagha; na asili ya kira niki?

²⁰ Kwadima kuriwonyera andu kwaro? Kwaichi chia eghenda andu rikaiagha?

²¹ Loli kwaichi; kwa kukaia ko wa kala nandighi! Korekoghe aeni wurumwengu ghukiumbwa.

²² “Jingi kwavikie nyumba ewika theluji, angu kuwona nyumba ya vua na magho?

²³ Nadariwika kwa wundu ghwa ngelo ya wasi, na ngelo ya wuda.

²⁴ Jingi kwavikie andu iruwa jibukiagha, angu andu mbeo enona ya mashariki ifumagha?

²⁵ “Nani ubarie mkua ghwa machi gha vua, na kubonya chia, na kumanya chia ya lukuwa?

²⁶ Nani unyeshagha vua andu mndungi usekaiagha?

²⁷ Nani unyosheragha ndoe iomie machi, hata nyasi ribuke?

²⁸ “Vua yawadie ndee? Nani uvagha matanda gha mami?

²⁹ Nani uvae barafu, mbeo ibirie yavalwagha nani;

³⁰ iyo ikurishagha machi ghiwuye sa igho, na bahari iwadane?

³¹ “Kwadima kufunga nyerinyeri Kilimia, angu kufungua kamba rifungie nyerinyeri Orioni?

³² Welee, kwadima kulongoza nyerinyeri kwa vimu varo? Kwadima kulongoza nyerinyeri kibarabara na wana wake?

³³ Welee, kwaichi sharia rilongozagha mawingunyi? Kwadima kuritumia ndoenyi?

³⁴ “Kwadima kughilaghira mawingu ghikunyeshere vua?

³⁵ Kwadima kuriduma chuhehia riende, nao rikutumbulie, ‘Ee diaendakaba?’

³⁶ Nani ungirie hikima ngolonyi, angu kutambukilwa akilinyi?

³⁷ Nani uwadie hikima etala mawingu, Nani udimagha kughibonya ghinyeshe vua,

³⁸ hata iwadanishe teri iwuye malowa?

³⁹ “Kwadima kupata madiwo kwa wundu ghwa shimba, na kuwighudisha wana wa shimba,

⁴⁰ ingelo wiko mbangenyi kwawo, wikilaliria mirumenyi kwawo?

⁴¹ Nani urinekagha ngorusa vindo, ingelo vana vawo vakamara-mara vasowa vindo na kunililia ini?