AYUBU 35 - Biblia Ilagho Jiboie Kwa Wandu Wose

¹ Elihu ukaghamba,

² “Ayubu, si nicha kughora wei koko mhachi imbiri ya Mlungu;

³ angu kumkotia wei kwapatire fwaidaki kwa kuleghabonya kaung'a.”

⁴ Nichakutumbulia chiaimweri na waghenyi wako.

⁵ Zighana cha mawingunyi kuwone; wona mawingu ghiko ighu kukuchumba.

⁶ Kukabonya kaung'a ndekum'bonyagha Mlungu ilagho jingi. Kaung'a rako rikakaia nyingi rim'bonya wada?

⁷ Ngera ko mhachi, kwamnekagha kii? Angu wapatagha kii kufuma kwako?

⁸ Mdamu mmbenyu nuo upatagha wasi iji kwabonya kaung'a, na hachi yako iamtesia uo.

⁹ “Wandu wikakakorongwa wadakema; wadalomba wutesia kufuma kwa mndumu uwadie ndighi.

¹⁰ Ela mndungi ndemlolagha Mlungu Muumbi wake, uo unekagha wandu isuwirio ngelo wakambwa ni chongo.

¹¹ Ndewimghalukiagha Mlungu, uo udinekagha hikima; udinekagha hikima kuchumba nyamandu na nyonyi ra mbeonyi.

¹² Wadakema, ela Mlungu ndetumbuliagha; kwa kukaia ni wandu wawiwi wikukasire.

¹³ Loli Mlungu ndesikiragha kililo cha duu; Uo-Uwadie-Ndighi-Rose ndechitalagha.

¹⁴ Ni kuchumba saki iji kughambagha ndekuwuemmbona; na wei maza rako warimanya to, na kedi mwandu ghwako waghumanya to kummbeserie.

¹⁵ Kwa kukaia ndekabagha kwa machu ghake, hata kuzighana wuwiwi,

¹⁶ Ayubu kwaawuyadeda malagho maduu, ndekuwuemanya niki kwawuyadeda.”