AYUBU 33 - Biblia Ilagho Jiboie Kwa Wandu Wose

¹ “Idana Ayubu sikira madedo ghapo; kusikirie seji nighoragha.

² Nakaia tayari kudeda malagho ghiko ngolonyi kwapo.

³ Malagho ghapo ni gha loli, ghifumagha kwa ngolo ielie.

⁴ Roho wa Mlungu waniumbie, na miruke ya Uo-Uwadie-Ndighi-Rose, yadanikaisha moyo.

⁵ Nitumbulie iji kudimagha; panga malagho ghako disimane.

⁶ Kumanye ini neeka sa kumoni imbiri ya Mlungu; ini wori neeumbwa kwa wongo.

⁷ Kwa huwo kusakeniobua; sichaakusima kwa malagho ghapo.

⁸ “Loli kwadeda ngisikira. Kwaghamba,

⁹ ‘Naelie, sina ikosa jingi; neko nicha, siwadie wuwiwi ghungi.

¹⁰ Ela Mlungu waawuyanitala kukaia mkosi, na kuniwona sa m'maiza wake.

¹¹ Wanifunga maghu ghapo na minyororo; waizighanira mighendo yapo yose.’

¹² “Ela nakuzera ndekune loli ingi aighu ya ilagho iji. Mlungu ni m'baa kuchumba mdamu.

¹³ Kwaki kusimanagha nao wei ndetumbuliagha ilagho jingi ja mdamu?

¹⁴ Mlungu wadedagha sena na sena, hata ngera saki mdamu ndetalagha.

¹⁵ Mlungu wadedagha kwa ndodo, na kwa mawono nakio; ngelo wandu walala dilo nyingi mawulinyi kwawo.

¹⁶ Wawibonya wisikire agho ughoragha, na kuwiobosha kwa mawonyero ghake.

¹⁷ Mlungu wadaghora nawo eri wisighe kaung'a, na kuwikira kufuma kwa kukukasa kwawo.

¹⁸ Ndewisighagha witotesho, ela wadawikira na kifwa.

¹⁹ “Mlungu watumiagha wukongo kumghalua mdamu, kwa kumchura luwawo mumbinyi kwake.

²⁰ Mkongo wazamilwa ni vindo, hata iveni viboie kuchumba.

²¹ Wadaruma na kusia putu; wafumwa ni maindi.

²² Walighisa kufwa, ungiro kaburinyi.

²³ Kewada malaika umu wadima kucha kumtesia, umu wa maelfu gha weke malaika wa Mlungu, uwikumbusagha wandu kazi rawo.

²⁴ Kwa wughoma ghwake ughambe, ‘Mleke. Kusemsighe ungie kaburinyi; napata wukomboli.’

²⁵ Niko mumbi ghwake ghuchawuya sa ghwa mwana mtini, nao uchawurilwa ni ndighi ra wudawana ghwake.

²⁶ Uchalomba kwa Mlungu nao uchamsikira; uchamtasa Mlungu kwa kuboilwa. Na Mlungu uchammbunjira hachi rake.

²⁷ Uchacha imbiri ya wandu ukighamba: ‘Nabonyere kaung'a, ngailaghasha hachi; ela Mlungu ukanifuya wughoma.

²⁸ Wanikirie nisefo, nani nichakaia moyo ngiboilwa ni mwengere.’

²⁹ “Mlungu wabonyeragha mundu maza iri sena na sena,

³⁰ upate kukaia moyo usefo, eri upate kughuwona mwengere ghwa irangi.

³¹ Idana Ayubu sikiria agho nighoragha, kaia kima nidede.

³² Ela kamanya kuko na ilagho jingi jeghora kunitumbulie; ghora, kwa kukaia nichaboilwa kukuwona kuko mhachi.

³³ Ikakaia si huwo, nyama kima kunisikirie, nani nichakufundisha hikima.”