AYUBU 31 - Biblia Ilagho Jiboie Kwa Wandu Wose

¹ “Nameria kulaghira, sichaamzighana mwai kwa bea izamie.

² Nipataki kufuma aighu kwa Mlungu? Ni ifwaki nipatagha kufuma aighu kwa Uo-Uwadie-Ndighi-Rose?

³ Wasi ghwadawipata awo wisene hachi, na matiriro ghadawipata awo wibonyagha kiwiwi.

⁴ Mlungu waichi kula ilagho nijibonyagha; wawuyawona seji nighendagha.

⁵ “Jingi sekaia na irangi ja mikalo, hata jingi sikalie wandu.

⁶ Mlungu ndenitanye kwa hachi, nao uchawona kukaia siwadie ikosa jingi.

⁷ Ikakaia nilagharie chia, na kunugha agho nighiwonagha, angu kuilusha mikonu yapo na wuwiwi ghungi,

⁸ wazima ndewije ivo niwae; na miwalwa yapo ndeikulo.

⁹ “Ikakaia niririlo ni muka wa mmbedu, na kumlaliria kaavui na nyumba yake,

¹⁰ mkapo ndeshe viro va mundu mzima, na wandu wazima wilale nao.

¹¹ Ijo ni ikosa jizamie nandighi; na wuwiwi ghofunyirwa ikabo kunughana na sharia.

¹² Wulaki ni sa modo ghulunguragha ghwa Jehanamu ghudimagha kutotesha kula kindo niko nacho.

¹³ “Ikakaia nileghie kubonya hachi kwa mdumiki wapo wa womi angu wa waka, wachanililia kwa wundu ghwa ilagho jingi niwibonyere,

¹⁴ nibonya wada iji Mlungu wakatanya? Ukakakotia-lee, nimtumbulia wada?

¹⁵ Welee, uo Mlungu uniumbie, suo moni uwiumbie wadumiki wapo? Suo moni orediumbieghe diwose?

¹⁶ “Jingi simuimie mkiwa kindo chingi orechikundieghe, angu kum'bonya muka-mkiwa ufo ngolo,

¹⁷ sijie vindo ngamuima mwana mkiwa.

¹⁸ (Nadamlela sa mwana wapo kufuma wanake ghwake, kufuma wavalwa kifunyi kwa mae, needuamlongoza.)

¹⁹ Iji neremmbonieghe mndungi uko na zuna, angu mkiwa usewadie nguwo ekufinikira,

²⁰ neremnekieghe nguwo ya sufu, ibonyero kwa mafuri gha ng'ondi ra iranu japo jeni; nao ukanirasimia kwa ngolo yake yose.

²¹ Ikakaia nimkitire mwana mkiwa ngimanya nadima kumsima kotinyi,

²² nigho loko, na mkonu ghwapo ghupotoke.

²³ Kwa kukaia nerekoghe ngiobua ikabo ja Mlungu, seredimagha kubonya huwo anduangi.

²⁴ “Jingi siwikie irumirio japo kwa mali, hata kukusaghika na dhahabu ielie.

²⁵ Jingi sikukasire angu wei niko na mali nyingi, iro niripatire kwa wungi.

²⁶ Jingi sitasire iruwa kwa wundu ghwa kung'ala-ng'ala kwake, hata mori kwa wundu ghwa kughoka kwake.

²⁷ Ndeviniririe ngolonyi kwapo, hata kususugha mkonu ghwapo ngivitasa.

²⁸ Ugho wori ni wuwiwi ghofunyirwa ikabo ni watanyi; kwa kukaia nadasowa wuloli kwa Mlungu-Uko-Aighu.

²⁹ “Jingi seboilwa ni kutota kwa m'maiza wapo, hata kwa uo kupatwa ni mawiwi ghangi.

³⁰ Jingi sebonya kaung'a, kwa kumuewia m'maiza wapo ufo.

³¹ Ndekuwadie mndungi wa nyumbenyi kwapo useichi, kula mundu uchagha nadamkaribisha vindo.

³² Seremsighieghe mdambi ungi ulale achienyi; nerewikaribishireghe wose mzinyi kwapo.

³³ Wandu wamu wavisagha kaung'a rawo, ela ini jingi sivisire rapo.

³⁴ Jingi siobue seji wandu widimagha kunighora; jingi sinyame kima angu kukaia nyumbenyi, wei angu niobuagha kusekwa.

³⁵ Welee, ndekuwadie mndungi udimagha kunisikiria seji nighoragha? Naghema kukaia kula ilagho nighoragha ni ja loli. Uo-Uwadie-Ndighi-Rose ndenitumbulie. Na wei mashitakio ghiredwagha ni m'maiza wapo ghadaandikwa nighiwone,

³⁶ loli cheni nadaghifunga a iweghenyi kwapo, na kughirwa sa kirumbu chongonyi kwapo.

³⁷ Nadamghoria Mlungu maza rapo rose nibonyere, na kusoghoda imbiri kwake kwa wuing'oni sa m'baa.

³⁸ “Ikakaia niiwie ndoe nawuyailima, ngawisoka wandu waro,

³⁹ ikakaia nijie vindo vifumie aho, na wandu wiilimie waawuyabwaghwa ni njala,

⁴⁰ iyo ndoe ndeibuko ni minjwa wulalo ghwa ngano, na isaka wulalo ghwa shairi.” Malagho gha Ayubu ghatuya aha.