AYUBU 29 - Biblia Ilagho Jiboie Kwa Wandu Wose

Malagho gha Ayubu gha kutua

¹ Ayubu ukawada kudeda sena ukaghamba:

² “Nawonagha nicha saki ngera nadakaia seji nerekoghe kala, ingelo Mlungu orekoghe ukinilindia.

³ Ngelo iyo, Mlungu orekoghe andwamweri nani ngelo rose; ukawuya mwengere ghwapo iji nerekoghe ngighenda kirenyi.

⁴ Matuku agho nerekoghe nicha, na Mlungu orekoghe mghenyi wapo ukilindia nyumba yapo.

⁵ Mlungu Uwadie-Ndighi-Rose orekwanyeghe nani, na wana wapo wose wikanimara chia rose.

⁶ Mfugho rapo rerekoghe rikifunya mariwa mengi; na mizeituni yapo izoghuye aghadi ya ndoe ra magho-magho, ikanineka mavuda mengi.

⁷ Ngelo nereghendagha mbengenyi ya muzi, na kusea kidombo andu kokwania,

⁸ wandu wa irika wereniwonieghe na kuniinjikia, na waghosi wikaniwukia kimusi kwa ishima.

⁹ Wabaa werelekieghe kudeda, wikawadia memu yawo.

¹⁰ Wandu wa ishima werenyamieghe kima, wikanyama chii.

¹¹ Mundu orenisikireghe ngideda, oreniwangieghe mrasimilwa; na uo oreniwonieghe, ukanikuma.

¹² Neremvuvueghe mkiwa uo orenikemieghe, na mwana mkiwa wasowa mndungi otesia, neremteserieghe.

¹³ Mundu orekoghe kaavui na kufwa orenirasimieghe; ngam'bonya muka mkiwa ubore kwa kuboilwa.

¹⁴ Nerekurushireghe hachi, ikakaia sa irwao japo; loli yapo erekoghe sa ijoho na kiremba chapo.

¹⁵ Nerekoghe meso kwa vitungure, na maghu kwa wakelemeri.

¹⁶ Nerekoghe sa aba kwa mkiwa; ngamdederia mghenyi uko wasinyi.

¹⁷ Nerewisirishireghe wang'eti ndighi; ngawivuvua awo werewikorongagha.

¹⁸ Neresuwirieghe nichadua moyo luma, na kufwa nyumbenyi kwapo kwa sere.

¹⁹ Nerekoghe sa mudi miri yaro inywagha machi ngelo rose, na mbashu raro rikitonya machi kio chee.

²⁰ Kula mundu orekoghe ukinikuma ngelo rose, nani nerekoghe na ndighi matuku ghose.

²¹ “Ngafunya njama, wandu weeduanyama kima; wisikire agho nighoragha.

²² Ngameria kudeda, ndeweewuyadeda sena; wedengilwa ni malagho ghapo wikaakatwa.

²³ Werekoghe wikiniweseria sa vua, wikakaia sa ndoe iweseriagha ingelo ni vua ya imbiri.

²⁴ Iji werefuyeghe ngolo nerewivivirieghe, na kuelwa ni wushu kwapo kukawikumba ngolo.

²⁵ Nereserieghe kidombo sa m'baa wawo, ngawidumbuya malagho ghawo; ngawilongoza sa mzuri ulongozagha majeshi ghake, ngakaia kwawo sa mundu uwihoreshagha wandu wiko na wasi.