AYUBU 26 - Biblia Ilagho Jiboie Kwa Wandu Wose

¹ Niko Ayubu ukatumbulia,

² “Kuaghesha huwo niko kwanitesia ini mnyonge, na kunivuvua ini mundu nisewadie ndighi!

³ Kuaghesha kwanineka njama iboie, na kunighoria malagho mengi gha suku ini mundu nisene hikima!

⁴ Nani wakutesia kudeda agho malagho? Nani wakulongoza kudeda huwo?

⁵ Roho ra wafu riko kondonyi machinyi, na vose viko andenyi yaro vaawuyasughusika.

⁶ Mlungu waichi maza rose ra Andu kwa Wafu; ndekuwadie kilambo chingi chivisikie kwake anduangi.

⁷ Mlungu wakuchua mawingunyi cha kaskazinyi aighu ya andu kuduu, na kuwanika ndoenyi kuseko na andu kowanikia.

⁸ Wadatumbanya machi andenyi ya mawingu ghake mabaa, ela sena mawingu ndeghibarikagha anduangi.

⁹ Wadafinikira mori na kughuvisa na iwingu jake.

¹⁰ Wawaghie mwengere na kira, ukabonya mwano aighu ya bahari.

¹¹ Ukadokia nguro riwadiagha mawingunyi, radaobua na kusughusika.

¹² Oreinyamireghe bahari kwa ndighi rake, na kwa wuya ghwake, ukam'bwagha Rahabu iyo nyamandu mbaa ya baharinyi.

¹³ Orefurieghe miruke yake mawingunyi kukakombwa; mkonu ghwake ghukaidunga choka erekoghe ikikimbia.

¹⁴ Agha malagho gha kazi rake dawuyaghiwona ni gha ighu-ighu; daawuyasikira lwaka lohohoria tu. Ela kwa loli nani udimagha kumanya seji Mlungu uko m'baa?”